Read Biete 2 SAMUELA 12 Bible Online

2 SAMUELA 12 - Biete bible

2 SAMUELA 12

¹PUMAPA khan zânthla Nathana kha Davida ziangah a tir a, Nathana kha a fe a, Davida ziangah, “Khua khatkatah hin mi inikah an om a; khatkah kha mi richong a nit a, khatkah kha mi inriang a nit a.

²Mi richong khan bera lôm itam takkah neh sial lôm itam takkah a nei a.

³Mi inriang khan chu ama suma a irchôk berate apui khatkah bang a nei a. A insunga a naihei neh seilian a nit a; ai fâk fâk a înfâk ngai, ama kilât ngêia a în-in ngai, a malpui chunga a îpom a, a nainu angkana ai be a nit a.

⁴Sûnkah chu mi richong ziangah khan khualmi khatkah hi a va tlung a; a zianga mikhual hong itlung kha ama bera neh sial kha thatpui nuam loiin, mi inriang berate kha a va sut a, a mikhual kha ai thatpui tâk a nit,” a ti a.

⁵Davida kha mi richongpa chungah khan a ning a thik tak tak a; Nathana ziangah khan, “PUMAPA ringna chingin kî ti a nit, kha thil ithotu khah ithat zel inrup a nit.

⁶Khangkana thil a tho sik neh lungkhamna a nei no sikin a berate lâk kha a bâk ilikan a thung rang a nit,” a ti a.

⁷Khanchu, Nathana khan Davida ziangah, “Kha mi khah nangmah hi ni nit. PUMAPA Israelhei Pathian khan hingka hin ai ti a nit, Israel rêng rangin riak nang ken rithu a, Saula kut ata nang ki saninzôk a.

⁸A rêng ram neh a nupuihei kha nang ki pêk a; Israelhei chungah neh Judahei chungah rêngin nang ki siam a. Khahei khah a lai roi rai a nitin chu thil danghei khom nang kî pêk nôk rang ni mak im a.

⁹Ithôm ki thupêkhei zôm iloi a, hi thil ṭhano tak hi nî tho tâk? Hit mi Uria kha ridoinaah nen that a, Amona richihei ngêi nen that a; khanungchu, a nupui kha ni nupui rangin ni nei pêk a.

¹⁰Khasikah khan khandai khan ni insungkua kha rikiang tlak no nih, nangmah khan ki thu zôm loiin Hit mi Uria nupui kha ni nupui rangin ni sut tâk a.

¹¹Ringai roh, nangma insungkua lâia rithok ngêiin ni chungah thil ṭhano isuang ki ta, ni mitmu ngêiah ni nupuihei kha nang sut ki ta, ni bungahei pêng ki ti; sûn vârah ni nupuihei kha zâlpui an ti.

¹²Nangman chu inrûkkan sual ni sin a, keiman chu Israel mihei murdi mitmuah sûn vârah khahei khah ki îthlun rang a nit,” a ti a.

¹³Davida khan Nathana ziangah, “PUMAPA chungah thil kî thonsual tâk a nit,” a ti a. Nathana khan a sâm a, “PUMAPA khomin nang â zâ tâk; thi no tin e.

¹⁴Khannisela, hi ni thiltho hin PUMAPA riming nen siat ok sikin ni nai kha chu ai thi ngêt ngêt rang a nit,” a ti a.

¹⁵Khanungchu, Nathana kha a inah a fe tâk a. Uria nupuiin Davida nai ai nei pêk chungah khan PUMAPA khan a kut a tlâk a, dam loiin a nat ok tâk a.

¹⁶Davidan naite ta rangah khan Pathian ziangah a ṭongṭai a. Buhei a ngei a, a chontanah a lût a, zântluanin rinêngah a zâl a.

¹⁷A ina milianhei kha a ziangah an hong a, rinêng ata kâi ithoi an tum a; khannisela, thoi nuam mak a, an ziangah khom bu khalai rikhîl nuam mak a.

¹⁸A sûn sarinin chu naite kha a thi tâk a. Davida milianhei khan naipang kha a thi tâk iti ril kha an ṭi a, “Naite a la dam lâiah khan a ziangah thu ei isîr a, ei ṭong ringai nuam ngai mak a, naite kha a thi tâk iti ingkan im ei iril ngam rang tâk na? Thil ṭhano a tho duai lôiin,” an ti a.

¹⁹Khannisela, Davidan khangkana an risôn sat sat a mun chu naite kha ai thi tâk a nit iti a riat tâk a. Khanchu, Davida khan an ziangah, “Naite kha ai thi tâk na?” a ti a. Anni khan, “O, a thi tâk,” an ti a.

²⁰Khanchu, Davida kha rinêng ata a thoi a, tui arsil a, riak arthu a, a silbom a thleng a. Khanungchu, PUMAPA inah a fe a, Pathian chibai a bûk a. A inah a zuang kîr nôkin chu bu a zong a, a makungah an hong do a, a nêk zel tâk a.

²¹A milianhei khan a ziangah, “Ni thiltho hih ingkah tliam ai nit? Naite kha a la dam lâiah khan buhei ni ngei a, ni ṭap a; khannisela, naite kha a thi phingin chu ni thoi a, buhei ni nêk tâk tlia hi,” an ti a.

²²Davida khan a sâm a, “Naite kha a la dam lâiah khan buhei ki ngeiin ki ṭap ngêi a. Naite kha a dam theina rangin Pumapa khan lung a nen kham duai lôi im kî ti a nit.

²³Nikhomsela, atûnah hin chu a thi tâk a, îtho rang im bu kî ngei khâi rang? Naite kha kî koi ikhîr nôk thei rang im manih? Tik ni manih a ziangah keimah hi ki lai fe rang a nit a; khannisela, ani chu ki ziangah zuang kîr nôk khâi no nih,” a ti a.

²⁴Khanungchu, Davida khan a nupui Bathsebi kha thlangam a sak a, a ziangah a lût a, a zâlpui a, naiipa a nei pêk a, Davida khan a nai riming kha Solomona[4] a sak tâk a. Naipang kha PUMAPA khan lung a thlung a.

²⁵Khanchu, Zânthla Nathana kha a tir a, naipang kha PUMAPA lungthlung a nit sikin naipang riminga khan Jedidiah[5] isak rangin thu a pêk a.

²⁶Kha lâi ngirah khan, Joaba khan Amona richihei khopui Raba kha a rûn mai a, khopui kha a lâk thiai tâk a.

²⁷Joaba khan Davida ziangah mi a tir a, “Raba kha ki rûn a, a tui fâk chu ki lâk tâk a.

²⁸Atûnah hin ni sipai la om murdihei kha bûm inla, khopui kha rûn inla, nangmah ngêiin la roh. Keiman khopui kha ki lâkin chu riming ṭhatna ker put lôiin,” a ti a.

²⁹Khanchu, Davida khan a sipai murdihei kha a bûm a, Rabaah khan an fe a, an va rûn a, an va lâk tâk a.

³⁰Amon richihei pathian Milkom rilima rithokin Davida khan rângkachak rênglukhum her sômithumka ringakah dôra rik kha a lâk a, lukhumah khan lungiluhei khom a kop sa a. Davida khan a lâk a, a lu-ah a khum a. Khopuia rithokin râllâk sum itam takkah an lâk a.

³¹Khopuia mihei kha thing âtnahei, kodâlhei, reipuihei, imangin sin ân tho a, rolunghei ân siam a. Amona richihei khopui murdia mihei kha khangkah khan an tho korong a. Khanungchu, Davida neh a mihei kha Jerusalemah an kîr nôk tâk a.