Read Biete RIPHUTNA 43 Bible Online

RIPHUTNA 43 - Biete bible

RIPHUTNA 43

¹Kanan ramah khan iṭâm khah ân rik tak tak a.

²Aigupta ram ata an bu zu pêl khah an nêk zoiin chu Jakoba khan a naipahei ziangah, “Fe nôk unla, bu ichînteka lua zur choh nôk rei,” a ti a.

³Nikhomsela, Juda khan a ziangah, “Mi khan, ‘Nin unaipa nin zuang ṭhui sa non chu ki makungah hong ilang khâi no rei,’ a ne iti a nit.

⁴Kin unai hih kin ziangah ni tir san chu fêng kin ta, bu nang zur choh pêk kin ti.

⁵Ni tir non chu zu fe ngam no ning ung. Kha mi khan ikhir takkan, ‘Nin unai nin zuang ṭhui non chu ki makungah hong ilang khâi no rei,’ a ne iti kêng a nit a,” a ti a.

⁶Jakoba khan, “Îtho rang im unai dang nin la nei thuhei ten nin isîr kher a, ki ranga ṭha no tak nin itho a nit hih?” a ti a.

⁷Anni khan, “Kha mi khan, nin pa a la dam im? Unai dang nin la nei im? itin ei thurchi neh ei suapuihei thurchi a ne irdon ngit khateh; a thu ner don lam angka takin kin isâm a nit. ‘Nin unai zuang ṭhui rei,’ tîng a ti iti tûm â ria?” an ti a.

⁸Juda khan a pa ziangah, “Tôitea hih kin ziangah infe roh; khanchu, rithok kin ta, fe zel kin ti. Khanchu, von iṭâmin tute thi no min e.

⁹A chungchâng thu-ah hin keiman a bul la tum mai rong; ama chungchângah chu keiman mophurna la mai ki ti. Ani hih ni ziangah ki hong ṭhui nôk no a, ni makungah hin ken ding nôk non chu a mo chu kumkhuakan la pêl rong.

¹⁰Rivuak kêng kêng nông eilan chu atûnah hin chu avoi nikna khom kin hong itlung nôk pial rang tâk a nit,” a ti a.

¹¹An pa khan an ziangah, “Khangkah khan a nitin chu hingka hin tho rei; kha mi ipe ranga khan hi rama thil iṭha ṭhenkah thingnâi damdôi hei, khuaitui hei, bero hei, mura hei, theikôlkhir hei, almon hei nin puakheiah khan siam unla chôi pêk rei.

¹²Tangka khom a bâk inikah chôi unla, nin puaka nangni ai sia pêk khom kha nin pêk kîr nôk rang a nit; an ichâi rak sika khom a nit duai thei.

¹³Nin unai khom hi ṭhui unla, kha mi ziangah khan zu fe nôk rei.

¹⁴Nin inzirpuipa khatkah neh Benjamina hi nangni â sua pêkna rangin Tinrêngthothei Pathian khan kha mi lungkhamna khah nangni indong riseh. Ki naihei khah ke chân a nit tak le khom ki ichân la ni ta riseh,” a ti a.

¹⁵Khanchu, thilpêk ranghei khah an chôi a, tangka khom a bâk inikah an chôi sa a, Benjamina khom an ṭhui a; Aigupta ramah an fe a, Josefa makungah an rilang tâk a.

¹⁶Josefa khan Benjamina zuang iṭhuiin an zuang a mu kaneh chu a in ienkoltu ziangah khan, “So mihei soh, ki insungah ṭhui inlût roh. Sûnah ki ziangah bu an inêk rang a nit; khasikin, sa that inla, siam roh,” a ti a.

¹⁷Khanchu, ani khan Josefa thupêk angkan a tho tâk a; anni khah Josefa inah khan a ṭhui lût a.

¹⁸Josefa inah ṭhui inlûta an om sikin an ṭi a, “Ei zuang masa ṭuma ei puaka ei tangka a ne isia kîr pêkhei sikah khan a nit, a ne iṭhui inlût hih; ei chungah zoron ṭum izonga eimani neh ei sakuartunghei ne man a, suaka ne siam ai tum a nit hih,” an ti a.

¹⁹Khanchu, Josefa in ienkoltu kha inkot bulah khan an isôn a,

²⁰“Epu, kin zuang masa ṭumah khan bu richoh rang ringota zuang kin nit a;

²¹In tiang kin kîr nôkah khan riabuk kin tlungin chu kin puak khah kin hang iong a, kin sum khah a ngaingirin a lei om a, atûnah hin kin zuang chôi nôk a,

²²Bu richona rangin tangka dang khom kin zuang ichôi sa a nit. Kin sum khah tûm kin puaka sia chu kin iriat ino a nit,” an ti a.

²³Ani khan, “Rithlaringam takkan om unla, ṭi no rei. Nin Pathian, nin pa Pathian khan nin puakheiah khan richon nangni ai pêk a nit khah. Nin bu richôkna lak kha ki mu thlap a,” a ti a.

²⁴Anni khah Josefa insungah a ṭhui lût a, tui a pêk a, an kehei an risûk a; an sakuartunghei khom kha bu a pêk a.

²⁵Sûnah Josefa hong maah khan an thilpêk chôihei khah an lei inrifûk diam a; bu munkan an inêk rang a nit iti an riat tâk a.

²⁶Josefa khah inah a hong kîrin chu an thilpêk chôihei kha an pêk a, lingisikin chibai an bûk a.

²⁷Ani khan an thurchi ardon a, “Nin pa, itar tak a thurchi nin îsîr khah a dam lâi chu a nit im? Iring idamin chu a la om im?” a ti a.

²⁸Anni khan, “Kin pa ni bôi chu a dam lâi a nit a, iring idamin a la om,” an ti a. An ikhûn a, chibai an bûk nôk a.

²⁹Josefa khan a unaipa Benjamina khah a mun chu, “Amahih na nin ithlum tak, a thurchi nin ne îril kha,” a ti a. “Tôite, Pathianin lung nang inkham riseh,” a ti a.

³⁰Josefa khan a unai a mun chu arngai a siat tak tak a, a ṭap a suak a. Khanchu, a chontan sungah a lût a, amakhan a ṭap tâk a.

³¹A mai a phi a, a va suak nôkin chu a însûm thei tâk a nit. “Bu khêng inrifûk rei,” a ti a.

³²Josefa chu a ranin an innêk a, a urênghei khah chu a lômin munkan an nêk a. Aigupta mi, a ina bu ne ngaihei khom kha a ranin an inṭhung a. Aigupta mihei khan Hebraihei khalai rikhîlpui chu rithiang inoa an ringai sika a nit.

³³Josefa mâi ingatin urênghei kha a ûnlian indônin a naipang tak idênin an inṭhung ritlâng a. An iṭhung dân khah an mun chu an ri-en a, an ringai arkhêl ok a.

³⁴Josefa khan a dochama ifah ranghei khah an ziangah ân le a. Benjamina dongtum chu mi dang dongtum nêka khan a bâk ringakan ai tam ual bîk a nit. Khanchu, Josefa lômin uainhei an in a, râiifân takkan an om tâk a.