Read Biete 2 SAMUELA 22 Bible Online

2 SAMUELA 22 - Biete bible

2 SAMUELA 22

¹PUMAPA khan Davida kha â râlhei kut ata neh Saula kut ata a saninzôk lâiah khan Davida khan hi lâ hih PUMAPA inpâknan a sak a.

²PUMAPA chu ki lungpui neh ki kulpui idet, Ne saninzôktu a nit.

³Ki Pathian chu ki hoi theina a nit a, Amah neh chu izôkriam kan ki om thei ngai. Ani khan ipho angkan a ne hoi a, Ne rungin a nen zôk riam ngai. Ki saninringtu a nit a; Ani khan a ne hoi a, Risual bualah a nen zôk ngai a.

⁴Inpâk tlâk PUMAPA chu ke sam a, Ani khan ke râlhei kut ata a nen zôk ngai.

⁵Thina tuirifôn khan a ne hual vêl a, Siatna tuirifôn khan a ne chîm a.

⁶A nit, thina ruiirualhei khan a ne hual a, Thlânbâi inruak khan châng angkan a ne ngâk ṭian a.

⁷Ki lungzîng lâiin PUMAPA chu ke sam a, Ki Pathian chu ne ṭangpui rangin ki koi a. Ani khan a Tempila rithokin ki rôl a lei riat a; Ne ṭangpui ranga ke khêk irî kha a lei riat a.

⁸A ningthik sikin rinêng hi â nîng a, ân thing tâk a, Pathian ning a thik sikin rivân ringatnahei khom â nîng a, ân thing dur dur tâk a.

⁹A nâra rithokah khan meikhû a suak zut zut a; A bâia rithokah khan meichok neh mei ri-al a suak a.

¹⁰Ani khan rivânhei â ong a, a zuang ṭum tâk a, A ke nuaiheiah khan sûm izîng ngut a om a.

¹¹Ani kha Cherub chunga chuangin a vuang a; A nit, ithli rithahei chungah a vuang duai duai a.

¹²Izîng richel tak khan amah neh amah rikhun a om a, Sûm isa tak, tuia sip khan a hual vêl a.

¹³A makunga vâr ri-el tak khan mei ri-alhei kha ân chok a.

¹⁴PUMAPA khan rivânah khuarî ân rî dur dur a, Ânchungtaka rôl kha ân thang tâk a.

¹⁵Ani khan a thalhei a kâp suak a, â râlhei â chekindar chit a; Khothlârhei ân rilek a, anni kha lâizâm an tho zoi tâk a.

¹⁶PUMAPA khan â râlhei a ngo a, Anni kha ningmurin a raiin chu, Tuikhanglian ilî ṭuang khom â lang a, Rinêng ringatna khom â lang vang ngai.

¹⁷PUMAPA khan chungtianga rithokin a ne zuk iban a, a ne tûk tâk a; Tui inthûk takheia rithokin a ne kâi isua tâk a.

¹⁸Ne doitu rât takheia rithokin a ne saninzôk tâk a, A nit, ne neltuheia rithok khomin, Anni kha ki rangin an irât rai a nit.

¹⁹Anni khan ki lungzîng lâiin an ne doi a, Nikhomseh, PUMAPA kha ki rinpui tak a nit.

²⁰Ani khan ṭiomah a ne ṭangpui a; Ki chungah a lôm sikin a ne înzôk tâk a nit.

²¹PUMAPA khan ke dik tlia angkah takin ki chungah a sin a; Ki kuthei rithiang lam angkah takin ṭhat a ne ivur a nit.

²²PUMAPA dân kha ki zôm ngit a; Ki Pathian zianga rithokin isual takkan pêt rimang ngai mang e.

²³A dân murdihei ki vong a; A thupêkhei chu zôm loiin om ngai mang e.

²⁴Ani khan sêlna boi ki nit tlia neh, Thonsual loi ranga ker dîn zia a riat a.

²⁵Khasikin, PUMAPA khan ke dik tlia angkah takin a ne thung a, Ki kuthei arthiang a nit iti ai mu mai a nit.

²⁶O PUMAPA, nang chu ni chunga iamomhei chungah ni iamom a; Mi ṭha rikiphei chungah ni ṭhat rikip ngai a.

²⁷Mi rithianghei chungah ner thiang a, Mi siahei chungah chu kuttum ne lek ngai a.

²⁸Mi ringai intlôm theihei chu ni saninzôk ngai a, Nikhomsela, lârripâkhei chu nen tlôm ngai.

²⁹O PUMAPA nang chu ki meiser ni nit a, Keimaa zîng hi nen rikiang pêk roh.

³⁰A nit, ke râlhei rûn theina rang ritha ne pen la, An kulpui inê theina rang ritha neh khan.

³¹Pathian chu a sinthoheiah a ṭhat rikip a, A thuhei chu ringat tlâk a nit a, Amaa iamna ringattu murdihei ka rangin ani chu ipho angkah a nit.

³²PUMAPA bang hi Pathian a nit a; Amah bang hi ei lungpui ribîkna a nit.

³³Pathian chu ki kulpui idet tak a nit a, Ki lampui a ner thial infâi pêk ngai.

³⁴Ki kehei chu sazuk ke angkan a siam a; Itlângheiah izôkriam kan a nen lêng ngai.

³⁵Râl buala rangin risual dân a nen risei a, Khanchu, phel ikhir takhei ki mang theina rangin.

³⁶O PUMAPA ni saninringna pho khah ni ne pêk a, Nangma ṭangpuina khan a ne isiam inlian a nit.

³⁷Irâl kuta tlôm rangin ne phal mak che a, Khasikin, ki îlîr tlak ino a nit.

³⁸Ne doituhei chu ker zûl a, ki man a, Anni kha ken rimang phar mâkah ringam mang e.

³⁹Anni kha thoi thei khâi loi rangin ki sât chit a; Ki makungah an itlôm tâk a nit.

⁴⁰Nangman ridoina rangin râtna ni ne pêk a, Ne doituhei chu ki nuaiah an ilîr zoi tâk a.

⁴¹Nangman ke râlhei chu ki ziang ata lâizâm nen tho tâk a, Ne neltuhei murdi khom ken rimang zoi tâk a.

⁴²Anni chu ṭangpui ringaiin an ikhêk a, Nikhomsela, tute â saninzôk rang omak a, PUMAPA ngêi chu an isam a, Nikhomsela, sâm mak a.

⁴³Anni chu rinênga vâivut angkan ki suk inrinôi a, Lampuia dialdôk angkah dôran ki sir nâl chit a.

⁴⁴Ki mi rihelheia rithok khomin ni nen zôk tâk a, Nam tin lupui inih mai rangin ni ne vong inṭhat a; Atûn chu ki riat ngai loi mihei khom ki sinthotu an hong nit tâk.

⁴⁵Ram dang mihei khom ki makungah an ikhûn a, Ki thurchi an riatin chu ki thu an zôm ngai.

⁴⁶Anni chu an indôp tâk a, An kulpuia rithokah khan inthing pumin an zuang suak ngai.

⁴⁷PUMAPA chu a ring mai a, Ki lungpui ribîkna inpâkin om riseh; Ne saninringtu Pathian roinpuina chu inthangin om riseh.

⁴⁸Ani khan ke râlhei chungah nêna a ne pêk a, Nam tin ki ke nuaiah ân ribil riam a.

⁴⁹Ne doituhei ata a ne sanisua tâk, A nit, nangman ne doituhei chungtiangah khan ni ne chôiinrisâng a. Mi tôksolhei kut ata kha ni nen zôk ngai.

⁵⁰Khasikin, O PUMAPA, nam tin lâiah khan, Ner ming inpâk ki ta, Nangma inpâkin zâi ki ti.

⁵¹Pathian khan nêna roinpui tak a rêng rithlang ziangah khan a pêk a; A riak inrithu Davida neh archihei chung ngêiah khan, Kumkhuakan a lungkhamlianzia ân lang mai ngai.