Read Biete RIPHUTNA 33 Bible Online

RIPHUTNA 33 - Biete bible

RIPHUTNA 33

¹Jakoba kha a hang tang a, a hang enin chu Esauva neh a mi ṭhui rizalikahei kha a mu a. Khanchu, a naihei khah an nuhei chit, Leaii hei, Rakili hei neh a thâikêm inikahei ruai ziangah khan ân om a.

²A thâikêmhei neh an naihei khah tongtîr takah ân fe a, Leaii neh a naihei khah â niknaah ân fe a, Rakili neh Josefa khah a nungkhôn takah ân fe a.

³Amah Jakoba khah an maton taka a fe a, a u kôl a tlung rangin chu voi sarikah rinênga bokin a u khah chibai a bûk a.

⁴Khanchu, Esauva khah ama don rangin a hong itlân a, â kua a, â riam a; an ruaikan an ṭap tâk a.

⁵Esauva khah a hang tang a, nupanghei neh naipanghei khah a mun chu Jakoba ziangah, “Ni hong iṭhuihei soh tuhei im an init?” a ti a. Ani khan, “Pathianin lungkham takka ni suak ai pêk naipanghei an nit soh,” a ti a.

⁶Khanungchu, thâikêmhei kha an naihei neh an hong a, Esauva makungah khan an ikhûn a, chibai an bûk a.

⁷Kha nung Leaii neh a naihei kha an hong a, a makungah an ikhûn a, chibai an bûk a; a nungkhôn takah khan Josefa neh Rakili kha an hong a, an ikhûn a, chibai an hong bûk sa a.

⁸Esauva khan, “Ran lôm kî tong itam takkahei khah îrang im ai nit tâk?” itin ardon a. Jakoba khan a sâm a, “Ki rêngpa, ni mit ki tlung theina ranga kî ti a nit,” a ti a.

⁹Nikhomsela, Esauva khan, “Kei khomin ki nei intam, ki unaipa, nî nei murdi chu ni ta ni riseh,” a ti a.

¹⁰Jakoba khan, “Khangkan ni mak, ni mit ki tlungin chu ringaiihoi takkan ki loman nang pêk khah nê ham pêk roh. Keima rangin chu ni mêl imu hih Pathian mêl imu angka a nit a, atûnah hin nangman iṭha takkan ni ne lei lôm tâk a.

¹¹Ringaiihoi takkan ki thil nang pêk hih nê ham pêk roh, Pathianin lung a nen kham a, kî nang murdi a ne ipêk a nit,” a ti a. Jakoba khan â thlêm ngit sikin Esauva khan â ham tâk a.

¹²Esauva khan, “Tho, fe tâng ei ti, keiman ma iruai ki ti,” a ti a.

¹³Nikhomsela, Jakoba khan a ziangah, “Naipanghei hih an la chîn a; khabanah, bera neh ran danghei khom hih ate ṭhui an nit iti ki rêngpa hin ni riat a, sûnkah khom hôl inrât raiin chu an ithi rang a nit.

¹⁴Khasikin, ki rêngpa, ringaiihoi takkan ni suak matonah hin lei fen la; kei chu zâm zâmkan naipanghei neh ran lômhei lôn thei dôr dôran hong ituang zâm thiaiin Edom rama Seir tlângah ni ziangah la hong rong,” a ti a.

¹⁵Esauva khan, “Ki zuangpui mi ṭhenkahei ilua hih nang lei mah pêk rong,” a ti a. Nikhomsela, Jakoba khan, “Amakha chu nang ual no nih, ki rêngpa ditsakna ringot hih idong kî nuam a nit,” a ti a.

¹⁶Khanchu, Esauva chu kha nî sûnah khan Edom rama Seir tlâng ipanin a kîr nôk tâk a.

¹⁷Nikhomsela, Jakoba chu Sokot[68] munah a fe a, amakhan in a sin a, a ranhei omna rang khom dângdi a sin pêk a. Khasika khan kha mun riming khah Sokot ibe ai nit tâk a nit.

¹⁸Mesopotamia rama rithoka khan Jakoba chu Kanan ram Sekem[69] khua kha idam takkan a hong tlung a. Kha khua dâikungah khan ommun a khuar tâk a.

¹⁹Kha ommun a khuarna mun khah tangka sekel rizakan Sekema pa Hamora richihei zianga rithokin archôk a.

²⁰Kha munah khan mâichâm a siam a, armingah khan El-elohe-Israel[70] itin a be a.