Read Biete RIPHUTNA 31 Bible Online

RIPHUTNA 31 - Biete bible

RIPHUTNA 31

¹Labana naipahein, “Jakoban kin pa ta murdi khah a lâk pêk riai a, kin pa ta korong kêng ai nit archonhei murdi hih,” an ti thu kha Jakoba khan a lei riat a.

²Labana kha sûn ithleng tâka angkan a chungah ṭha khâi mak iti khom a riat a.

³PUMAPA khan Jakoba ziangah, “Ni chibulhei ramah, ni suapuihei ziangah kîr nôk ta roh, nang ompui mai ki ti,” a ti sa a.

⁴Khanchu, Jakoba khan Rakili neh Leaii khah phûla a ran rual omnaa hong rangin archa a.

⁵An ziangah, “Nin pa mêl ki enin, sûn ithleng tâka angkan ki chungah ṭha khâi mak iti ki riat a; nikhomsela, ki pa Pathian chu ki ziangah a om mai a.

⁶Nin pa sin hih ki thei dôran ki tho iti nangni khomin nin riat a.

⁷Nikhomsela, nin pa hin a ne lêm a, ki lo khom hih voi sôm ikâiin a nen danglam pêk tâk a; khanniseh, Pathianin a ne siat rang khah phal mak a.

⁸Ani khan, ‘A ṭiala ziakâihei khah ni lo nîng a ti,’ a tin ran murdi khan a ṭial ziakâi ngûihein tê an nei a; ‘A zia ritanhei khah ni lo nîng a ti,’ a tin ran murdi khan a zia ritanin tê an nei ngai a.

⁹Khaangkah khan Pathianin nin pa mîringhei kha ne lah pêkin keimah a ne ipêk a nit.

¹⁰“Hingka hin a nit a, mîringhei khah an rizui zoro lâiah khan voikah chu rimang ki nei a, ker mangah khan ki hang tang a, apui izuitu achalhei khah a zia ritanhei, a zia kâihei, a zia ṭial ivâr lok lokhei korong an nit iti ki mu a.

¹¹Ker mangah khan Pathian Vântirtônin, ‘Jakob,’ a ti a. Keiman ‘Hin ki om,’ ki ti a.

¹²Ani khan, ‘Hang tang inla, en roh, apui izuitu achalhei murdi soh, a zia ritanhei, a zia ṭial ngûihei, a zia kâi ngûihei korong an nit soh. Labanan ni chunga a sintho murdi hih ki mu riai sikin songka son thil ai om a nit.

¹³Bethela ni lungphun siriak ni buak a, ki ziangah ṭong nen kung a, kha Bethela ni zianga inlâr Pathian kha ki nit. Atûnah hin thoi inla, hi ram ata hih suak inla, nen siangna ramah khan kîr nôk ta roh,’ a ne iti a nit,” a ti a.

¹⁴Rakili neh Leaii khan Jakoba khah an sâm a, a ziangah, “Kin pa inah khan kin rang dongtum richon rikhôm rang ilua a la om im a?

¹⁵Ani khan mikhual angka paiin a ne irngai tâk ni mak im a? A ne zuar a, kin manhei lak khom ai fâk zoi tâk a nit a.

¹⁶Pathianin kin pa ziang ata richon ai lâk pêk murdi khah keimani neh kin naihei dongtum rang pial a nit hih. Khasika khan atûn chu Pathianin ni zianga ai ti murdi chu tho roh,” an ti a.

¹⁷Khanchu, Jakoba khah a thoi a, a naipahei neh a nupuihei chu saringsei chungah ân chuang a.

¹⁸a ran murdihei a hôl a, a thil nei murdi, Mesopotamia ramah a om sunga a thil nei murdihei kha a chôi a, Kanan ram, a pa Isaka omna rama fe rangin arthok tâk a.

¹⁹Kha lâiah khan Labana kha a bera mul ivoi ranga a fe kâr a nit a, Rakili khan a pa insung pathian rilimhei kha â rûk[61] pêk a.

²⁰Jakoba khom khan Suria mi Labana kha a thlip a, a riat no kârin idâirekkan ai fe pat a nit.

²¹Khanchu, ai nei murdi neh khan a rot tâk a; Eufratis vadung kha arkan a, Gilead tlâng ram kha ipanin a fe tâk a.

²²Sûn thumka nungah khan Jakoba a rot iti thu kha Labana an iril a.

²³Khanchu, a suapuihei a ṭhui a, sûn sarika sung arzûl a; Gilead tlângramah khan a va môk tâk a.

²⁴Kha zânah khan Suria mi Labana rimangah Pathian a zuang a, “Jakoba ziangah â sia â ṭha îte ti loi rangin ridîn roh,” a ti a.

²⁵Labanan a hang môk phâk lâiah khan Jakoba khan a puan in chu itlângah khan a lei dâng tâk a; Labana neh a suapuihei khom khan Gilead tlâng ngirah khan an dâng sa tâk a.

²⁶Labana khan Jakoba ziangah, “Ni sintho hih ingka tliam ai nit hi, ithôm ni ne ilêm a, chemsen râlman angkana ki nainuhei nî ṭhui tâk hi?

²⁷Ithôm ni ne lêm a, ne ril loi a, idâirekka lâizâm siat nî tho tâk hi? Ni ne îril ni sela chu khuanghei, perkhuanghei neh râiifân takkan nang ki îthla rang pial.

²⁸Ki tuhei neh ki nainuhei tak khom nen riam rang phal mak che a; ni sintho hih intlo sin kêng ai nit.

²⁹Nang iseh thei kêng kî nit; nikhomsela, ni pa Pathian khan zâninah khan, ‘Jakoba ziangah â sia â ṭha îte ti loi rangin ridîn roh,’ itin a ne isôn a nit.

³⁰Ni pa insung ner ngai tak tak a, â fe ni nuam tak tak tâk iti ki riat; nikhomsela, itho sikin im ki insung pathianhei ten ni îrûk hih?” a ti a.

³¹Jakoba khan a sâm a, “Ni nainuhei hih ne sut ni ti iti ki ṭi sika a nit.

³²Nikhomsela, ni insung pathianhei kha chu kin lâiah tukhom â kol an om a, ni mu suakin chu ithat ni riseh. Hin ei suapuihei mitmu ngêiah hin, îkhom ni ta nî mu kah chu la riai roh,” a ti a. Jakoba khan Rakilin a lei irûk iti ai riat ino a nit.

³³Labana khan Jakoba puan in khah a lût masa tak a, Leaii puan in neh an bôinu inikahei puan inhei khom kha a lût a; nikhomsela, mu mak a. Leaii puan in ata khah a suak a, Rakili puan inah khan a lût nôk a.

³⁴Rakili khan insung pathianhei khah a lei lâk a, saringsei thlukthla lâiah a lei thup a, a lei iṭhung de a. Labana khan a puan insung murdi khah a va mai vang a; nikhomsela, mu mak a.

³⁵Rakili khan a pa ziangah, “Ni makungah ki thoi thei no sikah hin, ki rêngpa ni ning inthik no roh; nupang balam chu ki chungah a om lâi tak a nit,” a ti a. Labana khan a thei dôrah a zong a; nikhomsela, insung pathianhei rilim khah mu zoi khâi mak a.

³⁶Khanungchu, Jakoba khah Labana chungah khan a ning a thik a, Labana khah a ngo a, “Im ki siatna, îm kî thonsuala ni ne hong irzûl hih?

³⁷Ki neinun murdi ne mai vang a, ni insung neinun rêng rêng im ni mu a? Ni mu a nitin chu ki mihei neh ni mihei mitmuah hin hong seh roh; ei ni ruai hih tûm â dik ual anni hin rêl riseh.

³⁸Kum sôminikah ni zianga ki om sungah khan ni berapuihei neh ni kêlpuihei khan naisiat pai ngai mak a, ni bera lôm lâia achalhei lak khom fah ngai mang a.

³⁹Ramsa isêhei khom ni ziangah hong ithlun loiin, keiman ken rithûl ngai a. Sûna mi îrûk manih, zâna mi îrûk manih khom armang rêng rêng ni nen thung riai ngai a.

⁴⁰Voi itam takkah sûnah nîsa lum ki tuang a, zânah idâiin a ne sôm a; in thei loiin ki om ngai a.

⁴¹Khangkah khan kha kum sôminika sung khah ni inah kî om a nit. Ni nainuhei ruai ilon kum sômlei kum ilikah ni sin ki tho a, kum irukkah ni ran ilon ni sin ki tho nôk a; ki lo lak chu voi sôm ikâiin nen danglam a.

⁴²Ki pahei Pathian, Abrahama Pathian neh Isaka Iṭi Pathian kha ki ziangah omno vâng sela chu atûn khomah hin kut korong ringotin ni ne înfe ngêt rang a nit hih. Pathianin ki dengtheizia neh ki sin sôlzia khah a mu a, zâninah khan ni riat rangin ki thu a lei irêl infel a nit khah,” a ti a.

⁴³Labana khan Jakoba kha a sâm a, “Nupanghei hih ki nainuhei an nit a, an naihei khom keima ta an nit a, ran lômhei khom hih keima ta an nit, dân takin chu nî mu murdi hih keima ta korong an la nit. Nikhomsela vuanah hin ki nainuhei neh an naihei chungah hin im itho thei ki nei khâi a.

⁴⁴Tho ta, eini ruai hih, ei kârah hin thuthlung lei siam rei; lung bûm inpông ei ta, amakhah keimah neh nangma kâra riatpuina risin ni riseh,” a ti a.

⁴⁵Khanchu, Jakoba khan lung a lâk a, riatlengna lungphunin a phun a.

⁴⁶Jakoba khan a mihei khah, “Lung hong bûm unla, inrichuan rei,” a ti a. Khanungchu, lung richuan kôla khan bu an nêk tâk a.

⁴⁷Labana khan kha lung richuan khah Jegarsahadutha[62] a be a; Jakoba khan chu Galeed[63] a be a.

⁴⁸Labana khan Jakoba ziangah, “Hi lung richuan hih vuaninta rithoka hin keimah neh nangma kâra riatpuina risin a nit hih,” a ti a. Khasika khan kha mun riming khah Galeed an ibe tâk a nit.

⁴⁹Kha mun riming khah Mizpa[64] khom an ti sa a. Labana khan “Inṭhena ei om tik khomin PUMAPA khan ne vêng seng seng mai riseh.

⁵⁰Ki nainuhei hih deng nen thei a, ki nainuhei nino nupui dang ni neia a nitin chu tutên ne ril no khom sela, Pathian chu keimah neh nangma kâra thuretu a nit, iti remai roh,” a ti a.

⁵¹Labana ngir khan Jakoba ziangah, “Hi lung richuan hih riatmaina lung a nit, keimah neh nangma kârah hi lung hih kî phun a nit hih.

⁵²Hi lung richuan neh lungphun hi nang risualpui rangin hong khêl no ning iti neh nang khomin ner sualpui rangin hi lung richuan neh hi lungphun ikhêlin ki ziang tiang hong no tin e, iti riatlengna ni riseh.

⁵³Abrahama Pathian, Nahora Pathian, an pa Pathian khan ei kâra thu chu ngaitua riseh,” a ti a. Khanchu, Jakoba khan Pathian a pa Isaka Iṭia riming ichingin vâni arsâm tâk a.

⁵⁴Jakoban itlângah khan ribôlna a lan a, a mihei khah bu ne rangin a koi bûm a; khanchu, bu an nêk zoiin chu itlângah khan an riak tâk a.

⁵⁵Atûk zîng takah khan Labana chu a thoi a, a tûhei neh a nainuhei khah â riam a, ṭhat a vur a; khanungchu, a omna tiang a kîr nôk tâk a.