Read Biete 2 SAMUELA 10 Bible Online

2 SAMUELA 10 - Biete bible

2 SAMUELA 10

¹Zoro sôt ianka nungah khan Amon rêng Nahasa kha a thi a, a naipa Hanuna kha rêng a hong chang tâk a.

²Rêng Davida khan, “A pa Nahasa khan lung a ne lei înkham angkan kei khomin Hanuna kha lung ken kham rang a nit,” a ti a. Khanchu, Davida khan a pa chungchâng thua thlangam isak rangin ama mihei a tir a. Davida mihei kha Amona richihei ram an va tlungin chu,

³Amona richi lupuihei khan an rêng Hanuna ziangah khan, “Davida hin ni pa a marit sikin thlangam nang isak rangin ama mihei ni ziangah a hong itir nî sôn mani? Ni mak e, Davida hin a ne nê theina ranga hi khuahei hong ienfel ranga enthlâttu rangin ni ziangah anni hi a hong itir a nit hih,” an ti a.

⁴Khanungchu, Hanuna khan Davida mihei khah a man a, an rikhamul kiangkah a voi inkol pêk a, an silbomhei kha artenna takah an pinbul tenan a tan pêk a, a tir ikhîr tâk a.

⁵Insunga hong ikîr nôk kha an izak ok a. Davidan kha thu khah a riatin chu, anni don rangin mi a tir a, “Nin rikhamul a mông sei mâkah chu Jerikoah om hi unla, khanungah khan la hong ta rei,” a ti a.

⁶Amona richihei khan Davida kha irâlin an siam tâk iti an riat tâk a. Khanchu, Amona richihei khan Bethrehoba neh Zoba ata Suria sipai sînginikah, Tob ata mi sînglei sânginikah neh rêng Maaka mi sângkah an iruai a.

⁷Davidan amakhah a lei riatin Joaba neh sipai ridoi mi murdihei kha anni doi rangin a tir a.

⁸Amona richihei kha an hong suak a, an rêng khopui, Raba lûtna kotbâi kôlah khan ṭangmun an siam a; mi danghei Zoba neh Rehoba ata Suria sipaihei neh Toba mihei neh Maaka mihei kha chu a ranin phûlah ṭangmun an siam a.

⁹Khangkan an maton tiang neh an inung tiang irâl lômhei khan an hong idoi rang a nit iti Joaban a riatin Israel sipaihei lâia mi â ṭha ṭha arthlang suak a, Suria mihei idoi rangin ṭangmun a lei siam a.

¹⁰A sipai danghei murdi kha a unaipa Abisaia ruaina nuaiah a sia riai a, Amona richihei idoi rangin ṭangmun a lei siam sa a.

¹¹Joaba khan a unaipa Abisaia ziangah, “Suria mihei ke nê no rangin chu nangman ne hong san ni ta; khante, nangman Amon richihei hi ne nê no rangin chu nang hong san ki ti.

¹²Irât tak neh ihâi takkan om unla, ei mihei neh ei khopuihei isanin pânsal takkan doi ei ti u; PUMAPA khan ṭha a ti lam angkah takin itho ni riseh,” a ti a.

¹³Joaba neh a mihei khan idoi ranga an hei punin chu Suria mihei kha lâizâm an tho tâk a.

¹⁴Amona richihein Suria mihei lâizâm an tho ti an riatin chu anni khom kha Abisaia maah khan lâizâm an tho tâk a, khuaah khan an lût a. Khanungchu, Joaba khan Amona richihei kha a mâkrak a, Jerusalemah a kîr tâk a.

¹⁵Suria mihein Israelhei maah an chan a hong siat tâk iti an lei riatin chu an sipaihei murdi an koi bûm a.

¹⁶Rêng Hadadezera khan mi a tir a, Eufratis vadung sak tianga Suria mihei kha a ṭhui suak a, Zoba rêng Hadadezera sipai ruaitu Sobaka khan ma â ruai a, Helamah an fe a.

¹⁷Amakha Davidan a lei riatin chu Israel sipaihei murdi a bûm a, Jordan dung an rikan a, Helamah khan an fe a. Suria mihei khan Davida doi rangah khan ṭangmun an lei siam a, an lei doi a.

¹⁸Suria mihei kha Israelhei maah khan lâizâm an tho tâk a, Davida neh a mihei khan Suria mi tâli chungchuang mi rizasarikah neh sakor chungchuang mi sîngilikah an that a, an sipai ruaitu Sobaka khom an iphop neng a, ridoina munah khan ai thi tâk a nit.

¹⁹Khangkan Hadadezera thunuaia an rênghei khan Israelhei maah an chan a siat tâk iti an riatin chu, Israelhei neh ringeina an siam a, an thunuaiah an om tâk a. Khanchu, Suria mihei khan Amon mihei khah san ngam khâi mak a.