Read Biete RIPHUTNA 47 Bible Online

RIPHUTNA 47 - Biete bible

RIPHUTNA 47

¹Josefa kha Faroa ziangah khan a fe a, a ziangah, “Ki pa neh ki urênghei chu an zuang tlung tâk a; atûnah hin Gosen ramah an om,” a ti a.

²A urênghei lâia mi pasal ringakah a ṭhui a, Faroa makungah ân rilang a.

³Faroa khan anni khah, “Îsin tak im nin itho ngai?” itin ardon a. Anni khan Faroa ziangah, “Ni suakhei hin kin chibulheia rithokin bera vâituhei kin nit,” itin an sâm a.

⁴Faroa ziangah khan hingka hin an ti sa a, “Hi rama om ranga zuang rithon kin nit; ṭâmpui a tlâk natinsat tak tak sikin ni suakhei hin Kanan ramah kin bera lômhei fâk rang loisûl iring om khâi mak a. Khasikin, ringaiihoi takkan Gosen rama om rangin ne phal roh,” an ti a.

⁵Faroa khan Josefa ziangah, “Ni pa neh ni urênghei hin nang an zuang ipan a nit a.

⁶Aigupta ram chu ram rizat tak a nit hi teh. Ni pa neh ni urênghei chu ram ṭhat ṭhatna munah hin om mun insiam roh; Gosen ramah an ti le khom om riseh. An lâia mi takritâi bîk ni riat vângin chu ki ran enkoltun phun roh,” a ti a.

⁷Khanungchu, Josefa khan a pa Jakoba khah a ṭhui lût a, Faroa makungah khan ân rilang a. Jakoba khan Faroa khah ṭhatvurna a lan a.

⁸Faroa khan Jakoba ziangah, “Kum izâkâm ni nit tâk,” a ti a.

⁹Jakoba khan Faroa khah a sâm a, “Ki khual inzin kum zât chu kum rizalei sômithumkah a nit. Ki chibulhei dam kum neh inrichakin chu iroichekah a nit a; nikhomsela, ai denginthei a nit,” a ti a.

¹⁰Jakoba khan Faroa khah ṭhatvurna a lan nôk a; khanchu, Faroa ziang ata khah a suak tâk a.

¹¹Josefa khan a pa neh a urênghei khah Faroa thupêk angkan Rameses bialah, ram ṭhatna tak mun, ram a pêk a, ân om tâk a.

¹²Josefa khan a pa neh a urênghei, a pa insungkuahei murdi kha â chîn tak idênin an nang lam angka chitin ifâk a pêk a, a enkol tâk a.

¹³Iṭâm khah a natinsat tak tak a, ram tinah ifah rang rêng rêng om khâi mak a; khasika khan Aigupta ram neh Kanan ram khah iṭâmin an dang inda tâk a.

¹⁴Josefa khan Aigupta ram neh Kanan rama sum iom murdi chu an bu richôkna manin a lâk infâi pêk riai tâk a; kha sum khah Faroa inah khan a sia mai a.

¹⁵Aigupta ram neh Kanan rama sum iom murdi an mang zoiin chu Aigupta mihei kha Josefa ziangah an hong a, “Ifah rang ne pe roh; ni mitmuah hin kin ithi rang a nit, kin sum lak kin phît infâi riai tâk a,” an ti a.

¹⁶Josefa khan, “Sum nin nei khâi non chu nin ranhei hong chôi rei; kha manah khan bu nangni pêng ki ti,” a ti a.

¹⁷Khanchu, an ranhei khah Josefa ziangah an ṭhui a; Josefa khan sakorhei, berahei, sakuartunghei, kêlhei manah khan ifah rang a pêk tâk a. Kha kumah khan chu an ranhei manah khan ifah rang a pêk a.

¹⁸Kha kum khah a vun a, kum a hong thar nôkin chu a ziangah an hong nôk a, a ziangah, “Kin sum murdi kin phît infâi riai tâkzia neh kin ran murdi ni ta a nit tâkzia hih, Epu, ni ziangah hin ip no ning ung. Epu, kin taksa neh kin ramhei ti no chu nang ipeh rang îte nei khâi mang ung e.

¹⁹Ni mitmuah hin keimani neh kin ram hih kin irmang vang rang im ai nit tâk? Keimani neh kin ram hih ifah rang ne pen ner choh ta roh. Khanchu, keimani hih Faroa suakhei ni tâng kin ta, kin ram khom hih dong riseh. Thi loia iring idama kin om theina rangin ifah rang ne pen la, kin ramhei khom hih chulrama a om nona rangin bu chi ne pe roh,” an ti a.

²⁰Khanchu, Josefa khan Faroa rang Aigupta ram pumpui chu archôk pêk tâk a. Iṭâm khah a natinsat sikin Aigupta mihei murdi khan an loihei khah an zuar riai tâk a; khanchu, ram khah Faroa ta a nit zit tâk a.

²¹Josefa khan mihei murdi khah Aigupta ramrî kiang tiang monga rithoka a kiang tiang mong idênin Faroa suakin a siam zit tâk a.

²²Thiampuhei ram bang khah richoh mak a; thiampuhei khan chu Faroa ziangah dongtum an nei a, Faroan an dongtum ai pêk khah an ifâk ngai a nit sikin an ram khah an izuar ino a nit.

²³Khanungchu, Josefa khan mipuihei ziangah khan, “Ringai rei, vuanah hin Faroa rangin nangmani neh nin ramhei nangni ki irchôk tâk a nit a; hin nin rang fachi a om, nin loiah khan irît rei.

²⁴Khante, bôlzoi tikin chu Faroa rang bâk ringaka ṭhena bâkkah hong pêng nin ta, a bâk ilikah kha chu nangmani ta ai nit rang a nit, amakhah fachi ranghei, nangmani neh nin insungmihei fâk rang nîng a ti,” a ti a.

²⁵Anni khan, “Nangman kin ringna hih nen zôk tâk a, kin chungah ni ṭhat tak tak a; Epu, Faroa suakhei ni tâng kin ti,” an ti a.

²⁶Josefa khan bu thar ivâng bâk ringaka ṭhena bâkkah kha Faroa dong mai rangin Aigupta ram dânin a siam tâk a. Hi dân hih atûn tenan imangin a lai om a nit. Thiampuhei ram bang khah Faroa ta nino chu a nit.

²⁷Aigupta rama Gosen bialah khan Israelhei khan ommun an khuar tâk a. Amakhan vâng an sak a, richi itam takka neiin natinsat takkan an hong pung tâk a.

²⁸Jakoba khah Aigupta ramah khan kum sômleisarikah a dam a; Jakoba damsung chu kum riza lei sômilika sarikah a nit.

²⁹A thi rang zoro a hong nâi tenan chu a naipa Josefa khah a koi a, a ziangah, “Ni mit ki tlungin chu ki malpui kârah hin ni kut rôl inla; Aigupta ramah hin ne phûm tlak no tin iti ṭongrikhâm roh.

³⁰Ki chibulhei omnaah riphûm kî nuam a nit; khasikin, ki thi tikin chu Aigupta ram ata hih ner zôn suakin, anmani riphûmna munah khan ni ne phûm rang a nit,” a ti a. Josefa khan, “Ni ti lam angka taka hin hong thông ki ti,” a ti a.

³¹Jakoba khan, “Ki ziangah vâni risâm roh,” a ti lam angkan Josefa khan vâni arsâm tâk a. Khanchu, Jakoba khan a zâlmunah khan ikhûnin lômthu a ril tâk a.