Read Biete RIPHUTNA 7 Bible Online

RIPHUTNA 7 - Biete bible

RIPHUTNA 7

¹PUMAPA khan Nova ziangah, “Nangmah neh ni insungmihei murdi rikuangah lût riai rei; nangmah bang hih atûn lâi mihei lâiah hin ki mitmua mi fel tak chu ni nit.

²Rinêng chunga chi la hong isem rangin sa rithiang chi tinrêng apui neh achal bop sarikah chitin ṭhui inla, sa rithiang ino chi tinrêng chu apui neh achal bopkah chitin ni ṭhui rang a nit.

³Khapenah, chunga vuang iva chi tinrêng khom apui neh achal bop sarikah chit ni ṭhui sa rang a nit.

⁴Atûna rithoka sûn sarika nungah chu ki mîring siam murdi inrimang rangin rinêng chungah hin sûn sômilikah neh zân sômilika sung chât loiin rua ki însûr rang a nit,” a ti a.

⁵Khanchu, PUMAPA thupêk angka takin Nova khan a tho tâk a.

⁶Rinêng chungah tui liansâng a tho lâiah khan Nova khah kum rizarukka mi a nit a.

⁷Tui liansâng sikin Nova khah a nupui neh a naipahei, â moihei, an rêngkan rikuangah khan an lût tâk a.

⁸Pathianin Nova thu a pêk lam angka khan sa rithiang neh sa rithiang inohei, chunga vuang ivahei neh nuaia bokrivâka lôn tinrênghei chu apui neh achal chit, a bop chitin Nova ziangah rikuangah khan an lût sa tâk a.

¹⁰Sûn sarika nungah chu rinêng chungah tui khah a zuang lian tâk a.

¹¹Nova khah kum rizarukkah a nit kum, a thla nikna sûn sômleisarika nî a khan; kha sûn takah khan tui inthûk tak nâr murdihei kha a hong ri-ong zit a, rua sûrna rivânhei khom a zuang ri-ong sa tâk a.

¹²Khanchu, sûn sômilikah neh zân sômilika sung chât loiin rinêngah hin rua inrik tak a sûr tâk a.

¹³Kha nî ngirah khan Nova neh a nupui neh a naipahei Sema, Hama neh Jafeta neh an nupui ithumkahei khah rikuangah an lût a.

¹⁴Anmani lût rualin, mîring chi tinrêng ramsahei, insungsahei, sa chînhei, chunga vuang ivahei, nuaia bokrivâka lônhei, an chi om dân chitin an lût sa a.

¹⁵Mîring rithuak inei tin tinhei khah a bop chitin Nova ziangah rikuangah khan an ilût tâk a nit.

¹⁶Â lûthei khah Pathianin Nova zianga thu a pêk lam angka takin mîring murdi khah an chi om dân chitin apui neh achal chit an lût a; khanchu, PUMAPA khan rikuang kotbâi khah a khâr tâk a.

¹⁷Rinêngah sûn sômilika sung tui a lian tâk a; tui khah a hong ridîl a, rikuang khah ân lâm a, rinêng chungtiang â lâm tâk a.

¹⁸Tui khan a hong dîl tûr tûr a, rikuang khah chu tui chungah â lâm mai a.

¹⁹Rinêng chungah hin tui khah natinsat takkan a hong ilêt zut zut a; a hong chîm risâng tîr tîr a, tlâng risâng murdihei a chîm zoi vang tâk a.

²⁰Itlâng sîp risâng tak takhei khah mûk sômlei mûk ringaka risângin a chîm rikhum vang tâk a.

²¹Khanchu, mîring rinêng chunga om murdi, ivahei, ramsahei, insungsahei, nuaia bokrivâka lônhei neh miriam murdihei chu an thi zoi vang tâk a.

²²Rinênga om rithuak inei murdi chu an thi fâi vang tâk a.

²³Khanchu, rinêng chunga om ringna nei murdi miriamhei, ramsahei, insungsahei, mîringtehei, chunga vuang ivahei khah PUMAPA khan a that inrimang vang a; Nova neh rikuanga a zianga omhei bang khah izua om chu an nit.

²⁴Tui khah sûn rizalei sômringaka sung chu rinêngah hin rikâi mak a.