Read Biete RIPHUTNA 41 Bible Online

RIPHUTNA 41 - Biete bible

RIPHUTNA 41

¹Kum inikah a vun nungah khan Faroa khan rimang a phan a. Armangah khan Nail vadung pangah khan a lei iding a.

²Vadunga rithoka khan serâtpui sarikah â ṭha, â tak mut mut hi an hong suak a, vadung rikam lâiluang bilah khan an hong lêng a.

³Kha nungah khan serâtpui dang sarikah inthir fer fer, â kông ngêi ngêi hih vadunga rithok ngirah khan an hong suak nôk a, serâtpui danghei kôla vadung pangah khan an hong iding a.

⁴Serâtpui inthir fer fer, â kông ngêi ngêi hei khan serâtpui dang iṭha tak tak, â tak mut muthei kha an fâk zoi vang tâk a. Faroa khah a ṭhang rak tâk a.

⁵A hang in nôk a, rimang a phan nôk ngir a; bu kung khatkah hin vui sarikah â lian iṭha, â bit tak tak hih a hong suak a.

⁶Kha nungah khan vui sarikah dang a kênda dâr dâr, khosak ithli lum isêm inchâr rim remhei hih an hong suak nôk a.

⁷Bu vui ida dâr dâr tehei khan bu vui ilian tak tak, â ṭha tak tak sarikahei khah an ilem zoi riai a. Khanungchu, Faroa khah a hong ṭhang a; armang phan a nit iti a riat a.

⁸Atûk zîngah khan chu a lungril a buai ok tâk a; khanchu, mi a tir a, Aigupta rama mitvaidôi ithiam murdi neh mi vâr murdi khah a koi bûm a. Faroa khan armang phan khah a lei isîr pêk a; khanniseh tute â rilfia pêk thei zel omak a.

⁹Kha lâi takah khan uain ipe ngai ruaitu tak khan Faroa ziangah, “Vuanah hin ke sualzia ki riat suak tâk.

¹⁰Voikah chu, Faroa khah a suakhei chungah a ning a thik a; khanchu, vêngtu pôl ruaitu inah khan keimah neh ibai isiam ruaitu tak khah a ne khum a.

¹¹Zânkah chu kin ruaikan rimang kin phan seng seng a, omzia dang seng seng inei a nit a.

¹²Kha munah khan kin ziangah vêngtu pôl ruaitu som, Hebrai mi, tlangvâl khatkah a om a. Ani khah kin rimang phan chu kin iril a; khanchu, kin rimanghei khah a ne rilfia pêk a; kin rimang phan lam angka takin a ne irilfia pêk seng seng a nit.

¹³A ne rilfia pêk lam angka takin a hong iom tâk a nit; kei chu ki sin hih ni nen zom nôk a; nikhomsela, ibai isiamtu khah chu ni îkhâi that tâk a nit,” a ti a.

¹⁴Khanungchu, Faroa khan Josefa khah mi ân koi zel a. Khanchu, rimot takkan rip sung ata khah an hong ṭhui suak a. A nermulhei a voi infâi a, a silbomhei a thleng zoiin chu Faroa ziangah a hong rilang tâk a.

¹⁵Faroa khan Josefa ziangah, “Rimang ki phan a, â rilfia thei tute omak a, nangman chu rimang thu khah ni riatin chu ni rilfia thei iti ni thurchi mi îsîr ki lei riat a,” a ti a.

¹⁶Josefa khan Faroa khah a sâm a, “Amakhah keiman chu thei mang e; nikhomsela, Pathianin Faroa rimang kha idik thapkan rilfia pêk a ti,” a ti a.

¹⁷Faroa khan Josefa ziangah, “Ker mangah khan Nail vadung pangah hin ki lei iding a.

¹⁸Serâtpui sarikah â ṭha, â tak mut mut hih vadunga rithoka khan an hong suak a, lâiluang bilah khan an hong lêng a.

¹⁹An inung zelah khan serâtpui dang sarika inthir fer fer, â kông ngêi ngêi hih an hong suak nôk a. Khangkah dôra kông serâtpui kha Aigupta ram pumpui khomah hin ki lai mu ngai ino a nit.

²⁰Serâtpui â kông ngêi ngêi, inthir fer ferhei khan serâtpui, â tak mut mut lei hong suak masahei khah an fâk zoi vang a.

²¹Nikhomsela, an fâk zoi nung khomah khan an fâk iti ireh thei ual ni mak a; a tîra angka khan an la kông fer mai a. Khanchu, ki ṭhang tâk a.

²²Ki hang in nôkin chu rimang ki phan nôk a, bu kung khatkah hin vui sarikah â lian iṭha, â bit tak tak hih a hong suak nôk a.

²³Kha nungah khan bu vui sarikah a kênda dâr dâr, khosak ithli lum isêm inchâr rim remhei hih an hong suak nôk a.

²⁴Bu vui ida dâr dârtehei khan bu vui iṭha tak takhei khah an ilem riain ki mu a. Khante, ker mang khah dôipuhei khah ke sîr pêk a; nikhomsela, nê rilfia pêk thei tute omak e,” a ti a.

²⁵Josefa khan Faroa ziangah, “Faroa rimang hi omzia thumun a nit. Pathianin a thil tho rang khah Faroa a lei înriat a nit hih.

²⁶Serâtpui sarika â ṭha, â tak mut muthei khah kum sarika entîrna a nit a. Bu vui sarika â lian iṭha tak takhei khom khah kum sarika entîrna a nit sa; a omzia chu munkah a nit.

²⁷An inunga serâtpui sarikah inthir fer fer, â kông ngêi ngêi hong isuakhei kha kum sari ṭâm tlâk rang entîrna a nit a, bu vui sarika a kênda dâr dâr, khosak ithli lum isêm inchâr rim remhei khom khah kum sari ṭâmpui tlâk rang entîrna a nit.

²⁸Ni zianga kî ti tâk angka khan, Pathianin a thil tho rang khah nang a lei înriat a nit hih.

²⁹Ringai roh, Aigupta ram pumpuiah bubâl vâng zuak zuak kum, kum sarikah hong tlung a ta.

³⁰Kha rizoiah khan ṭâmpui kum, kum sarikah hong om nôk a ti; khanchu, bubâl vâng zuak zuak kumhei khah Aigupta ramah hin ringil phar ni tâng a ta; ṭâmpui khan ram hih isehchit a ti.

³¹Ṭâmpui khah a natinsat rai sikah khan hi ramah hin fâknêk bei lâi kumhei khah ringil phar tâng an ti.

³²Rimang omzia thumun ṭum inikah ni phanna chu Pathianin kha thil khah ân det a, sôt inoteah a zuang îthlun rang tina a nit.

³³“Khasika khan atûnah hin mi khatka bengivâr tak, mi vâr tak zong suak inla, Aigupta ram chungah hin ruaitun siam roh.

³⁴Khapenah, ruaitu danghei khom phun inla, kum ṭhat kum, kum sarika sungah khan Aigupta rama bu hih mun ringaka ṭhena mun khatkah khah bûm mai riseh.

³⁵Khanchu, anni khan kha kum ṭhat kum hong itlung ranga bu murdi khah bûm khômin Faroa thunuaia om rangin khuaheiah khan bûm sela, vong inṭha khap riseh.

³⁶Khanchu, ṭâmpui sika ram pumpui armang rip nona rangin bu khah ṭâm kum, kum sarikah Aigupta rama hong itlung ranga khan lei inrinna rang nîng a ti,” a ti a.

³⁷Kha thu khah Faroa neh a milianhei murdi khan ṭha an ti lam tak a nit a.

³⁸Khanchu, Faroa khan a milianhei ziangah, “Ani angkana Pathian rithla omna mi hi tute mu khâi no min e,” a ti a.

³⁹Faroa ngir khan Josefa ziangah, “Pathianin khahei murdi khah nang ân riat sikin nangma angkana thil iria neh â vâr tute om no nih.

⁴⁰Nangmah hih ki ram enkoltun nang phun ki ta, ki mipuihei murdi hih ni thu angka takin om an ti. Rêng ṭhungmuna ṭhung thu mâng mânga hin ni nêkan inlal ual ki ti.

⁴¹Atûnah hin Aigupta ram pumpui chungah ruaitun nang kî phun a nit,” a ti a.

⁴²Khanungchu, Faroan a kut ata arming namna kutsabit khah a thuat a, Josefa kutah ân bun a. Puan zâirimia siam zakorfual ân hâk a, rângkachak rithei ân li a.

⁴³A sakor tâli ṭha tak â niknaah khan ân chuang a, a matonah khan, “Rikiang rei, rikiang rei,” itin an ikhêk a. Khangkah khan Josefa khah Aigupta ram pumpui chungah khan ruaitua phun a nit.

⁴⁴Faroa khan Josefa ziangah, “Keimah Faroa ki nit; nikhomsela, nangma thu ni non chu Aigupta ram sungah hin tute an kut manih, an ke manih an ilek rang ni mak,” a ti a.

⁴⁵Faroan Josefa riming kha Zafenat-Panea[80] a be a; Heliopolis khua thiampu Potifara nainu Asenathi[81] khah nupuiin ân nei a. Aigupta ram pumpuiah Josefa kha an riat tâk a.

⁴⁶Josefa khah Aigupta ram rêng Faroa sin a tho phutah khan kum sômithumka mi a nit a. Josefa khah Faroa ziang ata a suak a, Aigupta ram pumpui kha arfang suak tâk a.

⁴⁷Kum ṭhat kum, kum sarika sung kha chu rinêngin itam takkan bu â sua ngai a.

⁴⁸Kha buhei khah Josefan a bûm khôm a, khopuiheiah khan ân pang a; khua tinah khan an kôlvêl loia bu chit khah ân pang a.

⁴⁹Josefa khan bu khah tuipuia ṭiai dôra tamin a buk a, rita zoi zat a nit khâi no sikin rita khom rita khâi mak a.

⁵⁰Ṭâmpui hong tlung maah khan Josefan naipa inikah a nei a, khahei khah Heliopolis khua thiampu Potifara nainu Asenathi khan ai nei pêk a nit.

⁵¹Josefa khan a nai lutîr riming khah Manasea[82] a sak a; “Pathianin ki dengtheina tin tin neh ki pa insunghei murdi khah a ne înringil tâk a nit,” a tina a nit.

⁵²A nai â nikna riming khah Efraima[83] a sak a; “Pathianin ki dengthei tuangna ramah hin richi a ne înpung a nit,” a tina a nit.

⁵³Aigupta rama kum ṭhat kum, kum sarikah hong itlung kha a hong hek tâk a.

⁵⁴Ṭâmpui kum, kum sarikah kha Josefa sîr lam angka takin a hong tlung riphut nôk tâk a; ram tinah iṭâm a hong tlâk tâk a; Aigupta ram pumpuiah khan chu ifah rang a om mai a.

⁵⁵Aigupta rama mi murdi khan an ṭâm kaneh Faroa ziangah ifah rang an ngên tâk a. Khanchu, Faroa khan Aigupta mi murdi ziangah khan, “Josefa ziangah fe unla; nangni a ti lam takkan sin rei,” itin thu a pêk a.

⁵⁶Iṭâm khah rammual pumpuiah khan a hong tlâk tâk a, Aigupta ramah khan iṭâm khah ân rik ual a. Khanchu, Josefa khan fasiar murdi khah â ong a, Aigupta mihei ziangah khan a zuar a.

⁵⁷Rammual pumpuiah iṭâm khah a tlâk natinsat sikin ram tina mihei khah bu richoh rangin Aigupta ramah, Josefa ziangah khan an ihong ngai a nit.