Read Biete RIPHUTNA 38 Bible Online

RIPHUTNA 38 - Biete bible

RIPHUTNA 38

¹Kha lâiah khan Juda khah a urênghei ziang ata a suak a, Adulam mi khatkah arming Hira kha arbêl a.

²Kha munah khan Juda khan Kanan mi khatkah arming Shea nainu a mu a; ani khah nupuiin a nei a.

³Nai a vong a, naiipa a nei pêk a; Juda khan a nai riming kha Era a sak a.

⁴Nai a vong nôk a, naiipa ngir a nei nôk a; a nu khan a nai riming kha Onana a sak a.

⁵Naiipa dang a nei nôk a, arming kha Sela a sak a; kha an nai khah an nei lâiah khan Juda chu Khezib khuaah a om a.

⁶Juda khan a nai lutîr Era khah nupui Tamari ân nei a.

⁷Era khah PUMAPA mitmun mi sual tak a nit a; PUMAPA khan ani kha a that tâk a.

⁸Juda khan Onana ziangah, “Ni u nupui chu zâlpui inla, a pasal unai sintum khah sin pêk inla, ni u ranga khan richi nei pêk roh,” a ti a.

⁹Nikhomsela, Onana khan chi a tlâk rang kha ama ta ai nit ino rang a nit iti a riat a; khanchu, a u nupui a zâlpui ikipah, a u rang richi a nei pêk nona rangin chi khah rinêngah khan â ṭhul ngai a.

¹⁰A thil tho dân khah PUMAPA mitmuah khan isual tak a nit a; khanchu, ani khom khah a that tâk a.

¹¹Khanungchu, Juda khan â moinu Tamari ziangah khan, “Ki naipa Sela hih a puitling mâkah chu ni pa in tiang pasal nei loiin lei va om hi roh dua,” a ti a. Sela khom kha a ûhei angkan a thi nôk duai lôiin iti a ṭi sika ai ti a nit. Khanchu, Tamari khah a pa in tiang a va om tâk a.

¹²Nakanah chu Shea nainu Juda nupui khah a thi a. Lusûn zoro sung a hong hekin chu a malpa Adulam mi Hira neh khan Juda kha Timna khuaah a bera mul ivoi an va fe a.

¹³Mîn Tamari khah “Ni pu chu a bera mul ivoi rangin Timna khuaah fêng a ti,” itin an iril a.

¹⁴Khanchu, ani khan a pasal sûnna silbomhei khah a khek a, mâirikhûna puan a khuma artuam khap a, Timna khua lampuia Enam khua kul kotsuaah khan a lei iṭhung a. Juda nai ithlum tak Sela khom khah a puitling tâk a; nikhomsela, a pa khan a nupui rangin a înnei nuam khâi ino a nit iti Tamari khan ai riat a nit.

¹⁵Juda khan ani khah a mu a, a mâi arkhû khap sikin nochizuar manih a sôn a.

¹⁶Khanchu, lam sîra nupang tiang khah a pan a, a ziangah, “Tho, ringaiihoi takkan mun kan lei zâl rei,” a ti a; â moinu a nit iti lak reh viat mak a. Ani khan “Ni ne zâlpuiin im ni ne pêk rang?” a ti a.

¹⁷Ani khan, “Ki ran lôm lâia kêl tete nang thon ki ti,” a ti a. Ani khan, “Amakhah ni hong thon ma lei khapna rang khâmna im manih chu ni ne pêk rang a nit?” a ti a.

¹⁸Ani khan, “Khâmna rang im nang ki pêk rang?” a ti a. Ani khan, “Ner ming namna neh a rui neh ne rol chôi khah,” a ti a. Khanchu a pêk a, a zâlpui a, nai a hong vong tâk a.

¹⁹Khanungchu, Tamari khah a inah a kîr nôk a, a mâi rikhûna puan khah a lîp a, a lusûn silbomhei khah arbel nôk tâk a.

²⁰Juda khan a khâmna thil khah la kîr rangin a malpa Adulam mi Hira kha kêl tete inchôiin a tir a; nikhomsela, ani khah va mu zoi khâi mak a.

²¹Khanchu, nupangnu omna muna mihei ziangah khan, “Enaim lam sîr a nochizuar iom khah taktiang im ai om tâk?” itin ardon a. Anni khan, “Nochizuar rêng rêng hin omak e,” an ti a.

²²Juda ziangah khan a kîr nôk a, “Ani khah va mu zoi mang e. A muna mihei khomin, ‘Nochizuar rêng rêng hin om ngai mak e,’ an ti,” a ti a.

²³Juda khan, “Khâmna thil kha chu nei thal ta riseh, khanonchu, kî mualinphoi rang kêng. En ta, keiman chu ken kung lam angkan kêl tete ki thon lakin ani khah va mu zoi khâi mak che a,” a ti a.

²⁴Thla thumkah vêl nungah khan mihein Juda khah, “Ne moinu Tamari khan om insual a tho a, zâinai a vong,” itin an iril a. Juda khan, “Ṭhui suak unla, hâl that rei,” a ti a.

²⁵An ṭhui suakin chu Tamari khan a tarpu ziangah thu a thon a, “Hi thil ineitu ata hih a nit, nai kî vong; ringaiihoi takkan hi riming namna hei, a rui hei, irol hei hih tu ta tak im ai nit, en infel roh,” a ti a.

²⁶Khanungchu, Juda khan kha thilhei khah a ta a nit iti a lei riat a, “Ani khah keima nêkan ai fel ual a nit; ki naipa Sela lak innei khâi mang a,” a ti a. Juda khan ani chu zâlpui nôk tlak khâi ngai mak e.

²⁷A nai nei zoro a hong nitin chu a sûlah khan nai inphîr a lei ivong a nit a.

²⁸Naihân a sê lâiah khan khatka kut a zuang intôt a; khanchu mi nai innei ngai nu khan, “Amahih â suak masa rang a nit hih,” itin a man a, a kuta khan pat sen ân bun a.

²⁹Nikhomsela, a kut khah a tlum nôk a, ân phîrpui dang khah a zuang suak tâk a; khanungchu, mi nai innei ngai nu khan, “Nangma thun ni zuang isuak a nit hi te na!” a ti a. Khasikin arming kha Pereza an sak a.

³⁰Kha nungah khan ân phîrpuipu, a kuta pat sen ibun kha a zuang suak nôk a; arming kha Zera an sak a.