Read Biete 2 SAMUELA 19 Bible Online

2 SAMUELA 19 - Biete bible

2 SAMUELA 19

¹Joaba kha an iril a, “Rêng khan Absaloma kha a ṭâ a, a sûn a,” an ti a.

²Khanchu, kha nî-ah khan rêng kha a naipa sikah khan a bei a dong tak tak iti kha mipuihei khan an lei riat sikin an inêna râifân kha mi murdi ta rangin ringaisiatna nî a hong nit tâk a.

³Sipaihei kha ridoinaa lâizâm itho, izak sika idâirekka an ihong ngai angkan, kha nî-ah khan idâirekkan khopui an hong lût a.

⁴Rêng khan a mâi â hûp a, “O ki naipa Absalom, O Absalom ki naipa, ki naipa,” itin a ṭap ngûi ngûi a.

⁵Joaba kha rêng inah a va fe a, rêng ziangah khan, “Ni ringnahei, ni naipahei neh ni nainuhei ringna neh ni nupuihei neh ni thâikêmhei ringna inzôktu ni mihei kha vuanah hin mâimôk nî sak a nit.

⁶Nangmah lung nang ithlungtuhei inelin, nangma neltuhei lung nî thlung a nit hi. Ni sipai ruaituhei neh ni mihei kha ni ta rangin îte an nit nozia ni înlang a nit. Absaloma kha ring sela, keinihei murdi hi thi unlang nî lôm ual rang a nit hih.

⁷Khasikin, thoi inla, suak zel inla, ni mihei lungtluk lam takkan thu sîr roh. Khangkan ni tho no a nitin chu PUMAPA riming ichingin kî ti a nit, naktûk zîng tenan chu ni ziangah mi khatka lua om khâi no nih. Amakha ni ta rangin ni ringnuna atûn tena ni chunga thil ṭhano tlung murdia â ṭhano natinsat tak nîng a ti,” a ti a.

⁸Khanungchu, rêng kha a thoi a, a fe a, kul kotbâi kôlah khan â ṭhung iti an riatin chu an rêngkan a kôlah an hong ribûm tâk a. Israelhei kha chu mahni puan in chitah lâizâm an tho tâk a.

⁹Ram pumpuiah khan, “Rêng Davida khan ei irâlhei kut ata a nen zôk a. Filistia mihei kut ata a nen zôk tâk a; khannisela, atûnah hin hi rama rithokah hin Absaloma ṭin lâizâm a tho tâk a.

¹⁰Absaloma ei rêng ranga riak ei înrithu laka kha ridoinaah a thi tâk a. Khasikin, itho sikin im Rêng Davida kha tute zelin koi kîr zâi ei rêl no,” itin Israel mihei murdi kha an risêl vung tâk a.

¹¹Israel mihein rêng iṭhui kîr thu an îsîr kha Rêng Davida kuar a hong tlung tâk a. Rêng Davida khan thiampu Zadoka neh Abiathara ziangah mi a tir a; “Juda ulianhei ziangah hingka hin va ti rei, ‘Îtho sik im rêng kha a in tianga ṭhui kîr thu-ah arvuak isôt takah nin iṭang?

¹²Ki suapuihei nin nit a, ki thisen rizompui nin nit a; ithôm rêng ṭhui kîr nôk thu-ah arvuak isôt taka ṭang rang im nin init?’ va ti unla;

¹³Amasa ziangah khom, ‘Ki thisen rizompui ni mak chêm a? Atûna rithokah hin Joaba rithûlin ki sipai ruaitun nang ki siam noa a nitin chu Pathianin ai lo lo ne lo sela, kha nêka natinsat khomin ki chungah tho riseh,’ a ti, va ti sa rei” a ti a.

¹⁴Khanchu, Juda mihei murdi lungril kha Davida tiang â thlêk riai tâk a; khanchu, rêng ziangah, “Ni mihei murdi neh khan hong kîr nôk rei,” iti rangin mi an hong tir a.

¹⁵Khanchu, Rêng kha a hong kîr a, Jordan dung tenah a hong a, Jordan dung lei ṭhui ikhâi rangin Juda mihei kha Gilgalah an lei zuang a.

¹⁶Kha lâi ngirah khan Behurim khuaa mi Benjamin mi Gera naipa Simeia khom kha rimot takkan Rêng Davida don rangin Judahei rualin Jordanah a fe sa a.

¹⁷A ziangah Benjamin mi sîngka ṭhuiin a zuang a, Saula insungkua enkoltu Ziba neh a naipahei sômleiringakah neh â som sôminikahei khom rêng tlung man Jordan dung an zuang tlung a.

¹⁸Rêng insungkuahei ṭhui ikhâi rang neh rêngin ṭha ai ti murdi tho rangin Jordan dung an rikan tâk a. Rêng kha Jordan dung rikan ranga arfo diam lâiah khan Gera naipa Simeia kha rêng makungah khan â bok a.

¹⁹Rêng ziangah khan, “Epu Jerusalem ni mâk nî-a dik ino takka ki lei itho tâk kha ringaiihoi takkan ner ngil pêk roh. Siatna neiin ne be non la, ne reh pêk khâi no roh.

²⁰Epu, thil kî thonsual a nit itin ker riat suak a; khasikin, mâr tiang namhei murdi lâia nang idon ranga vuanah hin zuang suak masa tak kî chang a nit,” a ti a.

²¹Zeruii naipa Abisaia khan, “PUMAPA riak inrithu kha vâni a sâm sikin Simeia hi ithat rang a nit,” a ti a.

²²Khannisela, Davida khan Abisaia neh a ulianpa Joaba ziangah khan, “Nin ringai dân iril rangin tûm nangni phût? Nin ne înbuai rang im ai nit? Vuanah hin Israel rêng kha keimah kêng kî nit; khasikin, vuanah hin Israel mi rêng rêng ithat rang ni mak e,” a ti a.

²³Rêng khan Simeia ziangah khan, “Ithat ni no tin e,” itin ṭong arkhâm tâk a.

²⁴Khanungchu, Saula tupa Mefibosetha kha rêng idon rangin a zuang a. Rêngin Jerusalem a mâk nî-a rithoka râlringama a hong kîr nôk nî dênah khan Mefibosetha kha a kehei risuh mak a, arkha mul ep inrual mak a, a puanhei khom risuh mak a.

²⁵Rêng idon ranga Jerusalema rithoka a zuang tlungin chu, rêng khan a ziangah, “Mefiboseth, ithôm ki ziangah ni fe sa no?” a ti a.

²⁶Ani khan a sâm a, “O Rêngpa, ke bâi ki nit iti ni riat a. Ke som ziangah khan, ‘Rêng fe ruala fe ranga ki chuangna rang sakuartung inrifo roh,’ ki ti a. Khannisela, ani khan a ne ilêm a nit.

²⁷Khante, O Rêngpa, ni ziangah ke som khan a ne no a; nikhomsela, nang chu Pathian vântirtôn angkah ni nit a; khasikin, ṭha ni ti lam angkah takin tho roh.

²⁸Ki pa insungkuahei murdi kha O Rêngpa, Epu ni that riai inrup an nit. Khanniseh, ne som hi ni khalai rikhîlpuihei lâiah nen ṭang a. Khasikin, rêng ziangah thil dang ditsakna zong ngam rua zel ni khâi mang e,” a ti a.

²⁹Rêng khan a ziangah, “Ni chungchâng thu îte ni ti nang khâi mak. Saula thil nei murdi nangmah neh Ziba khan risem rei,” a ti a.

³⁰Mefibosetha khan rêng ziangah, “Ziba khan dong riai riseh. Rêngpa kha ama inah izôkriamka a hong itlung nôk hi ki ta rangin chu a înrup a nit,” a ti a.

³¹Gilead mi Barzilaia kha Rogelima rithokin rêng kha Jordana ṭhui ikhâi rangin a lei zuang a.

³²Barzilaia kha kum sômiriatkah mi a nit tâk a. Mi richong tak a nit a, Mahanaimah rêng kha a om sungah khan ifah rang a lei idoi chir a nit.

³³Rêng khan Barzilaia ziangah khan, “Ki ziangah Jerusalema hong roh, keiman nang enkol ki ti,” a ti a.

³⁴Khannisela, Barzilaia khan rêng ziangah, “Itena dam sôt khâi rang im ki nit a; îtho rang im Jerusalema rêng ziangah kî fe sa rang?

³⁵Atûnah hin kum sômiriatkah ki nit tâk a, îte zelin fânna ne peh thei khâi mak a. Kî fâk kî in lak khom a tui a thâi reh thei khâi mang a, lâ saktuhei lasak irî lak reh thei khâi mang a. Khasikin, ni ta ranga puakrik ringot kî nit rang a nit.

³⁶Khangkah dôrka ṭhatna roinpui idong rang ritluk mang e. Khasikin, Jordan râl kâi nungin itôitekah ni ziangah fêng ki ta;

³⁷khanungchu, ringaiihoi takkan ki in tiang nen kîr nôk inla, ki nu neh ki pa thlân omna keimani khua ngêiah thîng ki ti. Khannisela, en ta, hih ki naipa Chimhama, ani hin ni sin tho riseh; ni ziangah ṭhui inla, a chungah ṭha ni ti lam angkah takin tho roh,” a ti a.

³⁸Khante, rêng khan a sâm a, “Chimhama chu ki ziangah ṭhui ki ta, ni nuam lam angkah takin a chungah thông ki ti. Thil îkhom ni ne inî kangân chu nang tho pêk mai ki ti,” a ti a.

³⁹Khanungchu, Davida neh a mihei murdi khan Jordan râl an kâi tâk a. Rêng khan Barzilaia kha a fôp a, ṭhat a vur tâk a. Khante, Barzilaia chu a in tiang a kîr tâk a.

⁴⁰Juda mi murdi neh Israel mi arzâtkahei khan Rêng kha Jordan an ṭhui ikhâi zoiah khan, rêng kha Gilgalah a fe a, Chimhama kha a ziangah a fe sa a.

⁴¹Khanungchu, Israel mi murdi kha rêng ziangah an fe a, rêng ziangah khan, “O Rêngpa, ithôm kin suapui Juda mihei hin an dongtum bîka nang an iben, nangmah neh ni insungkuahei neh ni mihei murdi khom Jordan râlah nangni an iṭhui zit riai hi?” an ti a.

⁴²Juda mihei murdi khan Israel mihei kha an sâm a, “Rêng chu kin takiti a nit sikin a nit. Îtho sik im hi thu-ah hin ning nin înthik? Rêng thil nei isabeia om im kin nit a? Thilpêk imanih te khom a ne pêk im a?” an ti a.

⁴³Israel mihei khan Juda mihei kha an sâm a, “Nin takiti ni khom sela, rêng Davida rêng inchang thu chu a bâk sômkah thu kin inei kêng ai nit. Khangkan ne enkhûm no rei. Rêng ṭhui kîr nôk rang thu kha keimani kêng â ti masa,” an ti a. Khannisela hi thu-ah hin Juda mihei kha Israel mihei nêka khan an inrum ual tâk a.