Read Biete 2 SAMUELA 23 Bible Online

2 SAMUELA 23 - Biete bible

2 SAMUELA 23

¹Jesaia naipa Davida kha Pathianin mi roinpuin a siam a, Jakoba Pathian ngêiin rêng rangin arthlang a, Israelhei ranga lâ ṭha tak tak iphuatu a nit. Hihei hi Davida thuril nungkhôn tak a nit.

²PUMAPA rithla khan keimah ne mangin thu â sîr a, A thuhei kha ke leiah a om a.

³Israelhei Pathian khan thu â sîr a, Israelhei lungpui khan ki ziangah, “Rêng, mi chunga ifel takka roiirêl ngai, Pathian iṭi puma roiirêl ngai kha,

⁴Inî a hong suak a, sûm om viat ino, Zîng rilen vang angkah hi a nit a, Rua sûr zoia loisûl thoiinhar ngai nîsa angkah hi a nit,” a ti a.

⁵Khangkan PUMAPA khan ker chihei chu ṭhat ai vur rang a nit, Kumtluang thuthlung kha ki ziangah a tlung tâk sikin, Thuthlung ikhiak thei ino, A nit ṭonginkung danglam thei ino ngêi khah. Amakha ki saninringna rikip neh ki lungdo rikip a nit a, PUMAPA khan amakha ithlun ngêt a ti.

⁶Mi siahei kha chu riling angkan inrimang nîng an ti. Tutên kut koronga tôn ngam thei ni mak e.

⁷Â tôntu rang khan thîr riamrei neh feingul a mang ngêt rang a nit; Hâl inrivâm riai rang a nit.

⁸Hihei hi Davida sipai ihâihei riming chu a nit, a masataka chu Takemon mi Joseb Basehebetha, sipai ihâi ithumkahei lâia ân lâr bîk a nit a, Ezni mi Adino khom an ti sa ngai. Ani khan ifei â lek a, ridoinaah ṭum khatkan mi rizariatkah ai that a nit.

⁹Â nikna kha Ahoa panama mi Dodoa naipa Eleazara a nit a. Sûnkah chu Filistia mihei ridoi ranga an ribûma, Israel mihei nung an ritol riai lâia Davida zianga irâlhei risual va ottu, sipai ihâi ithumkahei lâia mi kha a nit.

¹⁰Ani chu â ding ngit a, Filistia mihei kha a kut a khama a khandai khom ithla thei ino rakkan a that a. Kha nî-ah khan PUMAPA khan nêna roinpui tak â thlun pêk tâk a. Kha rizoiah khan Israel mihei kha Eleazara omnaah an hong kîr nôk a, mithihei riamrei kha an hong ilâk a nit.

¹¹Â thumna chu Hara mi Agea naipa Sama a nit a. Dâlbil mun Lehi-ah khan Filistia mihei kha an ribûm a, Filistia miheia rithokin Israel mipuihei kha lâizâm an tho a.

¹²Khannisela, Sama chu kha munah khan â ding ngit a, a rung khap a, Filistia mihei kha a that a. PUMAPA khan nêna roinpui tak â thlun pêk tâk a.

¹³Sipai ihâi sômithumka lâia ithumkahei kha bu ât riphut lâi takin Davida omna Adulam ipûkah khan an fe a; Filistia sipaihei khan Refaim phâiah ṭangmun an khuar a.

¹⁴Kha zoroah khan Davida chu itlâng rikulah a om a, Filistia sipai lômhei kha Bethlehemah an om a.

¹⁵Davida khan a khuaa tui arzuk tak tak a, “Bethlehema tuisunsua tui, kul kotbâi kôla ngêi kha iin rangin tûn manih ne va chôi pêk sela chu o,” a ti a.

¹⁶Khanchu, sipai ihâi pasal ithumkahei khan Filistia sipaihei kha an inêr thleng a, Bethlehema kul kotbâi kôla tuisunsua tui ngêi khah an thâl a, Davida ziangah an hong chôi a. Khannisela, Davida khan lei in nuam mak a, PUMAPA ziangah thillanin a bunsuak tâk a.

¹⁷“O PUMAPA amahi in tlak no ning e. Thi ngama fehei thisen iin angkah ai nit rang a nit,” a ti a. Khanchu, in nuam khâi mak a. Kha thilhei khah sipai ihâi pasal ithumkahei khan an itho a nit.

¹⁸Zeruii naipa Joaba u Abisaia kha sipai ihâi sômithumkahei lâia ruaitu tak a nit a. Â feiin mi rizathumkah a doi a, a that a, mi hâi sômithumkahei lâiah khan ân lâr tak a nit tâk a.

¹⁹Sômithumkahei lâiah khan ân lâr tak a nit tâk sikin an ruaitu tak a nit a; khannisela, mi hâi pasal ithumka an itihei lâiah chu ṭang phâk mak e.

²⁰Kabzeel khua mi Jehoiada naipa Benaia kha sipai ihâi khatkah chu a nit sa. Ani khan thil natinsat itam takka a tho a, Moab mihei râlpa inthang inikah ai that a nit. Voikah chu ivur tlâk zoro lâiin khurpuiah a fe a, sakeibaknei a zu that a.

²¹Ani khan Aigupta mi milian inthang a that a, Aigupta mi khan ifei a chôi a; nikhomsela, Benaia khan rolpui ichôiin a pan a, Aigupta mi fei chôi kha a sut a, kha feiah khan ai sun that a nit.

²²Jehoiada naipa Benaia thilthohei chu khahei khah a nit a, sômithumkahei lâiah khan itep sa a nit.

²³Mi sômithumkahei lâiah khan inlâr tak chu a nit a; khannisela, râlpa hâitak pasal ithumkahei dôrkah chu arming inthang mak e. Ani kha Davida khan ama vêngtuhei ruaitu rangin ai sia a nit.

²⁴Sômithumkahei lâia ṭang sa mi danghei kha, Joab unaipa Asahela; Bethlehem khuaa mi Dodoa naipa Elhanana; Harod mi Sama neh Elkia; Pelet mi Heleza; Tekoa mi Ikesa naipa Irâ; Anathot mi Abiezera; Husa mi Mebunaia; Aho mi Zalmona; Netofat mi Maharaia; Netofat mi Bana naipa Heleba; Benjamina richi, Gibea khua mi Ribaia naipa Itaia; Pirathon mi Benaia; Gaas kôla phâia mi Hidaia; Araba mi Abialbona; Behurim mi Azmaveta; Saalbon mi Eliaba; Jasena naipahei lâia mi Jonathana; Harar mi Sama; Harar mi Sarara naipa Ahiama; Maaka mi Ahasbaia naipa Elifeleta; Gilo mi Ahithofela naipa Eliama; Karmel mi Hezroa; Arba mi Paaraia; Zoba khuaa mi Nathana naipa Igala; Gad mi Bania; Amon mi Zeleka; Beerot mi Naharaia, Joaba râlthluk chôitu; Jatir mi Irâ neh Gareba; Hit mi Uria hei an nit. An rêngkan sômithumka sarikah a(...)