Read Biete 2 SAMUELA 24 Bible Online

2 SAMUELA 24 - Biete bible

2 SAMUELA 24

¹PUMAPA ningthikna kha Israelhei chungah a zuang ṭuang nôk thut tâk a, an chunga siatna thlun rangin Davida kha â chok thoi a, a ziangah, “Fen la, Israel mi neh Juda mihei tep riai roh,” a ti a.

²Khanchu, Davida khan a sipai ruaitu Joaba ziangah khan, “Ni sipai ruaituhei neh Israel mihei omna mun tin, Dana rithoka Beerseba dênin rifang unla, mi izâkâm an nit iti ki riat theina rang tep riai roh,” a ti a.

³Khannisela, Joaba khan rêng ziangah, “O Rêngpa, PUMAPA ni Pathian khan Israel mipuihei kha atûna nêkah hin a lêt rizakan inpung sela, amakha Rêngpa ki pu hin mu phâk riseh. Khannisela, O PUMAPA îtho rang im hi thil hih â ria nî nuam kher hi?” a ti a.

⁴Nikhomsela, Joaba neh a sipai ruaituhei khan rêng thu khah an zôm tâk a. Khanchu, Joaba neh sipai ruaituhei kha Israel mihei itep rangah khan rêng ziang ata kha an suak tâk a.

⁵Jordan râl an va kâi a, Gad ram hual a, phâi inlâina taka khopui, Aroer sim tiangah khan om mun an khuar a. Khantak ata kha mâr tiang ipanin Jazera an fe a.

⁶Gilead ramah hei, Kades ramah hei, Hithei ramah hei an fe a. Khanungchu, Dan tiang an fe a, Dan ata kha tlâk tiang Sidona an fe a.

⁷Khanungchu, sim tiang Tura khopui kulpui ineiah an fe a, Hit mihei neh Kanan mihei khua murdi an rifang a, Judai sim tiang Beersebaah an fe a.

⁸Khanchu, ram pumpui an rifang suak zoi nungah khan, thla kuakkah neh sûn sôminika rizoiin chu Jerusalemah an kîr nôk tâk a.

⁹Khanchu, Joaba khan miriam om zâk kha rêng a pêk a. Israel ramah khan ipa râl idoi thei tâk rêng rêng kha; Israel mi nuai iriatkah an om a, Juda mi kha nuai ringakah an iom a nit.

¹⁰Khannisela, miriam a hang tep zoi tenan chu Davida lungril kha a nat tâk a. Davida khan Pumapa ziangah, “Ki thil thoah hin natinsat takkan ki lei însual tâk a nit. Nikhomsela, atûnah hin O PUMAPA, ni bôi siatna hi ne zâ rangin nang kî ngên a nit. Invêt takkan ki lei ichâng tâk a nit,” a ti a.

¹¹PUMAPA thu kha Davida zânthla Gada ziangah a zuang tlung a, “Fen la, Davida ziangah thil ithumkah rithlang rang kî pêk a nit. A irthlang tak a chungah kî tho rang a nit, iti va ril roh,” a ti a. Atûk zîngah Davida a thoi tenan chu,

¹³Gada kha a ziangah a fe a, PUMAPA thu suak kha â ril a, a ziangah, “A îtak hîm ni nuam rithlang roh? Ni ram sunga kum ithumka ṭâmpui itla hîm, ne râlhei ata thla thumka sung lâizâm itho hîm, a nit nole, ni ram sunga sûn thumka sung ripui ilêng hîm? Ne tirtu PUMAPA zianga thlun nôk rangin ringaituan la, ni sâmna ne ril roh,” a ti a.

¹⁴Davida khan Gada ziangah, “Ke lung a zîng vang na! Îkhom ni sela miriamhei kuttum ne tho rang chu kî nuam ino a nit. PUMAPA kutah ribei phot ki ti; a lungkhamlianna kha a natinsat a,” a ti a.

¹⁵Khanchu, PUMAPA khan Israel mihei chungah khan zînga rithokin zoron kung ten a tlung idênah khan ripui ân lêng tâk a. Dana rithokin Beerseba dênin Israel mihei sîngsarikah an thi a.

¹⁶PUMAPA Vântirtôn khan iseh ranga Jerusalem tianga a kut a hang ilekah khan PUMAPA khan mihei kuttum itho rang ai tum kha â khîr tâk a, mihei ithattu Vântirtôn ziangah khan, “Ân rup tâk, ni kut ilek khâi no roh,” a ti a. PUMAPA Vântirtôn kha Jebus mi Arauna rîzôl kôlah khan a om a.

¹⁷Davida khan mi thattu Vântirtôn kha a mun chu, PUMAPA ziangah, “Ringai ta, keimah kêng ân sual kî nit; dik ino takka thil thonsualtu chu keimah ki nit hih. Hi berahei hin îthil im an ithonsual? Keimah neh ki insungkuahein ni kuttum kha kin tuang rang a nit ual,” a ti a.

¹⁸Kha nî ngirah khan Gada kha Davida ziangah a fe a, a ziangah, “Fen la, Jebus mi Arauna rîzôlah PUMAPA ta rang mâichâm hang siam roh,” a ti a.

¹⁹Davida khan PUMAPA thupêk kha a zôm a, Gadan â ril lam angkah takin a fe tâk a.

²⁰Arauna khan a zuk thlîr vêlin chu rêng neh a milianhei ihong kha a mu a; khanchu, Arauna kha a suak a, a mâia rinêng isikin rêng makungah khan â bok tâk a.

²¹Arauna khan, “Rêngpa, Epu îtho sika hong im nî nit tâk,” a ti a. Davida khan a sâm a, “Mipuihei chung ata ripui arkiang theina ranga PUMAPA ta ranga mâichâm siamna ranga ni rîzôl richoh kî tum a nit,” a ti a.

²²Arauna khan Davida ziangah, “O Rêngpa, lan la, ṭha nî ti murdi PUMAPA ziangah lan roh. Hâlrivâm thillana lan rang serâtchalhei chu hin an om a, thing itua rang chu rîzôl mangruahei neh serâtchal ringkolhei kha ai om a nit,” a ti a.

²³Arauna khan hihei murdi hih rêng a pêk riai a, a ziangah, “PUMAPA ni Pathian khan ni thillan nang iham pêk riseh,” a ti a.

²⁴Khannisela, rêng khan Arauna ziangah, “Ni mak e, a man iomin richoh ngêtin ki irchôk rang a nit; îte thâm loiin PUMAPA ki Pathian ziangah hâlrivâm thillanhei lan tlak no ning e,” a ti a. Khanchu, Davida khan rîzôl neh serâtchal kha tangka sômringakan archôk tâk a.

²⁵Khanungchu, Davida khan kha munah khan PUMAPA ta rang mâichâm a siam a, hâlrivâm thillanhei neh ringeina thillanhei a lan a. PUMAPA khan Davidan a ram ranga a ṭongṭaina kha a sâm a, Israel ram ata ripui kha arkiang tâk a.