Read Biete RIPHUTNA 32 Bible Online

RIPHUTNA 32 - Biete bible

RIPHUTNA 32

¹Jakoba chu a fe thiai mai a, Pathian Vântirtônhei khan an lei ritongpui a.

²Anni khah a mun chu Jakoba khan, “Hi mun hih Pathian sipaihei riabuk a nit ngêt hih,” a ti a; khanchu, kha mun rimingah khan Mahanaim[65] a be a.

³A u Esauva kha Edom ramah a om a, Jakoba khan a matonah mi a tir a.

⁴Hingka hin thu archa a, “Ki rêngpa Esauva ziangah khan hingkan nin ti rang a nit, ‘Ni suak Jakoban hingka hin ai ti a nit: Labana ziangah khan ki hang om a; atûn tenan a ne la îtûk mai a nit.

⁵Sialhei, sakuartunghei, berahei, kêlhei, isom ipahei neh nupanghei ki nei tâk a. Ni mit ki tlung itûngin ki rêngpa ziangah ki thurchi ril rangin mi ki hong itir masa a nit,’ ti rei,” a ti a.

⁶A mi tirhei khah an hong kîr nôk a, Jakoba ziangah, “Ni u Esauva ziangah kin va tlung a, mi rizalikah hong iṭhuiin nang ritongpui rangin a lei ihong thiai tâk a nit,” itin an iril a.

⁷Khanungchu, Jakoba khan a ṭi a, â lung a dong tak tak a. Khanchu, a zianga mi omhei, a berahei, a kêlhei, a sialhei, a saringseihei khah lôm inikan a ṭhen a.

⁸“Esauva khah a hong a, lôm khatkah a that khom a, lôm khatkah kha chu la zôk thei an ti,” a ti a.

⁹Khanungchu, Jakoba khan, “O PUMAPA, ki pu Abrahama Pathian, ki pa Isaka Pathian, ‘Nin ramah, nen zirpuihei ziangah kîr nôk ta roh; khanchu, nang siam inlian ki ti,’ ni ne ti a.

¹⁰Ni suak chunga lungkhamlianna ni înlang murdi neh iamomna ni înlang murdihei lâia hin, â chîntak khom hih dong inrup ni mang e; hi Jordan dung hih ke rol neh ringot ker kan a; atûn chu lôm inika ṭhen inrupin ki hong ikîr tâk a nit hih.

¹¹Lung nen kham inla, ki u kut ata, ki u Esauva kut ata hih nen zôk roh; a nit non chu nunai rêngka a ne hong ithat rang hih kî ṭi a nit.

¹²Nangman, ‘Nang siam inlian ki ta, tuikhangliana ṭiai tep zoi loi dôra tamin ner chihei chu siam ki ti,’ ni ti a,” a ti a.

¹³Khanchu, kha munah khan zân a riak a; a mîringhei lâia rithokin a u Esauva pe rang arthlang suak a: kêlpui rizanikah neh kêlchal sôminikah, berapui rizanikah neh berachal sôminikah, saringsei dût sôm lâi sômithumkah neh atehei, sialpui sômilikah neh sechal sômkah, sakuartungpui sôminikah neh sakuartungchal sômkah a khâi inran a.

¹⁶Khahei khah lôm tin a ran chitin a suakhei ân hôl a; an ziangah khan, “Ki matonah lei fe unla, lôm tin hih a kâr iom chitin hôl rei,” a ti a.

¹⁷A lôm masa tak ihôltu ziangah khan, “Ki u Esauva khan nang a lei tong a, ‘Tu mi neh sa tak im nî nit, taktianga fe rang im? Ni ran hôlhei hih tu ta tak im an init?’ itia nang ardonin chu,

¹⁸‘Ni suak Jakoba ta a nit; A pu Esauva ranga lomana peh ranga a ne înhôl a nit hih; ani khom kin inungah son a hong,’ ti roh dua,” a ti a.

¹⁹Khangkah ngirah khan lôm â nikna hôltu khom kha he a be a, â thumna pu neh ran lôm dang ihôltu murdi khom he a be chit a, “Khangkah takah khan Esauva nin mu tikin chu nin ti rang a nit.

²⁰Khapenah, ‘Ni suak Jakoba khom kin inungah son a hong,’ nin ti sa ngêt rang a nit,” a ti a. Jakoba khan, “Thilpêkheiah hin a lungril indam ki ta; khanchu, amah ki mu tenan ne ngaidam ngêt a ti,” a ti a.

²¹A thilpêkhei khah ân fe masa a; kha zânah khan ani chu riabukah khan a riak a.

²²Kha zân ngirah khan a thoi a, a nupuihei ruai neh a bôinuhei ruai kha a nai sômleikhatkahei neh khan a ṭhui a, Jabok vadung khah ân rikan tâk a.

²³Anni khah varâl â khâi zoiin chu ai nei murdi khom varâl â khâi sa riai a.

²⁴Nikhomsela, ani chu a khât bangin nungah a la om a. Khanungchu, mi khatkan khovâr idênin arbuanpui a.

²⁵Khanchu, mi khan Jakoba kha â ne khâi no ti a riatin chu â khelru rizomna khah â met pêk a, an ribuanaah khan Jakoba khelru rizomna khah a hong riphêt tâk a.

²⁶Mi khan, “Ne thla roh, khua khom â vâr rang tâk kêng,” a ti a. Jakoba khan, “Ṭhat ni ne vur mâkah chu nang ithla no ning e,” a ti a.

²⁷Ani khan, “Im ner ming?” a ti a. “Jakoba” a ti a.

²⁸Mi khan, “Ner ming chu Jakoba nang ti khâi no nih. Pathian neh miriam ner buanpui a, ne nê tâk sikin Israela[66] nang ti tâng an ti,” a ti a.

²⁹Jakoba khan, “Ringaiihoi takkan ner ming ne ril roh,” a ti a. Nikhomsela, ani khan, “Îtho rang im ker ming ni ne irdon hih?” a ti a. Khanungchu Jakoba khah ṭhat a vur a, a mâk tâk a.

³⁰Jakoba khan kha mun riminga khan Peniel[67] a be a, “Pathian chu mâi ritongin ki mu a; nikhomsela, ki ringna hih izua a lai nit hih,” a ti a.

³¹Peniel a mâk tenan chu inî a hong suak tâk a, ani chu â khelru sikah khan a hong ibâi tâk a.

³²Khasikin, atûn tenan Israela richihei khan khelru rizomna taka ritharui iom hih fah ngai mak, Jakoba khelru richinna taka ritharui khah a tôn pêk sika a nit.