Read Biete RIPHUTNA 44 Bible Online

RIPHUTNA 44 - Biete bible

RIPHUTNA 44

¹Josefa khan a in ienkoltu ziangah khan, “Kha mihei puak khah an pêl thei dôran bu insip inla, an sum khom an puak chitah thun pêk roh.

²Ki tangkarua kilât khah an naipang tak puakah khan ama tangka neh khan thun sa roh,” itin thu a pêk a. Khanchu, ani khan Josefa be lam angka khan a tho tâk a.

³Khua a vâr kaneh chu an sakuartunghei neh khan an infe tâk a.

⁴Khuaa rithoka itena la manih an dên tenah khan Josefa khan a in ienkoltu ziangah, “Thoi inla, kha mihei khah var zûl inla; ni va môk kaneh chu, ‘Îtho tâk im thil iṭha teh thil ṭhanoa nin ithung tâk hi?

⁵Kha kilât khah ki pu uain inna ngai kilât, thlasânna ranga ai mang ngai kêng nin ilâk ai nit. Thil porinche tak nin itho a nit,’ ti roh,” a ti a.

⁶A va môk phâk a, khangkah takah khan an ziangah a va ti a.

⁷Anni khan a ziangah, “Epu, îtho tâk im hingkana ni hong iti tâk hih? Ni suakhei hin kha angkana thil khah kin itho tlak ino a nit.

⁸Ringai ta, kin puaka tangka kin imuhei khom khah Kanan rama rithokin ni ziangah kin zuang ichôi nôk a nit kha. Ingkan im ni pu ina sum manih, rângkachak manih vâng teh kin irûk rang tâk a?

⁹Ni suakhei lâiah hin tukhom khangkana lei itho kin oma a nitin chu ithat ni riseh. Kha bang khah ni loiin keini khom, kin pu suakin la om zel rong ung,” an ti a.

¹⁰Ani khan, “O a ṭhat, nin ti lam takkan ni riseh; khannisela, tukhom kilât ki muna tak bang kha ki suakin om riseh; mi dang chu fe thei nin ti,” a ti a.

¹¹Khanchu rimot takkan an puakhei chit khah thuaiah an iṭhum a, an puak chit khah an iong a,

¹²Josefa suak khan a ulian tak puaka rithokin a phut a, an ithlum tak idênin a zong a; khanchu, kilât khah Benjamina puakah khan a mu a.

¹³Kha phingin chu ngaiinsian an silbomhei an ipot thlêr a, an puakhei khah an sakuartunghei chit an inpêl nôk a, khopui tiang an kîr nôk tâk a.

¹⁴Juda neh a urênghei khan Josefa in khah an va tlung a, ani kha inah khan a la lei om mai a; a makungah lingisikin an ibok a.

¹⁵Josefa khan an ziangah, “Îthil im nin itho tâk hi? Keimani angkana mi hin chu thlasân thiam ngêt kin ti, iti nin iriat ino mani?” a ti a.

¹⁶Juda khan, “Epu, ni ziangah hin im kin ti rang tâk? Îngân im kin ril rang tâk? Ingkan im kin dingmun kin isîr infel thei rang tâk? Ni suakhei thil isual tho khah Pathianin a înlang tâk a nit hih. Ringai roh, Epu, ni bôihei kin nit tâk hi, kilât ilatu bang khah ni loiin kin rêngka hin ni bôihei kin nit tâk,” a ti a.

¹⁷Josefa khan, “Khangkah khan chu tho tlak no ning e; a puaka kilât an muna pu bang hih ki bôia om rang a nit. Mi danghei chu rithlaringam takkan nin pa ziangah hang kîr nôk rei,” a ti a.

¹⁸Khanungchu, Juda khan Josefa khah a va nâi a, “Epu, ringaiihoi takkan, ni suak hih ni ziangah ṭongbâikah mâng mâng nen ril roh. Ni ningthik khah ni suak chungah hin iṭhuai inla; nang chu Faroa tluk ni nit a.

¹⁹Epu, nangman, ‘Pa nin la nei im, unai dang teh nin la nei im?’ itin ni suakhei hih ni ner don a.

²⁰Epu, keimanin ni ziangah hin, ‘Pa itar tak kin nei a, a tar tianga a naipa, nai ithlum tak khom a la om a, â thlumtak chunga kha chu a thi tâk a; a nupui idit tak nai la dam isun a nit sikin a pa khan ani khah lung ai thlung tak tak a nit,’ kin ti a.

²¹Nangman ni suakhei zianga hin, ‘Ani khah ki mit ngêia ki mu theina rangin ki ziangah zuang ṭhui rei,’ ni ti a.

²²Epu, keimanin ni ziangah, ‘Tôitea khan a pa mah thei no nih; a mâkin chu a pa khah ai thi pai rang a nit,’ kin ti a.

²³Nikhomsela, nangman ni suakhei ziangah hin, ‘Nin ithlum tak khah nin ziangah a zuang sa non chu ki mêl mu khâi no tin u,’ ni ti a.

²⁴“Ni suak, kin pa ziang kin hang tlungin chu, Epu, kha thu khah kin isîr pêk a.

²⁵Itôiteka nungah khan kin pa khan, ‘Fe unla, bu zur choh nôk rei,’ a ne ti a.

²⁶Nikhomsela, keimanin, ‘Zu fe nôk thei khâi no ning ung; kin ithlum tak hih kin ziangah a fe san chu zu fe nôk kin ti; kin ithlum tak hih kin ziangah a fe sa non chu kha mi mêl khah kin imu thei ino rang a nit,’ kin ti a.

²⁷Khanungchu, ni suak, kin pa khan kin ziangah, ‘Ki nupui khan naiipa inikah a ne nei pêk iti nin riat a;

²⁸khatkah kha om khâi mak a. Ani khah ramsahein an isân phor chit nîng a ti, ki ziang ata a suak nî-a rithoka khan kî mu nôk khâi ino a nit.

²⁹Ani lua khom hih ki ziang ata nin ṭhui a, tongsual a zuang tongin chu ki lu ṭuak hih beidong ngaisiatin thlânmual nin ne înkhum rang a nit’ a ti a.

³⁰“Atûnah hin, kin unaipa hih kin ziangah om loiin kin pa ziang kin tlung nôkin chu ani hih om sa mak iti a riat kaneh ai thi rang a nit. A ringna khah kin unaipa ringna neh arzom khap a, Tôitea hih kin ziangah a om sa non chu ni suakhei hin kin pa lu ṭuak chu beidong ngaisiatin thlânmual kin înkhum rang a nit hih.

³²Khabanah khan, kin unaipa kin zuang ṭhui thei dân hingka hin a nit; kin pa ziangah, ‘Ni ziangah ki hong ṭhui nôk non chu kumkhuakan ni maah thiamno changin la om ta rong,’ itin kin unaipa chungchâng thu-ah hin a bul itumtu takin ki irsiam tâk a nit.

³³Khasika khan atûnah hin epu keimah, ni suak hi kin unaipa rithûlin ni bôiin nen om inla, Tôitea hih a uhei ziangah infe roh.

³⁴Tôitea ṭang loiin chu kin pa ziangah kîr nôk thei no ning e. Kin pa chunga siatna tlung rang khah kî mu ngam ino a nit,” a ti a.