Read Biete 2 SAMUELA 2 Bible Online

2 SAMUELA 2 - Biete bible

2 SAMUELA 2

¹Kha rizoiah khan Davida khan, “Judai rama khua tak khôka manih ki hang ife rang im?” itin PUMAPA â sôn a. PUMAPA khan a ziangah, “Hang fe roh,” a ti a. Davida khan, “Tak khua takâm ki hang fe rang?” a ti a. PUMAPA khan, “Hebronah,” a ti a.

²Khanchu, Davida kha Hebronah a hang fe tâk a, a nupuihei ruai Jezreel mi Ahinoami neh Karmel mi Nabala nupui Abigaili hei khah a ṭhui a.

³Davida khan a mihei neh an insungkuahei chit khom kha a ṭhui sa a, Hebron kôlvêla khuaheiah khan an om tâk a.

⁴Khanungchu, Judai rama mihei kha Hebronah an hong a, Judai ram rêng rangin Davida kha riak an inrithu a. Davida khan Saula phûmtuhei khah Jabes Gilead mihei an nit iti a riatin chu,

⁵an ziangah khan mi a tir a, an ziangah, “Nin rêng Saula chunga nin iamom zia inlangin nin lei phûm sikin PUMAPA khan ṭhat nangni vur riseh.

⁶PUMAPA khan nin chungah lungkhamna neh thutak inlang sela; hi thil nin tho sikah hin kei khomin nin chungah iṭha takkan thông ki ti.

⁷Irât neh ihâi takkan om rei. Nin rêng Saula chu a thi tâk a, Juda richihei khan an rêng rangin riak an ne înrithu tâk a nit,” a ti a.

⁸Nera naipa Abnera, Saula sipaihei ruaitu khah Saula naipa Isbosetha neh khan Jordan râl Mahanaimah lâizâm an tho a.

⁹Amakhan Abnera khan Isbosetha kha Gilead ram hei, Aser ram hei, Jezreel ram hei, Efraim ram hei, Benjamin ram hei neh Israel ram pumpui chunga rêng rangin a phun tâk a.

¹⁰Saula naipa Isbosetha kha Israel chungah ân lal phut lâiah khan kum sômilikah mi a nit a, kum inikah a înlal a nit. Khannisela, Juda mihei khan Davida chungah an iamom ngit a,

¹¹Davidan Hebronah khan Juda richihei chungah kum sarikah neh thla rukkah roi ai rêl a nit.

¹²Isbosetha milianhei neh Abnera kha Mahanaim ata an suak a, Gibeonah an fe a.

¹³Zeruii naipa Joaba neh Davida milian danghei khan Gibeon dîl rikamah khan an ritongpui a; khanchu, lômkah kha dîl râl kiangtiang pangah an iṭhung a, lômkah kha kiangtiang pang dîl râlah an îṭhung a nit.

¹⁴Abnera khan Joaba ziangah, “Kiangtiang, kiangtiang rizât bangkan tlangvâlhei rithlang ei ta, risual riseh,” a ti a. Joaba khan, “A ṭhat,” a ti a.

¹⁵Khanchu, Benjamina richi, Isbosetha tianga ṭang mi sômleiinikah neh Davida tianga ṭang mi sômleiinikah kha an hong suak a.

¹⁶An ri-otpuihei chit kha an lu chitah an riman a, mahni bitum chit khah khandaiin an kângah an risun chit a; khanchu, mi sôminikah ilikahei khah an rêngkan an ilîr riai a, an thi tâk a. Khasikah khan kha mun khah Helkat Hazurim[1] an ti tak a, amakhah khandai mun tina a nit a, Gibeona om a nit.

¹⁷Khanungchu, kha nî-ah khan ridoipui a suak tâk a; Abnera neh Israel mihei khah Davida mihei ata kha an tlôm tâk a.

¹⁸Kha munah khan Zeruii naipahei ithumkah Joaba, Abisaia neh Asahela hei an om a. Asahela kha sazuk angkah dôra tlân irât a nit a.

¹⁹Khanchu, Asahela khan Abnera kha arzûl a; Abnera a irzûl kha voitiang manih changtiang manih pêt viat loiin arzûl thal thal a.

²⁰Abnera khah a hang rihela, “Nangma kêng nî nit na, Asahel?” a hang ti a. Asahela khan a sâm a, “O keimah ki nit,” a ti a.

²¹Abnera khan a ziangah, “Ner zûl khâi no roh, ne changtiang manih ne voitiang manih pêt inla, tlangvâl khatkah kha man inla, a râlthluk rivona kha lah pêk roh,” a ti a. Khannisela, Asahela khan Abnera khah arzûl ngit a.

²²Â thar vangin Abnera khan Asahela ziangah, “Ner zûl khâi no roh, îtho rang im nang kî sun that rang? Ingkan im ni ulianpa Joaba mêl ki mu ngam rang a?” a ti nôk a.

²³Khannisela, Asahela khan pêt nuam ual mak a; khanchu, Abnera khan â fei môr tiang a phûngah a sun a, ifei khan â nung tiang a len thal a, Asahela kha rinêngah â lîr a, a thi tâk a. Khante, Asahela â lîr a, a thina mun hong itlungkah chu an ringam a, an iding ṭian tâk a.

²⁴Khannisela, Joaba neh Abisaia khan Abnera khah an rizûl mai a; Gibeon ramchâr lampuia Gia sak tiang Amma tlâng an tlungin chu inî a tlâk tâk a.

²⁵Benjamina richihei kha Abnera ziangah an ribûm a, pôl khatkan an risiam a, itlângsîpah khan sirsan an va lâk a.

²⁶Khanungchu, Abnera khan Joaba â sam a, “Kumkhuakan ei irdoi mai rang tâk manih? A mongna chu beidong ngaisiat iom tak ai nit rang a nit iti ni riat im? Itena sôt im ni mihei khah an suapuihei rizûl imong rangin ni îril rang hi?” a ti a.

²⁷Joaba khan, “Pathian ringna chingin kî ti a nit, îte ti non la chu naktûk zîng idênin ki mihein nangni an irzûl rang a nit,” a ti a.

²⁸Khanungchu, Joaba khan bekul khah a hang tum a, mipuihei kha an iding ṭhup a, Israel mihei kha rizûl khâi mak a; khanchu, ridoi nôk khâi mak e.

²⁹Abnera neh a mihei khah Jordan phâi an pâl thleng a zântluanin an lôn a; Jordan dung an rikan a, atûk zîng a zîng itlungin an lôn nôk a, Mahanaim an tlung nôk tâk a.

³⁰Joaba kha Abnera rizûl a kîr nôkin chu, a mihei murdi a bûm riai a, mi sômleiikuakkah neh Asahela rikip khâi mak iti an mu suak a.

³¹Davida mihei khan Benjamina nama rithoka Abnera mihei kha rizathumkah sôminikah an that a.

³²Joaba neh a mihei khan Asahela ruak khah an chôi a, Bethlehema a pa thlânah an phûm a. Khanungchu, Joaba neh a mihei khah zântluanin an fe a, khua a vârin chu Hebron an tlung tâk a.