Read Biete RIPHUTNA 50 Bible Online

RIPHUTNA 50 - Biete bible

RIPHUTNA 50

¹Josefa khan a pa chungah â bok a, a ṭap a, â biang a tum a.

²Khanungchu, Josefa khan a thuaia sin, a suak damdôi ithiamhei khah a pa ruak ṭuai thei loia siam rangin thu a pêk a.

³A ruak ṭuai thei loia siam rangin sûn sômilikah a nang a; kha dôra sûn khah ai nang ngai pial a nit. Khante, sûn sômsarika sung chu Aigupta mihei khan ani khah an ṭâ a.

⁴An sûn ngai ten sung khah a hekin chu Josefa khan Faroa milianhei kha â sôn a, “Nin mit ki tlungin chu, ringaiihoi takkan Faroa kha ne ngên pêk rei.

⁵Ki pa khan a thi rang to a khan, ‘Kanan rama ki thlân inrifûk thlâmah khan ne phûm ngêt rei,’ a ti a; ṭong a nen rikhâm a. Khasikin, ringaiihoi takkan ki pa hi hang phûm ki ta; khanungchu, zuang kîr nôk zel ki ti,” a ti a.

⁶Faroa khan, “Ṭong nang ân rikhâm lam angkan ni pa chu hang phûm roh,” a ti a.

⁷Khanchu, Josefa kha a pa phûm rangin a hang fe tâk a. Josefa rualin Faroa milian murdi, a insungmihei lâia ulianhei neh Aigupta ram ulianhei murdi khom an fe sa a.

⁸Josefa insungmihei, a urênghei, a pa insungmihei khom khah a ziangah an hang fe sa a. An nai ichîntehei neh an berahei, an kêlhei neh an sialhei bang khah Gosen ramah khan an mâk a.

⁹Tâlihei, sakor chungchuang mihei khom ama rualin an fe sa a; hatpuipa an nit.

¹⁰Jordan dung râla Atada rîzôl kha an tlungin chu natinsat takkan an ṭâ a; Josefa khan a pa kha sûn sarika sung a ṭâ a.

¹¹Kha rama Kanan mihei khan Atada rîzôla an mithi sûn khah an mun chu, “Aigupta mihei mithi sûn dân natinsat tak a nit hih,” an ti a. Khasika khan kha mun riminga khan Abel-Mizraim, “Aigupta mihei lusûn mual” an be tâk a, amakhah Jordan dung râla om a nit.

¹²Khanchu, Jakoba naihei khan an pa thupêk lam angka takin an tho a.

¹³A naipahei khan a ruak khah Kanan ramah an rizôn lût a, Makpela loia pûk, Mamre ridîn, Hit mi Efrona ziang ata Abrahaman riphûmna mun ranga a irchôkah khan an phûm tâk a.

¹⁴A pa a phûm zoiin chu Josefa khah Aigupta ramah a kîr nôk a. A urênghei neh a pa phûm ranga a zianga hang ife sahei murdi neh khan Aigupta ramah an kîr nôk riai tâk a.

¹⁵Josefa urênghei khan an pa thi nungah khan, “Josefa hin ne nel a ta, a chunga thil ei ithonsual murdi phuba khah ei chungah hin a lai lâk riai rang a nit hih,” an ti a.

¹⁶Khanchu, Josefa ril rangin thu an richa a, “Ei pa khan a thi maah khan hingka hin thu a ner ircha a nit.

¹⁷Josefa ziangah, ‘Ringaiihoi takka ni urênghei sinsiatna neh sinsualna, ni chunga an thonsualna chu ngaidam roh, itin nin isîr rang a nit,’ a ne ti a. Khasikin, atûnah hin ringaiihoi takkan ni pa Pathian suakhei thonsualna khah ne ngaidam roh,” an ti a. Kha thu khah a lei riatin chu Josefa khah a ṭap ngûi ngûi tâk a.

¹⁸Khanungchu, a urênghei khom khah an hong a, a makungah khan an ikhûn a; “Ni suakhei kin init a nit,” an ti a.

¹⁹Nikhomsela, Josefa khan an ziangah, “Ṭi no rei; Pathian rithûl im ki nit a?

²⁰Nangmanin chu ki chungah thil ṭhano nin phan a; nikhomsela, Pathian khan vuaninta angkana hin mi itam takka ringna saninzôkna rangin thil iṭha a închang tâk a nit.

²¹Khasikin, îte ṭi viat no rei; nangmani neh nin nainetehei murdi nangni enkol mai ki ti,” a ti a. Khanchu, ṭongbâi ithlum tak takin lungngam a sak a.

²²Josefa kha a pa insungmihei neh, Aigupta ramah khan an om mai tâk a; Josefa khah kum rizalei sômkah ai dam a nit.

²³Josefa khan Efraima nai, rikhûk ithumka ten a mu a. Manasea naipa Makira naihei khom a insungah la pom phâk rangin a lai dam a nit.

²⁴Josefa khan a urênghei ziangah, “Kî thi rang tâk a nit a; nikhomsela, Pathianin nangni donsui mai a ta, hi ram ata hih nangni zuang iṭhui suakin Abrahama hei, Isaka hei, Jakoba hei zianga ṭongrikhâma ipe a înkung ramah khan nangni ṭhui ithlun a ti,” a ti a.

²⁵Khanungchu, Josefa khan Israela richihei khah vâni ân risâm a, “Pathianin kha ramah khan nangni a ṭhui tikin chu ki ruhei hih, hi mun ata nin chôi ngêt rang a nit,” a ti a.

²⁶Khanchu, Josefa khah kum rizalei sômka mi a nitin chu a thi tâk a. A ruak khah mon thei loi rangin an siam a, Aigupta ramah khan rikuangah an inzâl tâk a.