Read Biete RIPHUTNA 42 Bible Online

RIPHUTNA 42 - Biete bible

RIPHUTNA 42

¹Jakoba khan Aigupta ramah bu a om iti a lei riatin chu a naipahei ziangah, “Ithôm nin ir-en ṭian hi?

²Aigupta ramah bu a om iti ki riat a; Bu ngeia ei thi nona rangin zu fe unla, ichînka lua bu zur choh ta rei,” a ti a.

³Khanchu, Josefa urêng sômkahei khah Aigupta ramah bu richoh rangin an zu fe tâk a.

⁴Nikhomsela, Josefa unai Benjamina kha chu a ûhei ziangah khan Jakoban infe sa mak a; tongsual a zu tong duai lôiin ai ti a nit.

⁵Kanan ramah khom iṭâm a tlâk sikin Jakoba naipahei khah mi danghei lâiah khan bu richoh rangin an fe sa tâk a.

⁶Aigupta ram optu khah Josefa a nit a; ani khah a nit rammual pumpuia mi tin tin zianga bu zuar theitu chu a nit. Khanchu, Josefa urênghei khah an hong a, lingisikin ani khah chibai an bûk a.

⁷Josefa khan a ûhei khah a lei mu a, anni khah a lei riat a; nikhomsela, nam dang angkan arsiam a, inrum takkan â sôn a, an ziangah, “Taka rithoka zuang im nin init?” a ti a. Anni khan, “Bu richoh rangin Kanan rama rithoka zuang kin nit,” an ti a.

⁸Josefa khan a urênghei kha a lei riat a; a urênghei khan chu ani khah reh mak a.

⁹Josefa khan anmani chungchâng thu rimanga ai phanhei khah a riat suak a, an ziangah, “Enthlâttuhei nin nit hih; ram inderzia en rangin nin izuang a nit hi teh,” a ti a.

¹⁰Anni khan a ziangah, “Epu, ni mang ung e, ni bôihei hih bu richoh ranga zuang kêng kin init.

¹¹Mi khatka nai korong kin nit; mi dik tak kin nit a, enthlâttuhei ni tlak mang ung e,” an ti a.

¹²Josefa khan an ziangah, “Ôi mang e, ram inderzia en ranga zuang nin nit hih,” a ti a.

¹³Anni khan, “Keini ni bôihei hih urêng sômleiinikah, Kanan rama om mi khatka nai kin nit a; kin ithlum tak chu atûnah hin kin pa ziangah a om a, khatkah chu om khâi mak,” an ti a.

¹⁴Josefa khan an ziangah, “Enthlâttuhei nin nit nangni kî ti kha, nin nit ngêt;

¹⁵Hingka hin ifian nin iom rang a nit; nin ithlum tak kha a zuang non chu Faroa riming ichingin kî ti a nit, hin tak ata hih suak tlak no tin u, nangni ki ti a nit.

¹⁶Nin lâia khatkah tir unla, nin unai khah hang ṭhui riseh, mi dang chu ikhumin nin iom hi rang a nit. Khangkah khan thudik nin ril neh rilno ifian ai om rang a nit. Khanonchu, Faroa riming ichingin kî ti a nit, enthlâttuhei nin nit ngêt,” a ti a.

¹⁷Khanungchu, an rêngkan sûn thumka sung tâng inah a khum tâk a.

¹⁸A sûn thumnîa khan Josefa khan an ziangah, “Pathian iṭi mi ki nit a, ki ti lam angka takah hin tho unla nin ringna izua nîng a ti.

¹⁹Mi dik tak nin nitin chu nin urêng lâia khatkah nin rêngka rithûlin ikhumin om sela; a danghei chu fe unla, nin insungmi iṭâma omhei ranga nin bu richôk khah pêl rei.

²⁰Khanungchu, nin ithlum tak kha ki ziangah nin zuang ṭhui ngêt ngêt rang a nit; khanchu, nin thu khah â dik a nit iti ilang a ta, nangni that no ning e,” a ti a. Khanchu, khangkah khan an tho tâk a.

²¹Anni khan “Ei unaipa chunga ei thil tho khah ei îchâi tak tak a nit hih, lunginkham ranga a ne ngên ngêi ngêi lâia a lungril dengtheizia imu ṭianka ei ingaisak nuam ino kha; khasikin, hi lungdongna hin a ne irkhû tâk a nit hih,” an ti a.

²²Reubena khan, “Naipang chungah thil thonsual no rei, itin nin ziangah ti mang ima? Nin irngai nuam ino a nit khah; khasikin, ringai rei, a thisen phuba khah ei chungah ila ai nit tâk a nit hih,” a ti a.

²³Ṭongilettu manga an irsôn a nit sikin Josefan an thusîr khah a riat riai iti anni khan reh mak a.

²⁴Josefa khan anni khah a mâk a, a va ṭap tâk a. Khante, an ziangah a hong kîr nôk a, anni khah â sôn a, an lâi ata Simeona khah a ranin a ṭhui a, an mitmuah khan a khuap tâk a.

²⁵Josefa khan a urênghei puak chit kha bu insip rang neh an tangkahei khah an puak chita thun pêk nôk rangin thu a pêk a; lampuia an cholam rang khom ân chôi a. Khanchu, khangkah khan an tho pêk tâk a.

²⁶An bu richôk kha an sakuartunghei an inpêl a, khantak ata khah an suak tâk a.

²⁷An lâia khatkah khan an zân riaknaah khan a sakuartung bu pe rangin a puak â ongin chu a puakah khan a tangka khah a mu tâk a.

²⁸Khanchu, a urênghei ziangah khan, “Ki tangka khah an lei ithun nôk a nit hi te; en ta u, ki puakah hin a lei om a,” a ti a. An lungril a ṭhông rak a, inthing pumin, “Pathianin hingkana ai tho hih ingka tliam ai nit tâk?” an ti a.

²⁹Kanan rama an pa ziang an tlungin chu an chunga thil itlung murdi khah an iril a.

³⁰“Aigupta ram optu khan inrum takkan a ne sôn a, a ram enthlâttu inin a ner ngai a.

³¹Keimani khan a ziangah, ‘Mi dik tak kin nit; enthlâttu ni tlak mang ung e.

³²Urêng sômleiinikah kin nit a, pa khatka nai korong kin nit. Kin inzirpuipa khatkah chu om khâi mak, kin ithlum tak chu atûnah hin Kanan ramah kin pa ziangah ai om a nit,’ kin ti a.

³³Kha ram optu khan kin ziangah, ‘Hingka hin mi dik tak nin nit iti la riang ki ti; nin urêng khatkah hih ki ziangah mah unla, mi dang chu nin insungkua ṭâmhei ranga khan bu pêl unla, fe rei.

³⁴Nin ithlum tak khah ki ziangah zuang ṭhui rei; khanchu, enthlâttu ni mak chei a, mi dik tak nin nit iti riang ki ti. Nin inzirpuipa kin ikhum khom hi nangni pe nôk ki ta, hi ramah hin iomin, sum rivai khom nin itho thei rang a nit,’ a ne ti,” an ti a.

³⁵An puakhei an hang risuan chu an tangka fûn khah an puak chitah khan a lei om a. An tangka fûnhei khah an mun chu an pa neh an rêngkan an rilo ân thing tâk a.

³⁶An pa Jakoba khan an ziangah, “Ki naihei nen chân riai nin inuam mani? Josefa om khâi mak a, Simeona khom om nôk khâi mak a. Atûnah hin Benjamina ten khom la ṭhui nôk nin itum mai na? Keimah hi â tuangtu chu ki nit hih,” a ti a.

³⁷Reubena khan a pa ziangah, “Benjamina hih ni ziangah ki hong ṭhui nôk khâi noa a nitin chu ki naipa inikahei hih la that roh. Ani khah ki kutah inkol inla, ni ziangah hong ṭhui nôk ngêt ki ti,” a ti a.

³⁸Nikhomsela, Jakoba khan, “Ki naipa hih nin ziangah zuang sa no nih; a u a thi tâk a, amah bang hi a la dam chu a nit. Nin fena lampuiheiah tongsual a tong duaiin chu ki lu ṭuak hih beidong ngaisiatin thlânmual nin ne înkhum rang a nit,” a ti a.