Read Biete 2 SAMUELA 20 Bible Online

2 SAMUELA 20 - Biete bible

2 SAMUELA 20

¹Gilgalah khan Benjamina nama mi Bikria naipa Seba; mi nunsia khatkah hi a lei om a. Ani khan bekul a tum a, “Davida ziangah hin dongtum nei mang meh, zui no min u; O Israel mihei mahni in chitah kîr tâng ei ti u,” a ti a.

²Khanchu, Israel mi murdîn Davida zui khâi loiin Seba rualin an rot tâk a; khannisela, Juda mihei kha chu an det mai a, Davida kha Jordana rithokin Jerusalem idênin an zui tâk a.

³Davida khan Jerusalema a rêng in kha a tlungin chu, a thâikêm sômkah in ingâk ranga ai siahei kha a ṭhui a, a khum khap tâk a, an inang murdi a tum pêk a; khannisela, anni kha zâlpui khâi mak a. Khangkan an thi nî dêna ikhum khapa omin, numeiin an om tâk a.

⁴Rêng khan Amasa ziangah, “Sûn thumka sungin Juda mihei koibûm inla, naktûk khat anmani neh hin hong rei,” a ti a.

⁵Amasa kha Juda mihei ikoi bûm rangin a fe tâk a; khannisela, rêngin sûn ai khit pêk nêkan a va thang sôt tâk a.

⁶Khanchu, rêng khan Abisaia ziangah, “Seba hin Absaloma nêk manin a ne înbuai ual rang kêng dua. Ki mihei ṭhui inla, rizûl rei. Khanonchu, khua kulpui ineiheiah lût man a ta, ei kut ata ai zôk duai rang kêng,” a ti a.

⁷Khanchu, Joaba lômhei, rêng vêngtu pôlhei neh sipai danghei murdi khan Abisaia an zui a, Jerusalema rithoka khan Seba rizûl rangin an suak tâk a.

⁸Gibeona lungpui an va tlungin chu Amasa khan ani kha a lei don a. Joaba kha ridoina râlthlukin arthluk a, khandai kha a kok pumin a kongkhitah a vong a, a hei fe pumah khan a khandai kha a ṭul a.

⁹Joaba khan Amasa ziangah khan, “Ki malpa, nî dam chu a nit na?” a ti a. Joaba khan Amasa kha ifôp itum angkan arkhamul kha a kut changtiang a hei itûk pêk a.

¹⁰Amasa khan Joaban khandai a kut kiangtianga ai chôi kha ngaisak mak a. Khanchu, Joaba khan a phûngah khan a dôt a, a rilhei kha a ṭe duar tâk a. Voikazelin a thi tâk a, Joaba khan sun nôk khâi mak a. Khanungchu, Joaba neh a unaipa Abisaia khan Seba kha an rizûl thal a.

¹¹Joaba lômhei lâia tlangvâl khatkah kha Amasa ruak kôlah â ding a, “Joaba neh Davida tianga ṭang murdi khan Joaba zui mai riseh,” a ti a.

¹²Amasa ruak, thisen risil zit kha lampui inlâina takah khan a lei itâl ṭian a. Joaba mi khan Amasa ruak ien a, mi iding chur kha a mun chu Amasa ruak kha lam ilian ata phûl tiang a kâi a, puanin arkhû tâk a.

¹³Lampui ata ruak kha ithîn paih a nit tenan chu Seba rizûl rangin mi murdîn Joaba kha an zui tâk a.

¹⁴Seba khan Israel namhei murdi ram kha fe thlengin Abel-Beth-Maaka khopuiah a tlung a; Bikria panama mihei murdi kha an ribûm a, khopuiah khan an zui tâk a.

¹⁵Joaba mihei khan Seba kha Abel-Beth-Maaka khopuiah a om iti an riatin chu khopui kha an hual khap tâk a. Kulpui putiangah khan rinêng an inpông a, isim rangin kulpui bul khah an choih suai suai tâk a.

¹⁶Khopuiah khan nupang ivâr khatkah a om a, Kulpui ata kha a zuang ikhêk a, “Lei ringai rei, lei ringai rei. Joaba kha hin ihong rangin iril rei, ki irsônpui nuam a nit,” a ti a.

¹⁷Joaba kha a fe a, a va nâi a; Nupangnu khan, “Joaba ni nit im?” a ti a. Ani khan, “O ki nit,” a ti a. Khanchu, nupangnu khan, “Epu, ki thusîr hi ne lei ringai pêk roh,” a ti a. Joaba khan, “Tho ker ngai,” a ti a.

¹⁸Nupangnu khan, “Tianlâiah khan chu, ‘Abel khuah khan fen la, sâmna chu mûng ni ti,’ an ti ngai a; khangkah khan thu thlûkna an isiam ngai a nit.

¹⁹Hi kin khua hi Israel khua lâia ringei inuam neh iamom pôla mi kin nit. Nangman chu Israel khua, a kho bulpui hih ithôm inrimang nî tum hi? PUMAPA richon hih îtho sik im inrimang nî tum?” a ti a.

²⁰Joaba khan a sâm a, “Khangkan ni tlak mak e, nangni seh chit manih, nangni inrimang manih rêng rêng tum mang e.

²¹Amakhah kin thil tum ni mak e. Efraim tlângrama mi Bikria naipa arming Seba khan Rêng Davida chungah rihelin kut â lek a; ani khah ne peh unla, khuaa rithokin kîr nôk zel kin ti,” a ti a. Nupangnu khan Joaba ziangah, “A lu kha kulpui chunga rithokin nangni zuang iṭhul pêk kin ti,” a ti a.

²²Khanungchu, nupangnu kha a vârna mangin khopuia mipuihei ziangah khan a fe a. Bikria naipa Seba lu kha an tanpai a, Joaba ziang tiangah khan an pai suak tâk a. Joaba khan a mihein khopui an mâkna rangin bekul a tum a; khanchu, anmani in chitah an kîr tâk a. Joaba chu Jerusalema rêng ziangah khan a kîr nôk tâk a.

²³Joaba kha Israel sipai murdi ruaitu a nit a, Johoiada naipa Benaia kha rêng vêngtuhei ruaitu a nit a.

²⁴Adorama kha sin itho ranga zâlrâta an îruaihei ruaitu a nit a; Ahituba naipa Jehosafata kha thurchi riziaktu a nit a.

²⁵Seva kha ziaktu a nit a; Zadoka neh Abiathara hei kha thiampu an nit.

²⁶Jair mi Irâ khom kha Davida thiampu khatkah a nit sa a.