Read Biete RIPHUTNA 46 Bible Online

RIPHUTNA 46 - Biete bible

RIPHUTNA 46

¹Israela chu ai nei murdi neh a suak a, Beersebaah a fe a, amakhan a pa Isaka Pathian ziangah khan ribôlna a lan a.

²Zânah khan Pathianin Israela khah inlârnan â sôn a, “Jakob, Jakob,” a ti a. Ani khan “Hin ki om,” a ti a.

³Pathian khan, “Keimah Pathian, ni pa Pathian chu ki nit. Aigupta rama fe khah ṭi no roh; amakhan ner chihei chu nam roinpui takin kî siam rang a nit.

⁴Aigupta ramah khan nang fêpui ki ta; hi ramah hin ner chihei chu hong ṭhui ikhîr nôk ngêt ki ti. Ni thi tikah Josefa kha ni ziangah om a ti,” a ti a.

⁵Jakoba khan Beersebaa rithoka khan a suak a; a naihei khan a chuangna ranga Faroa tâli hong thonah khan an pa khah an nupuihei neh an naihei neh khan an inchuang a

⁶Khanchu, an ranhei kha an hôl a, Kanan rama an thil nei murdi khah an chôi a, Aigupta ramah khan an fe tâk a. Jakoba khan archi suanpârhei murdi a ṭhui riai a,

⁷a naipa hei, a nainu hei, a tupa hei, a tunu hei, an rêngkan Aigupta ramah khan a lûtpui tâk a.

⁸Aigupta rama rithon, Israel mi, Jakoba neh archihei chu hihei hih a nit. A nai lutîr Reubena a nit a;

⁹Reubena naipahei chu: Hanoka, Palua, Hezrona neh Karmia an nit.

¹⁰Simeona naipahei chu: Jemuela, Jamina, Ohada, Jakina, Zohara neh Kanan nupang ata a naipa Saula hei an nit.

¹¹Levia naipahei chu: Gersona, Kohatha neh Meraria hei an nit.

¹²Juda naipahei chu: Sela, Pereza, Zera hei an nit a. A nai ulianhei Era neh Onana kha chu Kanan ramah khan an ithi tâk a nit. Pereza khan naipa inikah Hezrona neh Hamula ai nei a nit.

¹³Isakara naipahei chu: Tola, Pua, Jasuba neh Simrona hei an nit.

¹⁴Zebuluna naipahei chu: Sereda, Elona, Jahleela hei an nit.

¹⁵Khahei murdi khah Leaiin Mesopotamia rama Jakoba naipa ai nei pêkhei richi chu an nit a; a nainu Dinaii neh an rêngkan sômithumka ithumkah an nit.

¹⁶Gada naipahei chu: Zifona, Hagia, Sunia, Ezbona, Eria, Arodia neh Arelia hei an nit.

¹⁷Asera naipahei chu: Imna, Isva, Isvia, Beria hei neh an farnu Seri hei an nit. Beria khan naipa Hebera neh Malkiela ai nei a nit.

¹⁸Kha sômleiirukka hei khah Labanan a nainu Leaii zianga ai pêk Zilpaiin Jakoba naipa ai nei pêkhei richi chu an nit.

¹⁹Jakoba nupui Rakili naipahei chu: Josefa neh Benjamina an nit.

²⁰Josefa khan naipa inikah Heliopolis khua thiampu Potifara nainu Asenathi inei pêk Manasea neh Efraima ai nei a nit.

²¹Benjamina naipahei chu: Bela, Bekera, Asbela, Gera, Naamana, Ehia, Rosa, Mupima, Hupima neh Arda hei an nit.

²²Khahei khah Rakilin Jakoba naipa ai nei pêkhei richi chu an nit; an rêngka khan sômleiilikah[84] an nit.

²³Dana naipa khah: Husima a nit.

²⁴Naftalia naipahei chu: Jazeela, Gunia, Jezera neh Silema hei an nit.

²⁵Khahei khah Labanan a nainu Rakili zianga ai pêk Bilhaiin Jakoba naipa ai nei pêkhei richi chu an nit; an rêngkan sarikah an nit.

²⁶Jakoba zianga Aigupta rama lût, ama ṭhâlbe ngêia insiang murdihei chu an rêngka khan sômirukka irukkah an nit a. Jakoba moihei chu tep sa no a nit.

²⁷Josefan Aigupta rama naipa ai neihei khah inikah an nit a. Jakoba inmihei murdi Aigupta rama lûthei kha an rêngkan sômsarikah an nit.

²⁸Jakoba khan Juda khah Josefa ziangah Gosen rama lei ihong masa rangin a tir a. Khanchu, Gosen ram an tlungin chu,

²⁹Josefa khan a tâli khah ân rifûk a, a pa don rangin Gosen ramah khan a fe tâk a. An ritongin chu an ripom a, isôt takkah an ṭap a.

³⁰Khanchu, Jakoba khan Josefa ziangah, “Iring idamin ni la om a, ni mêl ki mu nôk tâk a, atûn chu ki thi tâk khoma a ṭhat,” a ti a.

³¹Khanungchu, Josefa khan a urênghei neh a pa insungkuahei ziangah khan, “Fêng ki ta; Faroa iril ki ta, a ziangah, ‘Ki urênghei neh ki insungkuahei, Kanan rama omhei khah ki ziangah an zuang tlung tâk;

³²anni chu ran ivâi mi pial an nit sikin bera enkoltuhei an nit a. An bera lômhei, an ran lômhei neh an neinun murdi an zuang ithon riai a nit,’ itin va ril ki ti.

³³Faroan nangni a koi a, ‘Îsin tak im nin itho ngai?’ itia nangni ardon tikin chu;

³⁴nangmanin, ‘Ni suakhei hih kin chibulheia rithokin ran ivâi ngai kin nit a, kin naipangte ata atûn tenan ran ivaitu kin nit,’ ti rei dua. Khanchu, Gosen ramah nin iom thei rang a nit. Aigupta mihei hin berapuhei hi an îtir tak tak a nit,” a ti a.