Read Biete RIPHUTNA 35 Bible Online

RIPHUTNA 35 - Biete bible

RIPHUTNA 35

¹Pathianin Jakoba ziangah khan, “Thoi inla, Bethelah fen la, amakhan om roh; ni u Esauva ziang ata lâizâm ni tho lâia ni zianga inlâr Pathian rangah khan mâichâm siam roh,” a ti a.

²Khanchu, Jakoba khan a insungkuahei neh a zianga om murdihei ziangah khan, “Ram dang pathian nin idônhei khah pai riai rei. Rithâr rithiang unla, nin silbom ifâihei ihâk rei.

³Hi mun hih iman Bethelah ei ife rang a nit; ki lungdong lâia ne donsui a, ki fena tina ki zianga om mai Pathian rangah khan mâichâm kî siam rang a nit,” a ti a.

⁴Khanchu, ram dang pathian an kuta om murdi khah Jakoba an pêk a, an ikuara kuarbet an ibet murdi khom an pêk a; Jakoba khan Sekem kho kôla saso kung thuaiah khan a phûm tâk a.

⁵Jakoba neh a naipahei kha an rithok lâiah khan kha khua vêla om mihei chu Pathiana rithoka ṭina natinsat takin a zuang man tâk a; khanchu, anni khah rizûl khâi mak a.

⁶Khanchu, Jakoba khan Kanan ram Luz khua an iti ngai Bethel khah a mihei neh khan an tlung a.

⁷Amakhan mâichâm a siam a, a u ziang ata lâizâm a tho lâiah khan kha munah khan Pathian a ziangah a zuang inlâr sikin kha mun khah El-Bethel[72] ai be a nit.

⁸Rebeki dontu Debori khah a thi a, Bethel sim tianga saso kung thuaiah khan an phûm a; khasika khan kha mun riming khah Alon-bakut[73] an iti tâk a nit.

⁹Jakoba khan Mesopotamia rama rithoka a hong kîr nôkah khan a ziangah Pathian ân lâr nôk a, ṭhat a vur a.

¹⁰Pathian khan a ziangah, “Ner ming hih Jakoba a nit a; nikhomsela, atûna rithokin chu Jakoba nang ti khâi no ni a, ner ming chu Israela ai nit rang tâk a nit,” a ti a. Khanchu, arming khah Israela iti a nit tâk a.

¹¹Pathian ngirin a ziangah, “Keimah, El-Sadaia (Pathian Tinrêngthotheia) ki nit. Richi itam takka neiin hong pung roh; nam dang dang itam takkah nangma rithokin la hong om an ta, ni ṭhâlbea rithokin rênghei khom la hong suak an ti.

¹²Abrahama neh Isaka kî pêk ram hih nang pêng ki ta, ne nunga ner chi suanpâr la hong iomhei rangin hi ram hih nang kî pêk a nit,” a ti a.

¹³Khanungchu, amah â sônna mun ata khah Pathian khan Jakoba khah a mâk tâk a.

¹⁴Pathianin â sônna munah khan Jakoban riatlengna lung a phun a; a chungah khan uain neh oliv riak ibuakin a thâr tâk a.

¹⁵Khanchu, Jakoba khan kha mun riminga khan Bethel a be tâk a.

¹⁶Jakoba neh a insungmihei khah Bethela rithoka khan an fe nôk a; Efratha khua an tlung rangtoah khan Rakili khah nai nei zoron a hong de a, naihan a sê tâk a.

¹⁷Naihan a sê inrik lâiah khan mi nai innei ngai nu khan, “Ṭi no roh; naipa dang nî nei a nit hih,” a ti a.

¹⁸Nikhomsela, ani chu ithi rangin a om tâk a, a thi rangtoah khan a naipa riming kha Benoni[74] a sak a. A pa khan chu Benjamina[75] a sak a.

¹⁹Rakili khah a thi a, Efratha lampuiah khan an phûm a, Efratha khua khah Bethlehem khua an iti tâk hi a nit.

²⁰Â thlânah khan Jakoban lung a phun a; amakhah atûn tenan Rakili thlânah khan a lai om a nit.

²¹Israela kha a fe thiai mai a, Mig-dal-eder[76] khêlah khan ommun a khuar tâk a.

²²Kha ramah a om lâiah khan Reubena khan a pa thâikêm Bilhaii khah a zâlpui a; Israela khan amakhah a lei riat a, a ning a thik tak tak a. Jakoba khan naipa sômleiinikah a nei a.

²³Leaii naihei: Reubena (Jakoba nai lutîr), Simeona, Levia, Juda, Isakara, Zebuluna hei an nit.

²⁴Rakili naihei: Josefa neh Benjamina an nit.

²⁵Rakili somnu Bilhaii naihei: Dana neh Naftalia an nit.

²⁶Leaii somnu Zilpaii naihei: Gada neh Asera an nit. Khahei khah Jakoba naihei, Mesopotamia ramah a om lâia suakhei chu an nit.

²⁷Kiriat-arba, Hebron an iti tâk rama Mamre khua, a pa Isaka omna kha Jakoba khan a tlung tâk a. Kha mun khah a nit Abrahama neh Isaka lei omna mun chu.

²⁸Isaka chu kum rizalei sômiriatka ulian a nit a.

²⁹Isaka khah ulian ok tarkûla damin a thi a, a chipuihei ziangah iṭhuiin a om tâk a; khanchu, a naipa Esauva neh Jakoba khan an phûm tâk a.