Read Biete 2 SAMUELA 16 Bible Online

2 SAMUELA 16 - Biete bible

2 SAMUELA 16

¹Davida khan tlângsîp a lôn khêl viat nungah khan, Mefibosetha som Ziba khan a lei don a, sakuartung inikah inrifo a, bailûm rizanikah, grep irâ châr khû rizanikah, fûrthei rizakah neh uain ûmkah a hong chôi a.

²Rêng Davida khan Ziba ziangah khan, “Khahei murdi kha im ni lo rang,” a ti a. Ziba khan, “Sakuartunghei hi rêng insungkuahei chuangna rang a nit a, ibai neh theihei hi tlangvâlhei fâk rang a nit a, uain hi chu ramchâra â sôl murdihei in rang a nit,” a ti a.

³Rêng khan, “Khateh Saula tupa Mefibosetha teh taktiang im ai om?” a ti a. Ziba khan rêng ziangah, “Jerusalema a om a, ‘Vuanah hin Israelhei khan ki pu ram an ne ipêk nôk rang a nit,’ a ti khateh,” a ti a.

⁴Rêng khan Ziba ziangah khan, “Mefibosetha thil nei murdi chu ni ta korong a nit tâk,” a ti a. Ziba khan, “Chibai nang kî bûk titak a nit; O rêngpa Epu, ni mit itlung mai tum ki ti,” a ti a.

⁵Rêng Davida khan Behurim a tlungin chu Saula suapuihei lâia mi Gera naipa Simeia kha a lei hong suak a, a hong pumin vâni a hong sâm thiai a.

⁶Simeia khan Davida neh a milianhei kha lungin a dêng a, a mipui murdi neh a sipai ihâi murdihein Davida kha voitiang neh changtiang an hual pum khomin lungin a dêng a.

⁷Simeia khan vâni a sâm a, hingka hin a ti a, “Fe rimang roh, fe rimang roh. Nangmah thisen isua ngai, miriam iseh pa.

⁸Saula rêng ram kha ni lâk pêk a, atûnah hin Saula insungkuahei thisen kha PUMAPA khan ni chungah a îṭhum tâk a nit. PUMAPA khan ram kha ni naipa Absaloma ai pêk tâk a nit. Thisen isua ngai mi ni nit sikin ni khâtin siatna ni chungah ni îthlun tâk a nit,” a ti a.

⁹Zeruii naipa Abisaia khan rêng ziangah, “Îtho rang im hi mi hin rêngpa ki pu hi vâni ai sâm? Fêng ki ta, a lu la va tan pêk rong dua,” a ti a.

¹⁰Rêng khan Abisaia neh a suapuipa Joaba ziangah khan, “Nangmanin nin ne lei riat pêk rang nang mak e. PUMAPA khan ani kha Davida vâni sâm roh a ti pêk sika vâni a ne isâm a nit inteh tu ngânin im, ‘Îtho rang sika khangkana nî tho manih?’ a ti thei rang a,” a ti a.

¹¹Davida khan Abisaia neh a milianhei murdi ziangah khan, “Ringai ta u, ki naipa, ke rila râ ngêi khan ne that ai tum a nit a; khasikin, hi Benjamin mi vâng hin chu ai tum natinsat ual rang a nit. Khasikin, îte lo no rei, vâni kha ne sâm riseh; Pumapan vâni a ne însâm a nit.

¹²PUMAPA khan ki dengtheizia hi zuk mûng a ta, PUMAPA khan vuaninta vâni a ne însam hi â ṭha tiang a ne thung nôk duai khom a nit thei,” a ti a.

¹³Khanchu, Davida neh a mihei kha lampuiah khan an fe mai a. Simeia khan a môk thal a, itlâng pangah khan a lôn a, a lôn pumah khan vâni a sâm mai a, lunghein a dêng a, pilṭômhei arthe a.

¹⁴Rêng neh a zianga om murdihei khan isôl nengkan Jordan an tlung a, amakhan an sôl an inringam tâk a.

¹⁵Absaloma neh a zianga Israel mi om murdihei kha Jerusalemah an hong lût a, an ziangah khan Ahithofela khom a om a.

¹⁶Ark mi Husaia, Davida malpa khan Absaloma ziang a tlungin chu, â pâi a, “Rêng chu dam sôt riseh, Rêngpa chu dam sôt riseh,” a ti a.

¹⁷Absaloma khan Husaia ziangah, “Hingka hin kêng ai nitna ni malpa lung nen kham dân chu? Ithôm ni malpa ziangah ni fe no?” a ti a.

¹⁸Husaia khan Absaloma ziangah, “Ingkan im ki fe rang? PUMAPA neh hi mipuihei neh Israel mi murdîn an irthlangpu tianga ṭang ki nit. Ni ziangah kî om rang a nit.

¹⁹Tu sin im ki tho rang? A naipa sin ki tho rang ni mak im a? Ni pa sin kî tho ngai angkah khan ni sin kî tho rang a nit,” a ti a.

²⁰Khanungchu, Absaloma khan Ahithofela ziangah, “Ingkan im ei tho rang ner ngai dân isîr roh tho,” a ti a.

²¹Ahithofela khan Absaloma ziangah, “Ni pa thâikêm, in ingâka ai siahei kha zâlpui inla; khanungchu, Israel mi murdîn ni pa theimâk rang sin ni tho iti lei riang an ta; khanchu, ni tianga ṭanghei murdi ithor inrât ok a ti,” a ti a.

²²Khanchu, rêng in chungah Absaloma rang puan in an dâng a; Israel mihei murdi mitmuah Absaloma khan a pa thâikêmhei izâlpui rangin a lût tâk a.

²³Kha lâiah khan chu Ahithofela roisakhei kha chu Pathian thu angkah dôran an ibe ngai a nit; Davida neh Absaloma ngêi khom khan Ahithofela roisak murdi kha an izôm ngai a nit.