Read Biete 2 SAMUELA 17 Bible Online

2 SAMUELA 17 - Biete bible

2 SAMUELA 17

¹Zoro sôt inote nungah khan, Ahithofela khan Absaloma ziangah, “Mi sînglei sânginikah rithlang suak ki ta, vuanzânah hin Davida rizûlin rithok ki ti.

²Arzal lâi neh a lungdong lâi takin va doi ki ta, iṭi rilônthingin om a ta, a ziangah mi om murdi kha lâizâm thông an ta, rêng kha va that ki ti.

³Khanchu, mipuihei kha ni ziangah imoi a pasal zianga hong angkan hong ṭhui riai ki ti. Mi khatkah bang ithat nî nuam a nit; mi danghei chu izôkin om an ti,” a ti a.

⁴Khanchu, kha thu khan Absaloma neh Israel ruaituhei murdi kha ân lôm ok tâk a.

⁵Absaloma khan, “Ark mi Husaia kha koi hi phot unla aman teh im a ti lei ringai rei,” a ti a.

⁶Husaia a hong tlungin chu Absaloma khan, “Ahithofela khan hingka hin a ti a, a ti lam angkah hin ei itho rang im ai nit? A nit non chu nangman teh im ner ngai dân?” a ti a.

⁷Husaia khan Absaloma ziangah, “Atûna ṭuma Ahithofela roisak hi ai ṭhat ino a nit.

⁸Ni pa neh a mihei kha ni riat a, sipai ihâi inthang, lung ikhir tak, phûla ivom, a te lah pêk angkah dôra hâi an nit a. Ni pa kha ridoi mi a nit a, mipui lâiah riak kher no nih.

⁹Atûn khomah hin taktiang ipûka manih arbîk ṭian khom a nit thei. Ridoi nin phut chak kaneh ni mihei an thi duaiin chu â ria murdîn, ‘Davidan a zuang doi a, Absaloma zuituhei kha an that inê tâk,’ an iti rang a nit.

¹⁰Khanchu, sipai ihâi tak, sakeibaknei angkah dôra hâi khom an lei îndôp zoi rang a nit; Israel mi murdi lak khan ni pa kha sipai ihâi tak a nit iti neh a zianga mi omhei kha mi hâi tak tak an nit iti an riat riai a.

¹¹Keima roisak dânin chu, Israel mihei, Dan neh Beerseba kâra om murdihei kha tuikhangliana ṭiai zâkan ni ziangah koi bûm riai inla, ridoinaah khan nangmah ngêiin ma ruai roh.

¹²Khanchu, Davida kha tak munah khom ei tong fûkna takah, rinênga rido thla angkah dôran doi ei ta; amah neh a zianga mi om murdihei kha khatka lua zua no min e.

¹³Khuaah â tlân lûtin chu ei mihei murdîn rui ichôiin kha khuaah khan va fêng ei ta, lung tehei khom om loi khopin vadunga nûkiṭhul riai ei ti,” a ti a.

¹⁴Khanchu, Absaloma neh Israel mi murdihei khan, “Ark mi Husaia roisak kha Ahithofela roisak nêka khan a ṭhat ual,” an ti tâk a. Absaloma chunga thil ṭhano a tlung theina rangin PUMAPA khan Ahithofela roisak iṭha tak kha zôm loi rangin a lei înkung thlâm tâk a nit.

¹⁵Khanungchu, Husaia khan thiampu Zadoka neh Abiathara ziangah khan Ahithofelan Absaloma neh Israel ruaituhei roi a sakpui dân neh a man roi a sakpui dân murdi kha â ril tâk a.

¹⁶Khanchu, Husaia khan, “Atûnah hin rimot rei, ‘Vuanzân chu ramchâra Jordan vadung kâinaheiah khan riak khâi loiin rikan ngêt ngêt rei; khanonchu, rêng neh a zianga om murdihei kha an irmang riai rang a nit,’ itin Davida vân ril zel rei,” a ti a.

¹⁷Abiathara naipa Jonathana neh Zadoka naipa Ahimaaza kha Enrogelah an om a, khopui an lût min an mu rang an ngam no sikin Jerusalem kho kôlah khan an iom a nit. Suaknu khatkah hin thil omdân murdi a va ril mai ngai a, anni khan rêng Davida kha an va îril nôk ngai a nit.

¹⁸Nikhomsela, sûnkah chu naipang khatkah hin anni kha a lei mu a, Absaloma â ril a; khanchu, anni kha ribih rangin Bahurima mi khatka inah rimot takkan an fe a. Ani khan a in tualah khan tuisunsua a nei a, amakhan an lût tâk a.

¹⁹Khâmpa nupui khan tuisunsua sîngnan a sîng a, tute riat thei nona rangin a chungah khan bu a phoi a.

²⁰Absaloma mihei kha inah khan an hong a, nupangnu ziangah khan, “Ahimaaza neh Jonathana hei kha taktiang im an iom?” an ti a. Khante, nupangnu khan an ziangah, “Vadung rikan tâng an ti,” a lei ti a. An va zong a; khannisela, mu mak a, khanchu, Jerusalemah an kîr nôk tâk a.

²¹An fe zoi nungah khan Ahimaaza neh Jonathana kha tuisunsua ata kha an hong suak a, rêng Davida kha an va ril a. Ahithofelan a phiarrûk dânhei kha an iril a, a ziangah, “Rimot unla, vadung kha rikan zel rei,” an ti a.

²²Khanchu, Davida neh a mihei murdi khan Jordan dung an rikan zel tâk a, khua a hong vârin chu an rêngkan an rikan zoi riai tâk a.

²³Ahithofelan a roisak kha zôm mak iti a riatin chu a sakuartung ân rifo a, a suak a, ama khuaah a fe tâk a. A insungkuahei vângsak rang dân ân rifûk pêk diam a, arkhâi that tâk a. Khanchu, an insungkua thlânah an phûm tâk a.

²⁴Absaloma neh a zianga Israel mi murdihei khan Jordan dung an rikan lâiah khan Davida chu Mahanaim khua a lei tlung tâk a.

²⁵Absaloma khan Joaba rithûlin Amasa kha sipai ruaitun a phun a. Amasa kha Ismael mi Jethera naipa a nit a; a nu kha Nahasa nainu Abigaili a nit a, Joaba nu Zeruii inzirpuinu a nit.

²⁶Absaloma neh a mihei khan Gilead ramah ṭangmun an va khuar a.

²⁷Davida khan Mahanaim khua a va tlungin chu Amona richi Raba khuaa mi Nahasa naipa Sobia hei, Lodebar khuaa mi Amiela naipa Makira hei, Rogelim khuaa Gilead mi Barzilaia hei khan an lei hong don a.

²⁸Davida neh a mihei kha ramchârah khan voniṭâm, tuirihâlin, an sôl tak tak tâk iti an riat a. Anni khan puantha hei, rihûm hei, ipil bêlhei, an hong chôi pêk a. Khabanah, bu hei, barli hei, ibaidi hei, buzêi hei, ibe hei, chana hei, khuaitui hei, dûtthâi hei, dûtdâl hei neh bera hei kha Davida neh a zianga mi omhei fâk rangin an hong chôi pêk sa a.