Read Biete RIPHUTNA 49 Bible Online

RIPHUTNA 49 - Biete bible

RIPHUTNA 49

¹Jakoban a naihei a koi bûm a, hingka hin a ti a, “Sûn matona nin chunga thil lâ tlung rang khah nangni ke ril theina rangin hong ribûm rei,” a ti a.

²“Nangni Jakoba naihei o, Hong ribûm unla, hong ringai rei; Nin pa Israela ṭong hi ringai rei.

³Reuben, nangmah ki nai lutîr, Ki rât lâi neh ki vânglâi nai; Ki naihei lâia â rât tak neh arsong tak ni nit.

⁴Nikhomsela, tuipui risok angkana om ṭian thei ino ni nit a, Mi dang nêkan inchung bîk khâi no tin e, Ni pa khumpui ni kâi a; Ni pa khumpui innimin, mualphoi ni sak sika khan.

⁵Simeona neh Levia hih urnaikah inphîr angka an nit a; An khandaihei khah thisen isuana riam rei a nit.

⁶O, ker thla, nang chu an risônnaah khan fe non la; O, ki roinpuina, nang chu an rimunaah khan ṭang no roh; An ning a thikin mi an that a, An hoiinhâi nan serâtchal zapui an sât a.

⁷An ning thik khah vânisalin om riseh, inrît tak a nit sikin; An ningmur khom khah vânisalin om riseh, Nunisia tak an nit sikin. Israel ramah khan anni chu chekindar ki ta, Israelhei lâiah ṭhen indar ki ti.

⁸Juda, nang chu ni urênghein nang inpâk an ti; Ni kutin ne râlhei chu an ringah irâk ni ta; Ni urênghei kha ni makungah ikhûn an ti.

⁹Juda chu sakeibaknei tuai, A sa sê khah a that a, a khurah a kîr nôk a, Arkin or ora, a kual ngai, Tutên an înbuai ngam ngai ino angka hi a nit.

¹⁰Rêng irol khah Juda hin ituh mai a ta, Archi suanpârhei khom hong inlal mai an ti. Nam tinin thilpêkhei hong pêng an ta, A thu zômin a makungah ikhûn an ti.

¹¹A sakor tete kha grep ruia a thlung a, A sakuartung tete khah grep irâ tui tak kungah khan a thlung a. A silbomhei chu uainin arsûk a, A puan khah thisen angkana sen uainah khan arsûk a.

¹²Uain sikin a mit sen a ta, A hâhei chu dût nêkan ṭek a ti.

¹³Zebuluna chu tuikhanglian rikamah om a ta, A vakôl khah rikuang ringamna nîng a ti. A ramrî chu Sidon idênin nîng a ti.

¹⁴Isakara chu sakuartung irât tak, A puak pêl rang kâra kual mai angka hi a nit.

¹⁵Nikhomsela arngamna mun kha ṭha a ti a, Ram khom a hoiin a riat a, Khanchu, puak ipêl rangin â ruang ân riniam a, Suak angkan tharum sin ithon a hong om tâk a.

¹⁶Dana hin chu a mihei roi rêl pêk a ta, Israel nam danghei angka takin om an ti.

¹⁷Dana chu lamsîra irûl, Lampui sîra sokimuk irûl angka a nit. Sakor kea chuk ngaitu, Sakor chunga chuang a thal takka tla rakka chuk ngai nîng a ti.

¹⁸O PUMAPA ni saninzôkna chu ki ngâkmo vang tâk na!

¹⁹Gada chu irâlin doi an ta, Nikhomsela, ani khan lei doi kîr a ta, ûm rizûl a ti.

²⁰Asera ram lua-ah khan chu ifâk vâng a ta, Rêng fâkrua tui tak takhei isuang a ti.

²¹Naftalia chu sazukpui ilêng suak, Tê ṭha tak tak inei ngai angka a nit.

²²Josefa chu tui omna muna ram sakor angka a nit a, Itlâng panga lêng ngai sakor tuai angkah a nit.

²³Â râlhei khan natinsat takkan an doi a, An phelhei neh an thalhein an rizûl a.

²⁴Nikhomsela, a phel khah ikhir takkan a om mai a, A kuthei chu ai rât a nit, Jakoba Pathian Irât sinthotheina a khan, Israela Lungpui, Enkoltu zârah khan.

²⁵Ni pa Pathian kha a nit, nangmah nang iṭangpui ngaitu chu, Tinrêngthothei Pathian a nit, ṭhat nang invur ngaitu chu. Chungtiang rivân ṭhatvurnahei, Rinêng nuaia rithoka ṭhatvurnahei; Nai neh tehei neh ran tianga ṭhatvurnahei khah.

²⁶Thil pâr neh bu vuia ṭhatvurnahei, Ni pa ṭhatvurnahei hin ki chibulhei ṭhatvurnahei khah Kumtluang tlângsîp idênin ai khûm zoi tâk a nit. Hi ṭhatvurnahei murdi hih Josefa lu chungah om sela, A urênghei ziang ata inrana om lu chung ngêiah khan om riseh.

²⁷Benjamina chu inia inruak angka hi a nit. A sa that kha zîngah neh kholoiah fah mai a ti,” a ti a.

²⁸Khahei khah Israel nam sômlei nam inikahei chu an nit a. Kha thuhei khom khah anmani thlana ranga an pa khan an zianga a thu sîr chu a nit; an khât khâtin an ṭhatvur dong rang ten angka chitin ṭhat ai vur a nit.

²⁹Khanungchu, Jakoba khan a naipahei kha he a be a, “Atûn chu ki chipuihei ziangah iṭhuiin kî om sa rang tâk a nit. Ki pahei riphûmna pûkah khan ne phûm rei. Kha pûk khah Hit mi Efrona loia om a nit.

³⁰Makpela loia pûk, Mamre ridîna, Kanan rama om, Abrahaman riphûmna mun ranga Hit mi Efrona ziang ata a irchôk a nit.

³¹Kha munah khan Abrahama neh a nupui Sari khah an phûm a; kha munah khan Isaka neh a nupui Rebeki khom khah an phûm a; kha mun ngirah khan Leaii khom kî phûm a nit.

³²Loi neh a sunga ipûk iom khah Hit mihei ziang ata richoh tâk a nit; kha munah khan ne phûm rei,” a ti a.

³³Jakoba khan a naipahei khah he a be zoiin chu a zâl nôk a, a rang a chat tâk a, a chipuihei ziangah iṭhuiin ai om tâk a nit.