Read Biete RIPHUTNA 9 Bible Online

RIPHUTNA 9 - Biete bible

RIPHUTNA 9

¹Pathianin Nova neh a naipahei khah ṭhat a vur a, an ziangah, “Richi suanpâr itam takka neia hong ipungin, rinêng hih luan sip rei.

²Rinêng sa tinrênghei, chunga vuang iva tinrênghei, rinênga bokrivâka lôn murdihei neh tui sunga inga murdihei khan nangni ṭîng an ta, rît nangni pe tak tak an ti. Anni khah an rêngkan nin kutah kî sia a nit.

³Nin fâk ranga thlâi iring nangni kî pêk angka khan ringna nei murdihei khom fah thei nin ti.

⁴Nikhomsela, sa a thisen iom ṭiankan chu nin fâk rang ni mak e; ringna khah thisena om a nit sikin nangni kî khap a nit.

⁵Tukhom miriam a thatin chu a chungah phuba kî lâk ngêt ngêt rang a nit. Ramsa khom miriam a thatin chu a chungah phuba lan kî that ngêt ngêt rang a nit.

⁶Miriam hih Pathian ri-angpuia siam a nit a; khasikin, tukhom miriam thisen isuatu chu a miriam champui ngirin ama thisen khah an isua rang a nit.

⁷“Nangni chu nai itam takkah nei unla, nin richihei hong pung sela, rinêng hih hong luan sip rei,” a ti a.

⁸Pathian khan Nova neh a naipahei ziangah,

⁹“Ringai ta u, nangmani neh nin richi suanpârhei neh,

¹⁰mîring chi tinrêng, ivahei murdi neh ramsahei murdi, rikuang ata nangmani neh â suak murdihei ziangah hin keima ngêiin thuthlung kî siam a nit.

¹¹Ki thuthlung, ki îndet chu amahih a nit: mîring ringna nei murdihei inrimang rangin tui inlian khâi no ning a, rinêng iseh rangin tui lian nôk tlak khâi no nih iti ki înkung a nit.

¹²Amahih keimah neh nangmani neh mîring ringna nei murdihei ranga ki kumtluang thuthlung risinsiana chu a nit.

¹³Sûmah sumrisâng ki înrizâm khi, amakhih keimah neh rammual kâra ki thuthlung risinsiana chu a nit.

¹⁴Rinêng chungah sûm kên zîng ikipah sumrisâng khah sûmah khin ilang a ti.

¹⁵Nangmani neh mîring tinrênghei zianga ki thuthlung, mîring ringna nei rêng rêng inrimang rangin tui kha lian nôk tlak khâi no nih iti hi remai ki ti.

¹⁶Sumrisâng khah sûmah a hong ilangin, en ki ta; khanchu, keimah neh rinêng chunga mîring ringna nei murdihei kâra kumtluang thuthlung khah remai ngai ki ti.

¹⁷Amakhah keimah neh rinêng chunga om mîring ringna nei murdihei kâra ki thuthlung siam risinsiana chu a nit,” a ti a.

¹⁸Rikuang ata hong isuak Nova naipahei chu Sema, Hama, Jafeta hei an nit. Hama khah Kanana pa a nit.

¹⁹Hi pasal ithumkahei hih Nova naipahei chu an nit, rinêng chunga mi om murdihei richibul chu an nit.

²⁰Nova khah loisin mi a nit a, Grep rikul siam masatak a nit.

²¹Uain khah a in a, ân rui a; khanchu, a puan inah a korongboin a zâl tâk a.

²²Hama, Kanana pa khan a pa zâl insual khah a mun chu putiang a suak a, ân zirpui inikahei khah â sîr pêk a.

²³Khanungchu, Sema neh Jafeta khan puan an lâk a, an dâra rizôna nungtianga rithînin puan in sungah khan an lût a, an pa zâl insual khah an rikhû tâk a; an pa korongboi khah an mu nona rangin le tiang an ngat ngit a.

²⁴Nova khah a uain inrui a hong har a, a nai ithlumpa[17] tak Haman a chunga a thil tho dân khah a hong riat tenan chu:

²⁵“Kanana chu vâninsalin om riseh; Ân zirpuihei suakin om riseh.

²⁶Sema Pathian, PUMAPA chu inpâkin om riseh; Kanana chu Sema suakin om riseh.

²⁷Pathianin Jafeta chu inlian sela, Archihei chu Sema mihei neh munkan lêng riseh; Kanana chu Jafeta suakin om riseh,” a ti a.

²⁸Nova khah tui liansâng nungah khan kum rizathumka sômringakah a la ring a.

²⁹Khanchu, kum rizakuakka sômringakah a nit tenan chu a thi tâk a.