Read Biete 2 SAMUELA 21 Bible Online

2 SAMUELA 21 - Biete bible

2 SAMUELA 21

¹Davida inlal lâiah khan kum ithumkah char ṭâmpui a tlâk a. Khanchu, Davida khan kha chungchângah khan PUMAPA kha â sôn a, PUMAPA khan, “Saula neh a insungkuahein thisen an isua a, Gibeon mihei an that sika a nit,” a ti a.

²Gibeon mihei kha Israela richihei ni mak a, Amor mi la om isunhei Israelhein vênginzôk ranga ṭong an lei irkhâm pêkhei kha an nit. Khannisela, Saula khan Israela richihei neh Juda richihei ranga ṭhatnem arngai sikin that inrimang ai tum a nit.

³Khanchu, Davida khan Gibeon mihei kha a koi a, an ziangah khan, “Im nangni ki tho pêk rang? PUMAPA mihei kha ṭhat nin vur theina rangin nin chungah thonsual lei isin tâk chungchângah ingkana ringeina tak im nangni ki siam pêk rang?” a ti a.

⁴Anni kha a ziangah, “Saula neh a insungkuahei neh kin chungthu-ah hin tangka neh rângkachaka indam thei ni mak a; Israel mi tute kin ithat thei khom ni mak e,” an ti a. Khante, Davida khan, “A nitin teh, im nangni ki tho pêk ranga nin inuam?” a ti a.

⁵Anni khan, “Saula khan nen rimang vang a, Israel ram sungah rêng rêng nen om tlak khâi loi rangin ai nuam a nit a.

⁶Khasikin, Saula naipahei mi pasal sarikah ne pen la, PUMAPA rêng rithlang Saula khua Gibea khan PUMAPA maah ikhâi that kin ti,” an ti a. Rêng khan, “Anni kha nangni pêng ki ti,” a ti a.

⁷Khannisela, rêng khan Jonathana neh an ruaika kârah thuthlung an lei nei tâk sikin Saula tupa Mefibosetha kha chu â hoi a.

⁸Khan, rêng khan Aii nainu Rizpiin Saula ai nei pêkhei ruai Armonia neh Mefibosetha kha a ṭhui a; khabanah, Meholat mi Barzilaia naipa Adriela neh Saula nainu Mikali naipa ringakahei neh khan a ṭhui a.

⁹Gibeon mihei kutah khan a lan a, anni khan PUMAPA maah itlângah an ikhâi that tâk a; Khangkan, pasal sarikahei kha an rêngkan munkan an thi tâk a. An that lâi kha bu ât zoro, barli ât phut tiang vêl a nit.

¹⁰Khanungchu, Aii nainu Rizpii kha borapuan a lâk a, lungpui mun, mi thi ruak omna kôlah khan a dâng a, amakhan bu ât phut ata rivâna rithoka rua a zuang sur idênin a om a. Sûnah chunga vuang ivahei ata an ruak kha a rung a, zânah ram sahei ata ai rung ngai a nit.

¹¹Rizpii thiltho kha Davida khan a lei riatin chu,

¹²a fe a, Jabes Gilead mihei ziang ata Saula ru neh a naipa Jonathana ruhei kha a lâk a. Filistia mihein Gilboa tlângah Saula an that nî-a Filistia mihein Bethsan kotsuaa an ikhâi lâia Jabes Gilead mihein an lei îrûk a nit.

¹³Davida khan Saula ruhei neh a naipa Jonathana ruhei kha a lâk a, khabanah, an îkhâi that tâk mi pasal sarikahei ru khom kha a lâk khôm a.

¹⁴Khanungchu, Saula ruhei neh a naipa Jonathana ruhei kha Benjamina rama Zela khuaa a pa Kisa thlânah an phûm tâk a. Khante, rêng thupêk angkah taka khan an tho a. Kha rizoiah khan chu ram ta ranga an ngênna kha Pathianin a sâm tâk a.

¹⁵Khante, Filistia mihei khan Israel mihei kha an doi nôk a. Davida kha a mihei neh an fe a, Filistia mihei kha an zu doi a. An ridoi lâiah khan ṭumkah chu Davida kha a sôl tak tak tâk a.

¹⁶Milian inthang khatkah arming Isbibenoba kha dâr ifei her ithumkah neh arzâtka rik neh khandai ithar ivong khan Davida kha ithat a tum a.

¹⁷Khannisela, Zeruii naipa Abisaia khan Davida kha a san a, Filistia milianpa kha a doi a, a that tâk a. Khanungchu, Davida mihei khan Davida kha ridoinaa an ziangah fe tlak khâi loi rangin ṭong an inrikhâm a, “Israelhei rinpui tak armang nona rangin ridoi rangin kin ziangah suak tlak khâi no roh,” an ti a.

¹⁸Kha rizoiah khan Filistia mihei neh Gob khuaah ridoina a om nôk a, kha zoroah khan Husa mi Sibekaia khan milian inthangpa khatkah arming Safa a that a.

¹⁹Filistia mihei neh Gob khuaah an ridoi nôk a, Bethlehem mi Jaira naipa Elhanan Git mi Goliatha a that a, â fei ngul kha pheirâi tiakkah a nit.

²⁰Khanungchu, Gath khuaah ridoina a om nôk a, amakhan risual inuam tak milian inthangpa a om a. A kut kiangruaikan kutṭim iruk rukkah, a ke kiangruaikan keṭim iruk rukkah, a rêngkan sôminikah lika nei mi a om a.

²¹Ani khan Israel mihei kha a va sarai a, Davida unaipa Simeia naipa Jonathana khan a lei that a.

²²Kha pasal ilikahei kha Gath khuaa milian richihei chu an nit a, anni kha Davida neh a mihei kutah an ithi tâk a nit.