Read Biete RIPHUTNA 45 Bible Online

RIPHUTNA 45 - Biete bible

RIPHUTNA 45

¹Josefa khah a ina om murdihei makungah khan insûm zoi khâi mak a; khanchu, mi murdi khah a chontan ata suak riai rangin thu a pêk a. A urênghei ziangah Josefan tûm ai nit ân puang lâiah khan a kôlah mi dang tute omak a.

²A ṭap ngûi ngûi a, a ṭap irî khah Aigupta mihei khan an riat phâk a, Faroa inah khom an lei riat tâk a.

³Josefa khan a urênghei ziangah, “Josefa kha ki nit. Ei pa chu a la dam na?” a ti a. Nikhomsela, a urênghei khan sâm thei mak a, a makungah khan i-ap zalkan an iom a nit.

⁴Khanungchu, Josefa khan a urênghei ziangah, “Ringaiihoi takkan ne hong nâi ta u,” a ti a. Khanchu, an va nâi a, a ni khan, “Nin unaipa Josefa, Aigupta mihei zianga nin izuar khah ki nit.

⁵Nikhomsela, hin taka fe ranga nin ne zuar sikah hin nin ringai inseh no unla, thiamno khom riti no rei; mihei ringna inzôk rangin Pathianin nin matonah a ne lei itir masa a nit hih.

⁶Ram pumpuiah kum inika sung iṭâm a tlâk tâk a; kum ringakah dang bu rît no nia, bu ât rang khom om no nih.

⁷Nangmani neh nin richihei rinêngah hin izuaa nin om theina ranga zôkna roinpui taka iring idama nangni ken om theina ranga Pathianin nin matonah hin a ne lei itir masa a nit.

⁸Khasika khan hi muna nen fêtu hih nangmani ni mak chei a, Pathian a nit. Ani khan Faroa sinthotu inchung takin a ne siam a, a mihei ruaitu tak Aigupta ram pumpuia roirêltun a ne isiam tâk a nit.

⁹“Atûnah hin irang takkan ei pa ziangah hang fe unla, a ziangah, ‘Ni naipa Josefa khan, Aigupta ram pumpui ruaitun Pathianin a ne siam tak a; ni naihei, ni tûhei, ni berahei, ni kêlhei, ni sialhei neh nî nei murdi neh rivuak loiin ki ziangah zuang roh.

¹⁰Khanchu, Gosen ramah om ni ta, ki kôl ngêiah hin nî om rang a nit.

¹¹Gosen ramah khan chu keiman nang enkol ki ti. Ṭâmpui hin kum ringakah a lai dai rang kêng a nit a; nangmah neh ni insung mihei neh ni ranhei khah iṭâmin deng nin inthei duai lôiin a ti,’ hang ti rei.

¹²“Nangmani ngêiin nin mitin nin mu a, Benjamin, nang khomin ni mit ngêiin ni mu a, nin zianga thusîrtu hih keimah Josefa khah ki nit.

¹³Aigupta rama dingmun risâng taka ke ding thuhei, nin thil mu murdi thuhei hih ei pa iril rei. Fe zel unla, ei pa chu hin hang ṭhui rei,” a ti a.

¹⁴A unai Benjamina khah â kua a, a ṭap tâk a; Benjamina khom a ṭap a.

¹⁵Khanungchu, a ṭap pumin a urênghei murdi khah â kua a, an sika â riam a. Kha angkan a tho zoiin chu an urêngkan thuhei an isîr tlâng tâk a.

¹⁶Josefa urênghei an zuang thu kha Faroa inah khom an lei riat tâk a. Faroa neh a milianhei khah ân lôm ok a.

¹⁷Faroa khan Josefa ziangah, “Ni urênghei iril roh, hingka hin tho riseh. An ranhei khah bu inpêlin, Kanan ramah fe zel riseh.

¹⁸Khanchu, nin pa neh nin insungmihei khah zuang ṭhui sela, hin zuang kîr nôk riseh. Khanchu, Aigupta rama ram iṭha tak munhei hi pêng ki ta, hi ram richongna hi an ifâk rang a nit.

¹⁹Khapenah, an nainetehei, an nupuihei neh nin pa an zuang ṭhuina rang Aigupta rama rithoka hin tâlihei chôi riseh.

²⁰An neinun danghei chu inpâm bâk no riseh. Aigupta ram pumpuia thil iṭha murdi hih an idong rang kêng ai nit,” a ti a.

²¹Israel naihei khan kha angka khan an tho a; Josefa khan Faroa thupêk angka khan tâlihei, lampuia cholam ranghei a pêk a.

²²An rêngkan silbom rithlengnahei a pêk chit a; Benjamina vâng kha chu tangka sekel rizathumkah neh silbom rithlengna ringakah a pêk a.

²³A pa rang Aigupta rama thil iṭha pêl sakuartung sômkah neh lampuia a pa rang buhei, ibaihei neh ifarua dang ipêl sakuartungpui sômkah a thon a.

²⁴Khanungchu, a urênghei khah ân fe a, an rithok chakah khan an ziangah, “Lampuiah hang ringo no rei dua,” a ti a.

²⁵Aigupta ram ata khah an fe a, Kanan rama an pa Jakoba ziang khah an hang tlung a.

²⁶A ziangah, “Josefa khah a la dam a, Aigupta ram pumpuia roirêltu a nit,” itin an iril a. Khante, a lungril a dêng rak a, an thu sîr khah iam thei mak a.

²⁷Nikhomsela, an zianga Josefa thu sîr murdi khah an isîr pêk a; Josefan a chuangna rang tâli ai thonhei khah a mun chu a lungril khah a hong har huai tâk a.

²⁸Israela khan, “Ki naipa Josefa iring idama a lai om hih ki ta rangin a înrup a nit. Ki thi ma ngêiin a mêl imu rangin kî fe ngêt rang a nit,” a ti a.