Read Biete 2 SAMUELA 18 Bible Online

2 SAMUELA 18 - Biete bible

2 SAMUELA 18

¹Davida khan a zianga mi omhei murdi kha a bûm riai a, sângkah pôl, rizaka pôlin a ṭhen a, an chungah ruaitu a sia chit a.

²Khanungchu, Davida khan a mihei kha pôl ithumkan a tir suak a, pôlkah kha Joaban â rui a, pôlkah kha Joaba unaipa Abisaian â rui a, pôlkah kha Git mi Itaian â rui a. Rêng khan a mihei ziangah khan, “Keimah khom nin ziangah fe sa zel ki ti,” a ti a.

³Khannisela, mipuihei khan, “Nang chu kin ziangah fe sa no tin e. Keinihei hi chu lâizâm tho ta ngân khom unlang, irâlhei khan îte ben be no ni a; arzâtkah va thi khom unlang; îte ben be viat no nih. Khannisela, nang chu keinihei sîngka tlukin nî lut a nit. Khasikin, khopuia nî om ṭian a, ne san rang nî tir kha ai ṭhat ual a nit,” an ti a.

⁴Rêng khan an ziangah, “Ṭha nin ti lam takkah khan thông ki ti,” a ti a. Khanungchu, rêng kha kul kotbâi kôlah khan â ding a, a mihei murdi kha rizah têl têl neh sâng têl têlin an suak zun zun tâk a.

⁵Rêng khan Joaba neh Abisaia neh Itaia kha, “Keima sikin tlangvâl Absaloma kha van nah no rei dua,” a ti a. Sipaihei murdîn Absaloma chungchâng thua rêngin a sipai ruaituhei zianga ai ti kha an riat a.

⁶Davida sipaihei kha ramkâr tiang an fe a, Israel mihei kha Efraim ramkârah khan an doi tâk a.

⁷Davida mihei khan Israel mihei chu an inê tâk a, kha nî-ah khan mi sînginikah an that a.

⁸Kha lâi ram kil tinah khan an ridoi a; kha nî-ah khan khandaia thi nêkan rampuia ilum ibâ tonga thi an itam ual a nit.

⁹Absaloma khan Davida mihei kha a va tong thut a. Absaloma kha sakuartung chungah a chuang a, sakuartung kha saso thing thuaiah â tlân a. Absaloma lu kha saso thing iṭangah khan â tâng tâk a, a sakuartung kha â tlân thal a, Absaloma chu thing iṭangah artûl ṭian tâk a.

¹⁰Davida mi khatkah hin a mu a, Joaba â ril a, “Epu saso thingah Absaloma rikhâi ṭian ki mu,” a ti a.

¹¹Joaba khan â riltu ziangah khan, “Ni mun teh, ithôm khan zel ni that no? Khangkan thon la chu tangka sômkah neh kongkhit nang kî pêk rang pial,” a ti a.

¹²Khannisela, kha mi khan Joaba ziangah, “Tangka sângkah khom ne pen la, rêng naipa chungah ki kut rêng rêng tlâk no ning e. Kin riat ngêiah khan rêngin nangmah neh Abisaia neh Itaia ziangah, ‘Keima sikin tlangvâl Absaloma kha chu innah no rei,’ itin thu nangni ai pêk a nit a.

¹³Rêng thu zôm loiin lei that ringot ta khom inlang rêng khan lei riang a ta, rêng ziangah khan îte ithup lak ni no ni a, nangmah lak chu rilîm phar nôk ni ta,” a ti a.

¹⁴Joaba khan, “Hingka hin ni ziangah zoro inhek thei no ning e,” a ti a. Khanchu, ifei ithumkah a chôi a, saso thing iṭanga ritûl ṭiana la lei iring mai Absaloma ṭângribuah khan a sun a.

¹⁵Khanungchu, Joaba râlthluk ichôitu sipai sômkah khan an hong nâi a, Absaloma kha an sun a, an that tâk a.

¹⁶Joaba khan risual mongna rangin bekul ân tum a, Israel mihei rizûltu a sipaihei kha an hong kîr nôk tâk a.

¹⁷Absaloma ruak kha an lâk a, rampui nuaiah ṭênkhuruk inthûk takah khan an pai tâk a, a chungah lung an dêngbûm a. Israel mihei murdi kha mahni in tiang lâizâm an tho seng tâk a.

¹⁸Absaloma khan a dam lâiin Rêng phâiah khan ama riatmaina rangin lung a lei bukin richuan thlâm tâk a, “Ker ming a dâi nona rangin naipa lak khom nei mang a,” a ti a. Kha lung richuan rimingah khan ama riming inriputin; atûn ten idênin “Absaloma Riatmaina” iti a nit.

¹⁹Khanungchu, Zadoka naipa Ahimaaza khan, “Va tlân ki ta, PUMAPA khan â râl phuba a lâk pêk dân thurchi hi rêng kha la va ril rong dua,” a ti a.

²⁰Joaba khan a ziangah, “Vuani chu îte thurchi la va ril no roh, sûn dangah thurchi kha la va ril roh, rêng naipa kha a thi tâk pial a nit a, vuani chu thurchi îte va ril no roh,” a ti a.

²¹Khanungchu, Joaba khan Kus mi ziangah khan, “Fen la, ni thil mu rêng va ril roh,” a ti a. Kus mi khan Joaba kha ikhûnin chibai a bûk a, â tlân tâk a.

²²Ahimaaza khan Joaba ziangah, “Îkhom ni sela, ringaiihoi takkan thurchi kha la va thlun sa rong,” a ti a. Joaba khan, “Ki naipa, thurchi ril man kha îte lak mu no tin a, irang im ni va itlân rang?” a ti a.

²³Nikhomseh, Ahimaaza khan, “Îkhom ni sela, kî fe nuam a nit,” a ti nôk a. Khanungchu, Joaba khan, “Khateh fe ta roh,” a ti a. Khanchu, Ahimaaza kha phâizôl tiang lampuiah â tlân a, Kus mi kha a khêl a.

²⁴Davida kha kul kotbâi putiang neh sungtiang kârah khan a lei iṭhung a. Râlvêngtu kha kul kotbâi putiang ual chungtiangah khan a hang lui a, a hang iding a, a hang thlîr vêlin chu mi khatkah a khât banga hong itlân hi a mu a.

²⁵Râlvêngtu kha â khêk a, rêng kha â ril a. Rêng khan, “Mi khatkah bang a nitin chu thu ṭha hong iril rang ni ngêt a ti,” a ti a. A hong itlântu kha a hong nâi tîr tîr tâk a.

²⁶Khanungchu, râlvêngtu khan mi dang a khât banga hong itlân a mu nôk a. Râlvêngtu khan kotbâi vêngtu kha â sam a, “En ta mi dang ama khât banga hong itlân a om nôk sa,” a ti a. Rêng khan, “Ani khomin thu ṭha a hong îthlun sa rang a nit khah,” a ti a.

²⁷Râlvêngtu khan, “Ma hong isah ual a, tlân dân so chu Zadoka naipa Ahimaaza tlân dân a angin ki riat,” a ti a. Rêng khan, “Ani kha mi ṭha tak a nit a, thu ṭha a hong îthlun rang nîng a ti,” a ti a.

²⁸Ahimaaza khan â khêk a, rêng ziangah, “A ṭhat korong,” a ti a. Khante, a mâia rinêng isikin rêng makungah khan chibai ibûkin â khûn a, “Rêngpa nang idoia kut itlâk itumtuhei chunga nêna nang ipetu PUMAPA, ni Pathian chu inpâkin om riseh,” a ti a.

²⁹Rêng khan, “Tlangvâl Absaloma kha a la dam ti roh na?” a ti a. Ahimaaza khan a sâm a, “Epu, ni sipai ruaitu Joaba khan a ne tir suak lâiah khan an buai suai suai ki mu a; khannisela, im ai nit chia chu nang ki îril thei ino a nit,” a ti a.

³⁰Khante, rêng khan, “Khan lei iding hi roh,” a ti a. Arthîn a, a lei iding tâk a.

³¹Khanungchu, Kus mi kha a hong tlung a, rêng ziangah khan, “Rêngpa, epu ni ta rang thu ṭha ki hong îthlun a nit. Ni chunga rihelhei murdi phuba kha vuanah hin PUMAPA khan nang ai lâk pêk tâk a nit,” a ti a.

³²Rêng khan Kus mi ziangah khan, “Tlangvâl Absaloma kha a la dam ti roh na?” a ti a. Kus mi khan a sâm a, “Epu, ne râlhei neh ni siatna zongtuhei murdi chu kha tlangvâl angkah khan om riai riseh,” a ti a.

³³Khanchu, rêng kha ngaisiatnan a hong de tâk a. Kul kotbâi chunga chontanah khan a fe a, a ṭap a. A ṭap pumah khan, “O ki naipa Absalom, ki naipa! Ki naipa Absalom! Ki naipa, ner thûlah hin keimah ki lei ithi ni sela chu o! O Absalom, ki naipa! Ki naipa!” a ti a.