Read Biete RIPHUTNA 30 Bible Online

RIPHUTNA 30 - Biete bible

RIPHUTNA 30

¹Rakili khan Jakoba khah nai rêng rêng a nei pêk no sikin ân zirpuinu khah a thîk tâk a; Jakoba ziangah Rakili khan, “Nai ne pe roh, khanonchu, kî thi rang kêng,” a ti a.

²Jakoba kha Rakili chunga khan a ning a thik a, “Nai nei thei loi ranga nang isiamtu Pathian im kî nit hih,” a ti a.

³Rakili khan, “En ta, ki bôinu Bilhaii hih zâlpui inla; khanchu, kei khomin ama tak ata ki malpui chunga ke pom rang nai a ne inei pêk rang a nit,” a ti a.

⁴Khanchu, a bôinu Bilhaii khah a pasal Jakoba ziangah a pêk a, Jakoba khan ani khah a lei zâlpui a.

⁵Bilhaii khan nai a vong a, Jakoba khah naiipa a nei pêk tâk a.

⁶Khanungchu, Rakili khan, “Pathianin a ne ngaitua a, ki rôl a lei riat a, naiipa a ne ipêk a nit hih,” a ti a; arming kha Dana a sak a.

⁷Rakili bôinu Bilhaii khan nai a vong nôk a, Jakoba khah naiipa dang a nei pêk nôk a.

⁸Rakili khan, “Ribuanpui titakin ken zirpuinu chu ker buanpui a, ke nê tâk,” a ti a; arming kha Naftalia a sak a.

⁹Leaii khan nai dang nei nôk thei khâi mak iti arriatin chu a bôinu Zilpaii khah a ṭhui a, Jakoba a pêk a.

¹⁰Khanchu, Leaii bôinu Zilpaii khan Jakoba khah naiipa a nei pêk a.

¹¹Leaii khan “Ki vân a ṭhat vang na!” a ti a; arming kha Gada a sak a.

¹²Leaii bôinu Zilpaii khan Jakoba khah naiipa dang a nei pêk nôk a.

¹³Leaii khan, “Ki lôm tlia na! Atûn chu nupanghein lômi an ne iti rang tâk a nit hih,” a ti a; arming kha Asera a sak a.

¹⁴Bu ât lâiin Reubena chu loiah a fe a, zôlaidi[59] a mu a, a nu Leaii a hong chôi pêk a. Rakili khan Leaii ziangah, “Ringaiihoi takkan ni naipa zôlaidi ne sem viat roh,” a ti a.

¹⁵Leaii khan a ziangah, “Ki pasal ni ne isut hih thilte pai im ai nit? Ki naipa zôlaidi ten khom ne sut nôk nî tum na?” a ti a. Rakili khan, “Ni naipa zôlaidi ne pen la, vuanzân Jakoban nang la zâlpui riseh,” a ti a.

¹⁶Khanchu, kholoiah Jakoba kha loia rithoka a hongin chu Leaii khan a lei va don a, “Vuanzân chu ki ziangah ni zâl rang a nit; ki naipa zôlaidin nang ki lei ilo tâk kêng,” a ti a. Kha zânah khan chu a ompui tâk a.

¹⁷Pathianin Leaii ṭongṭaina arngai pêk a, nai a vong a, Jakoba chu naiipa arngana a nei pêk nôk a,

¹⁸Leaii khan, “Ki bôinu chu ki pasal ziangah ki pêk sikin Pathianin ki lo a ne ipêk tâk a nit hi,” a ti a; arming kha Isakara a sak a.

¹⁹Leaii khan nai a vong nôk a, Jakoba kha naiipa â rukna a nei pêk nôk a.

²⁰Leaii khan, “Pathianin thil ilu tak a ne ipêk a nit hih, naipa pasal irukkah ki nei pêk tâk sikin ki pasal hin ner ngaiinlu tâng a ti,” a ti a; arming kha Zebuluna a sak a.

²¹Kha nungah khan nai nupang a nei nôk a, arming Dinaii a sak a.

²²Pathianin Rakili khah a riat mai a, Pathianin a ṭongṭai arngai pêk a, a sûl â ong pêk tâk a.

²³Khanchu, nai a vong a, naiipa a nei tak a; “Pathianin ki mualinphoina a lîp tâk,” a ti a.

²⁴A naipa riming kha Josefa[60] a sak a. PUMAPA khan nai ipa dang ne pe nôk sa riseh, a ti a;

²⁵Rakilin Josefa a nei zoi nungah khan, Jakoba khan Labana ziangah, “Ki omna, ki ram tiang ki kîr nôkna rangin nen fe ta roh.

²⁶Ni sin ki thona bi ki nupuihei neh ki naihei hi ne pen la, nen fe ta roh; ni sin ki thon ṭhatzia ni riat a,” a ti a.

²⁷Labana khan a ziangah, “Ringaiihoi takkan la om hi rei; PUMAPA khan nangma zârin ṭhat a ne ivur a nit iti riatna kî nei a nit.

²⁸Khasikin, ni lo rang khah tin la nang pêng ki ti,” a ti a.

²⁹Jakoba khan a ziangah, “Ni sin ki tho dân ni riat a, ki enkolna nuaia ni berahei an hong pung dân khom ni riat riai a.

³⁰Ki hong maah khan chu iroicheka bang kha atûn chu itam takkah a hong init tâk hih; ki ke chuangna tiang tiang PUMAPA khan ṭhat nang ai vur mai a nit. Atûn chu keima ridîna ki sin rang zoro ai nit tâk a nit,” a ti a.

³¹Labana khan, “Im nang ki pêk rang?” a ti a. Jakoban, “Îte ni ne pêk nang mak; hi thil hi ni ne tho pêkin chu ni ran lômhei chu enkol nôk ki ti.

³²Vuanah hin ni ran lômhei chu va en suak zit ki ta; bera lâia a vom murdi hei, kêl lâiah a ngoia riziahei neh a ngoia det lok lokhei chu a ranin ṭhui ki ti. Atûna rithokin chu khangkana zuang inzirhei murdi chu ki lo rang ni riseh.

³³Ki lo chungchâng en infel ni hong tikah khan, ki iamom neh omno chu mu thei zel ni ti. Ki ranhei lâiah bera a vom ni no, kêl angoia ṭial nino neh a ngoia det lok lok nino nî mu kangân chu ki irûkin la be roh,” a ti a.

³⁴Labana khan, “A ṭhat, ni ti lam takah khan ni riseh,” a ti a.

³⁵Nikhomsela, kha nî zela khan Labana khan, kêlchal a ngoia ṭial neh a ngoia det lok lok murdi hei, kêlpui a ngoia rizia neh a ngoia det lok lok murdi, a ngoi iṭang murdihei neh bera a vom murdihei kha â thlei a, a naipahei ân enkol a.

³⁶Jakoba omnaa rithoka sûn thumka lamah ân om a; Jakoba khan Labana ran lôm danghei murdi khah a enkol zui mai a.

³⁷Jakoba khan thingkung rizar chi â êm a lâk a; arkôl a khek inṭial a.

³⁸Kha thingiṭang ai khok inṭialhei khah ran lômhei tui inna rikuang kôlah, an mu thei rangin a sia a, tui iin an hong zoroah khan an rizui ngai sikin ai sia pêk a nit.

³⁹Khanchu, ran lômhei kha irol iṭial ien puma an inrâiin chu a zia ritan hei, a zia ṭial ngûihei, a zia det lok lokhein te an nei ngai a.

⁴⁰Jakoba khan berahei khah kêlhei ata a ranin a sia a, irol iṭial khah Labana kêl â vom murdihei mu rangin a sia a. Khangkah khan ama ta rang kha ân pung a, Labana ta ata kha a ranin a sia mai a.

⁴¹Ran chi ṭhahei khah an rizui fengin irol iṭial kha an mu rangin an tui inna rikuang kôlah khan a sia pêk mai ngai a.

⁴²Khannisela, ran a chi ṭha rak inohei mu ranga khan chu irol iṭial kha seh pêk ngai mak a; khangkan ran ṭha rak inohei murdi khah Labana ta a hong nit tâk a, â ṭha murdi khah Jakoba ta a hong init tâk a nit.

⁴³Jakoba chu natinsat takkan a hong richong tâk a, ran lômhei itam takkah a nei a, isom nupang neh ipahei khom a nei intam a, saringseihei neh sakuartunghei khom a hong nei tâk a.