Read Biete RIPHUTNA 4 Bible Online

RIPHUTNA 4 - Biete bible

RIPHUTNA 4

¹Adama[10] khan a nupui Evi kha a pôl a; khanchu, Evi khan nai a vong a, naiipa a neia, “PUMAPA iṭangpuiin naiipa kî nei tâk a nit” a ti a. Khanchu, arming Kaina a sak a.

²Khanungah khan naiipa ngir Abela a nei nôk a. Abela khah bera vâitun a om a, Kaina khah chu loisin ithotun a om tâk a.

³A nakana chu Kaina khan PUMAPA zianga lan rang a loia chimu vâng ithar khah a hong chôi a.

⁴Abela khom khan a bera lôm lâia suak masa kha a hong chôi a, a that a, a satak iṭhahei khah thillanin a pêk a. PUMAPA khan Abela neh a thillan khah a lôm a.

⁵Nikhomsela, Kaina neh a thillan khah chu lôm mak a. Kaina khah a ning a thik ok a, a mâi khah a hong duk zap tâk a.

⁶PUMAPA khan Kaina ziangah khan, “Ithôm ning ni înthik? Ithôm ni mâi ai duk zap tâk?

⁷Thil ni thon ṭhatin chu nang kî lôm[11] ngêt rang a nit; nikhomsela, ni thôn ṭhat no sikah khan sual khah ni inkot bulah a îbok ṭian mai a nit. Ani khan ni chungah thu nei ai nuam a nit; khanniseh, nangman a chungah thu ni nei ngêt rang a nit,” a ti a.

⁸Khanungchu, Kaina khan a unaipa Abela ziangah, “Tho loiah lei fe rei,” a ti a. Loiah an om tenan chu Kaina khan a unaipa Abela khah arsualpui a, a that tâk a.

⁹Khanchu, PUMAPA khan Kaina ziangah khan, “Ni unai Abela khah taktiang im ai om tâk?” a ti a. Ani khan, “Reh mang e. Ki unaipa enkoltu ki nit im a?” a ti a.

¹⁰PUMAPA khan, “Ithôm hi thil ṭhano hih nî tho tâk? Phuba la pêk ranga koina rôl irî angkan ni unaipa thisen ikhêk khan rinênga rithokin a ne isam sôn mak chêm.

¹¹Khasikin, ni kut ata ni unaipa thisen lei idongtu rinêng ata hih vânisal ni nit tâk.

¹²Rinêngah loi ni tho khomin a ṭhatna chu nang peh khâi no nia; rinêng a hin ilêng ivâi hong ni tâng ni ti,” a ti a.

¹³Kaina khan PUMAPA ziangah, “Ni nen tuangna hih a natinsat rai a, tuang zoi no ning e.

¹⁴Hi ram ata ni ne ûmisua tâk a, nangma mitmua rithokin ni ne khâi pai tâk a; rinêng chungah hin mi vâi mi lêng ki hong init rang tâk a nit a, tukhom ne mu kangânin chu an ne ithat rang a nit,” a ti a.

¹⁵Khannisela, PUMAPA khan a ziangah, “Nang that no nih. Tukhom nang ithat tak chu a bâk sarikan a chungah phuba la nîng a ti,” a ti a. Min an mua amah an that nona rangin PUMAPA khan Kaina chungah khan risin a sia a.

¹⁶Khanchu, Kaina khah PUMAPA mitmu a rithokin a rot a, Eden sua lam tianga Nod [12] ramah khan a om tâk a.

¹⁷Kaina neh a nupui khan naiipa Enoka an nei a. Khanungchu, Kaina khan khua a siam a, a khua rimingah khan a naipa riming inpêlin Enok a be a.

¹⁸Enoka khan naiipa Irada a nei a; Irada khan Mehujaela a nei a; Mehujaela khan Methusaela a nei a, Methusaela khan Lameka a nei a.

¹⁹Lameka khan nupui inikah Adaii neh Zillaii a nei a.

²⁰Adaii khan Jabala a nei a; ani khah puan ina om a, ran ivâi ngaihei chibul a nit.

²¹A unaipa khah Jubala a nit a; ani khah irîhoi neh perkhuang neh theile tum ngaituhei chibul a nit.

²²Zillaii khom khan Tubal-Kaina a nei a; ani khah dâr neh thîr riamrei tinrêng isiam ngaitu a nit. Tubal-Kaina farnu khah Naamaii a nit.

²³Lameka khan a nupuihei ziangah khan; “Adaii neh Zillaii, Lameka nupuihei o, Ki tiang nin ibeng do unla, Ki ṭong hi ringai rei. Ki chungah kuttum â lek sikin tlangvâl khatkah kî that tâk a nit.

²⁴Kaina phuba lâknan mi sarikah an thi a nitin chu, Lameka phuba lâknan chu mi sômsarika sarikah ithat ni ngêt a ti,” a ti a.

²⁵Adama neh a nupui khan naiipa dang an nei nôk a, arming Setha an sak a, Evi khan, “Kainan ai that tâk Abela rithûlin Pathianin naiipa a ne ipêk nôk tâk a nit,” a ti a.

²⁶Setha khom khan naiipa a hong nei a, arming Enosa a sak a. Hi zoro lâi ata hih a nit, miriamhein PUMAPA[13] riming ichinga chubai iûn an hong iphut tâk chu a nit.