Read Biete 2 SAMUELA 13 Bible Online

2 SAMUELA 13 - Biete bible

2 SAMUELA 13

¹Davida naipa Absaloma khan farnu mêl iṭha tak a nei a, arming kha Tamari a nit a. Davida naipa ngir Amnona khan ani kha â dit a.

²Khanchu, a farnu Tamari â dit tak tak sikah khan Amnona kha a buai tâk a, dam loiin a om tâk a; Tamari neh munka om rang kha Amnona ta ranga khan ikhir tak a nit a. Tamari kha nungâk rithiang a nit sikin ipa neh rimu kha ikhap a nit a.

³Khannisela, Amnona khan mal a nei a, arming kha Jonadaba a nit a. Davida ulianpa Simeia naipa a nit. Jonadaba kha vârrilet tak a nit a.

⁴Jonadaba khan Amnona ziangah, “Rêng naipa ni nit a, khanniseh, ithôm sûn tin tin nî ngûi ngit ngai hi? Îtho tâk im ni nit?” a ti a. Amona khan a ziangah, “Ken zirpuipa Absaloma farnu hi ki îdit tak tak a nit,” a ti a.

⁵Jonadaba khan a ziangah, “Ne kûnah zâl ṭian inla, damno pelêm thon la, ni pan nang a hong en tikah a ziangah, ‘Ringaiihoi takkan ki farnu Tamari kha ki ziangah hong sela, ibai ne hong infah riseh. Hin ki mu theina ki mitmu ngêiah ifah rang ne siam pêk sela; khanungchu, amah ngêiin khalai chu nen rifûk pêk riseh,’ lei ti roh,” a ti a.

⁶Khanchu, Amona kha a zâl a, damno pelêm a tho tâk a. Rêng Davidan a va enin chu Amnona khan a ziangah, “Ringaiihoi takkan ki farnu Tamari hong sela, ki mitmu ngêiah hin ibai thliam inika manih ne siam pêk sela, ama kuta rithok ngêia khan lei fâng ki ti,” a ti a.

⁷Khanchu, Davida khan Tamari ziangah, “Ni ṭâpa Amnona in tiang fen la, ifah rang va siam pêk roh dua,” itin mi a tir a.

⁸Tamari khan a ṭâpa Amnona in tiangah khan a fe a, ani kha a lei zâl ṭian a. Khante, ibaidi a lâk a, â met a, a mitmuah ibaithliam kha a siam a; khanungchu, a zêi a.

⁹A zêina ata kha a fâk rangin a makungah khan a sia pêk a; nikhomsela, fah nuam mak a. Amnona khan, “Mi murdi hih suak riai riseh,” a ti a. Khanchu, an suak pêk riai tâk a.

¹⁰Amnona khan Tamari ziangah, “Ni kut ngêia rithoka ki fâk theina rangin ifah rang kha chontanah hin hong chôi ta roh,” a ti a. Tamari khan â baithliam siamhei kha a chôi a, a ṭâpa Amnona ziangah chontanah khan a chôi lût a.

¹¹Infah ranga a kôl rêtah a va fepuiin chu a lei man a, a ziangah, “Hong ta, munkan zâl ei ti,” a ti a.

¹²Ani khan a sâm a, “Ni mak e, ki ṭâpa, hi thil mualinphoi tak hi nen tho ten ten no roh dua. Israelhei lâiah hingkana thil hih itho rang ni mak e; hi thilsual porinche tak hi tho no roh.

¹³Ki ta rangin mualinphoina nîng a ta, takâm ki mit ki meng ngam rang? Nang khom Israelhei lâiah hin mi invêta ringai nî nit rang a nit. Khasikin, rêng risônpui inla, ni ne nei kha sêl ual no nih,” a ti a.

¹⁴Khannisela, a ṭong kha ringai mak a; ama nêkan irât lak a rât ual sikin, zâlrâtin a nam de a, a zâlpui tâk a.

¹⁵Khanungchu, Amnona khan nel titakin a nel nôk tâk a, a nelna kha a lei idit lâia a lungthlungna nêk khoma natinsatin ai nel a nit. Khanchu, Amnona khan a ziangah, “Thoi inla, ro zel roh,” a ti a.

¹⁶Tamari khan a ziangah, “Hingka hin chu a nit rang ni mak e. Hingkana dik ino taka ni ne iûmisua hi ki chunga ni thiltho tâk nêk khomah khan ai ṭhat ino ual a nit,” a ti a. Khannisela, Amnona khan a ṭong kha ringai ual mak a.

¹⁷A sinthotu â som kha a koi a, “Hi nupang hi ki ziang ata isua pai inla, inkhâr ikal pêk khap roh,” a ti a.

¹⁸Khanchu, isom khan putiang a ṭhui suak a, inkhâr â kal pêk khap tâk a. Tamari khan zakorfual ze dang danga riziak, kha lâi zoroa rêng nungâk rithianghein an îhâk ngai kha â hâk a.

¹⁹Tamari khan a lu-ah rivut a phul a, a zakorfual kha â potthlêr a, a kutin a mâi a hup a, iring takka ṭap pumin a fe tâk a.

²⁰A ṭâpa Absaloma khan a lei mun chu, a ziangah, “Amnona kha ni ziangah a hong ilût a nit na? Khannisela, ki farnu ner ngai inseh rai no roh. Ani kha ni ṭâpa a nit a; khasikin, hi thu hih tute iril no roh,” a ti a. Khanchu, Tamari kha a ṭâpa Absaloma inah beidong takkan arkhum khap tâk a.

²¹Rêng Davidan kha thil murdi kha a lei riatin chu a ning a thik tak tak a.

²²Absaloma khan a farnu Tamari zâlrâta a ompui pêk sikin Amnona kha nel titakin a nel a, isôn khom isôn viat khâi mak a.

²³Kum inikah a vun nungah khan Efraim kho kôla Baal Hazorah Absaloman a bera mul a voi a; ani khan rêng naipahei murdi kha a fial a.

²⁴Absaloma kha rêng ziangah a fe a, “Rêngpa, ki bera mul ki voi a, nangmah neh ni milianhei kha izuangin ruaiṭhenaah khan zuang ṭang thei ung im?” a ti a.

²⁵Rêng khan Absaloma ziangah, “Ni mak e, ki naipa, kin rêngkan kin zuangin chu ni ta rangin ai rik rai rang a nit,” a ti a. Absaloma khan a ngên tlut tlut a; khannisela, rêng kha fe nuam ual mak a, ṭhat chu a vur a.

²⁶Khanchu, Absaloma khan, “A nit non chu ken zirpuipa Amnona lua kin ziangah zuang riseh,” a ti a. Rêng khan a ziangah, “Ithôm ani kha ai zuang bîk rang?” a ti a.

²⁷Khannisela, Absaloma khan a ngên ngit sikin, Davida khan Amnona neh rêng naipa danghei kha a ziangah ân fe sa tâk a. Absaloma khan ruai roinpuitak â ṭhe a.

²⁸Â somhei kha he a be a, “Amnonan uain a ina ân rui kha lei enchak unla, ithat ranga thu nangni ki pêk kaneh, that rei. Ṭi no rei, a mophurna chu keiman pêl ki ti. Ihâi takkan om unla, lung ôk rikâiin om no rei dua,” a ti a.

²⁹Khanchu, isomhei khan Absaloma he be lam angkan an tho a, Amnona kha an that tâk a. Davida naipahei murdi kha an thoi a, an sakuartung chungah an chuang chit a, lâizâm an tho tâk a.

³⁰Lam lâiah an la om lâiin, “Absaloman rêng naipahei murdi kha a that riai tâk, khatka lua zua mak e,” itin Davida ziangah thurchi a tlung a.

³¹Khanchu, rêng kha a thoi a, a silbomhei kha â potthlêr a, rinêngah a zâl tâk a. Â som murdi a zianga omhei khom khan an silbomhei an ipotthlêr sa a.

³²Khannisela, Davida ulianpa Simeia naipa Jonadaba khan, “Epu, rêng naipa tlangvâl murdihei kha that riai mak e. Amnonna bang kêng â thi. A farnu Tamari kha Amnonan zâlrâta a siatpui pêka rithokah khan Absaloma khan hingkana tho hi ai tum pial tâk a nit.

³³Khasikin, ki pu, Rêngpa hin a naipahei murdi kha an ithi riai tâk a nit iti iamin lungkâng risak no riseh; Amnona bang a nit â thi,” a ti a.

³⁴Absaloma kha chu lâizâm a tho tâk a, râlvêngtu tlangvâl khan a mit ân lêng a, Horonaima rithoka itlâng panga lampuiah khan mi itam takka hong a mu a. Ani kha rêng ziangah a fe a, a thil mu kha a va ril a.

³⁵Jonadaba khan rêng ziangah, “Khahei kha rêng naipahei ihong tâk an nit, ki ti lam angka chia kha ai nit a nit khah,” a ti a.

³⁶A ti zoi kaneh khan rêng naipahei kha an hong tlung a, an ṭap ngûi ngûi a, Davida neh a milianhei khom kha an ṭap ngûi ngûi korong a.

³⁷Absaloma kha chu lâizâm a tho a, Gesur rêng Amihuda naipa Talmaia ziangah a fe a, amakhan kum ithumkah a va om a. Davida khan zoro sôt takkah a naipa Amnona kha a sûn a.

³⁹Khannisela, Amnona thina chungchâng thu-ah khan arthla a hong ringam tenan chu a naipa Absaloma kha arngaia a bei a dong tak tak tâk a.