Read Biete 2 SAMUELA 1 Bible Online

2 SAMUELA 1 - Biete bible

2 SAMUELA 1

¹Saula thi nung, Davida khan Amalekhei a va rûn zoi a, a hong kîr nôk a, Ziglag khuaah khan sûn nikah a om tâk a.

²A sûn thumnî-ah khan tlangvâl khatkah Saula riabuka rithokin a zuang tlung a. A ngaisiat inlang nan a puanhei â potthlêra a lu-ah ipil a phul a. Ani khah Davida ziangah a fe a, rinênga bokin chubai a ûn a.

³Davida khan a ziangah, “Taktianga rithoka zuang im nî nit?” a ti a. Ani khan, “Israelhei ṭangmuna rithoka zuang ki nit,” a ti a.

⁴Davida khan a ziangah, “Ingkan im thil a om ne ril roh,” a ti a. Ani khan a sâm a, “Ridoina ata ei sipaihei khah lâizâm an tho a, ei mihei itam takkah an that a. Saula neh a naipa Jonathana khom an thi sa tâk,” a ti a.

⁵Davida khan â riltu tlangvâl ziangah khan, “Ingkan im Saula neh a naipa Jonathana khah an thi iti nî riat?” a ti a.

⁶Tlangvâl khan, “Gilboa tlângah khan ki lei va om rop a, Saula khah â fei rinela ding ki mu a, irâlhei tâlihei neh sakor chungchuang mihei lak khan an hong nâi teng tâk a.

⁷Khanungchu, â nungtiang a hei ngatin chu a ne mu a, a ne koi a. ‘Im ki tho thei rang?’ ki ti a.

⁸Khanchu, ki ziangah, ‘Tûm nî nit?’ a ne ti a. Keiman ‘Amalek mi ki nit,’ itin ki sâm a.

⁹Khanungchu, ani khan ki ziangah, ‘Hin hong inla, ne that ta roh, ki sâbehei a natinsat a, kî thi ngêt rang tâk a nit,’ a ti a.

¹⁰Khanchu, a kôlah ki fe a, â lîr kaneh chu ai thi ngêt ngêt rang tâk a nit iti ki riat sikin kî that tâk a nit. Khanungchu, a lua rênglukhum neh â bâna bâla khah ki lâk a, epu, hin ni ziangah ki zuang ichôi a nit,” a ti a.

¹¹Khanungchu, Davida khan ngaisiatin a silbomhei khah â potthlêr tâk a; khangkah ngirah khan a ziangah mi om murdi khan an tho a.

¹²Khanchu, Saula neh a naipa Jonathana hei neh PUMAPA mihei khandaia that an nit tâk sikin Israel mihei khan an sûn a, an ṭâ a, kholoi idênin bu an ngei a.

¹³Davida khan thurchi zuang iriltu tlangvâl ziangah khan, “Taktianga mîm nî nit?” a ti a. Ani khan, “Amalek mi ki nit a; khannisela, nin rama om ki nit,” a ti a.

¹⁴Davida khan a ziangah, “PUMAPA riak inrithu inrimang ranga a chunga kut itlâk khah ingkana ṭino ngân im nî nit?” a ti a.

¹⁵Khanungchu, Davida khan mi khatkah a koi a, “Fen la, va that roh,” a ti a. Amalek mi khah a va sât that tâk a.

¹⁶Davida khan Amalek mi ziangah khan, “Ni thisen chu nangma lu chung ngêiah om riseh. Nangma bâi ngêiin, PUMAPA riak inrithu khah kî that a nit, itin ni înpuang tâk a nit a,” a ti a.

¹⁷Davida khan Saula neh a naipa Jonathana khah hi ṭâ lâah hin a ṭâ a,

¹⁸Hi lâ hih Juda richihei inrisei rangin thu a pêk a; khante, hi lâ hih Jasar Bu-ah riziak inchuang a nit a.

¹⁹“Israel tlângheiah khan ei ruaituhei an thi tâk na! Ei sipai irâthei an ilîr tâk e!

²⁰Gath khuaah khan isîr no unla, Askelon kotsuaheiah khan inpuang no rei; Filistia nainuhei lôm an ta, Sertan ino nainuhei râifânin ipâi an ti.

²¹Gilboa tlângheiah khan rido neh rua tla no seh, Loiheiah khan îte vâng no riseh. Kha munah khan milian ipho khah mualphoi takka paiin a om a, Saula pho ngêi khah riak nâl khâi loiin ai om a nit.

²²Jonathana thalin mihâihei thâi neh thisen a kâi ngûi ngai a; Saula khandai khom irâlhei ata â tlongin kîr ngai mak e.

²³Saula neh Jonathana chu an ditomin, an ṭhat vang na! An ring khomin an thi khomin inṭhen ngai mak e, Mupui nêkan an rât ual a, Sakeibaknei nêkan an irât ual a nit.

²⁴Nangni Israel nainuhei o, Saula khah ṭâ rei, Puan senduk iṭhahein nangni ân rivo a, Rângkachak neh lungiluheia nangni votu khah.

²⁵Mi hâihei khah an ilîr a, Ridoinaah khan an thi tâk e; Jonathana khom itlângah khan a thi tâk.

²⁶O, ken zirpuipa Jonathan, Ni chungthu-ah hin ki bei ai dong a nit; Ki ta rangin ni lut vang na! Lung ni ne thlungna khah arkhêl a, Nupanghei lungthlungna ai khûm a nit.

²⁷Mi hâihei khah an ilîr a, An riamreihei khom an ithla tâk a, armang zoi tâk e,” itin.