Read Biete 2 SAMUELA 3 Bible Online

2 SAMUELA 3 - Biete bible

2 SAMUELA 3

¹Saula insungkua thlophei neh Davida thlophei kha zoro sôt takkah an ridoi a. Davida kha a hong rât ual ual a, Saula insungkuahei kha an dôk tîr tîr a.

²Davida khan Hebron khuaah khan naipa irukkah a nei a; a ulian indônin hihei hi an nit; Amnona, a nu chu Jezreel mi Ahinoami kha a nit.

³Kileaba, a nu chu Karmel mi Nabala nupui Abigaili a nit; Absaloma, a nu chu Gesur rêng Talmaia nainu Maaki a nit a;

⁴Adonija, a nu chu Hagithi a nit a; Sefatia, a nu chu Abitali a nit a;

⁵Ithreama, a nu chu Egli a nit. Hihei hih Davida nai Hebrona suakhei chu an nit.

⁶Saula insungkua thlophei neh Davida mihei an ridoi sungah khan Abnera kha Saula thloptuhei lâiah khan thu a hong nei ual ual a.

⁷Sûnkah chu Isbosetha khan Abnera ziangah, “Îtho rang im ki pa Saula thâikêmnu Rizpii, Aii nainu kha nî zâlpui?” a ti a.

⁸Isbosetha thuril khan Abnera lungril a sun vak a, a ning a thik tak tak tâk a, “Judahei tianga ṭang ui intlo angkah ringot im kî nit? Vuani tenah hin ni pa Saula chungah neh a urênghei chungah neh a malhei chungah iamomna ken lang a, Davida kutah nang lan mang a; nikhomsela, vuanah hin nangman hi nupang chunga sualah hin ni ne ibe tâk na?

⁹Saula neh a insungkuahei kut ata ram khah ilah pêk a Israelhei neh Judai ram, Dana rithoka Beerseba dêna Davida rêng ṭhungmun tung inding ranga PUMAPA khan Davida zianga ṭong a irkhâm angkana ki tho thluantlung non chu Pathianin Abnera chu a lo lon lo sela, kha nêka natinsat khomin tho riseh,” a ti a.

¹¹Khanchu, Isbosetha khan Abnera khah a ṭi sikin sâm ngam khâi mak a.

¹²Abnera khan Hebrona om Davida ziangah mi a tir a, a ziangah, “Hi ram chungah hin tûm roi irêl rang? Ki ziangah thu thlung inla; khanchu, Israel mi murdihei ni ziang tianga ṭang ranga inê rangin nang thlop ki ti,” a ti a.

¹³Davida khan, “A ṭhat, ni ziangah khan thu thlung ki ti; khannisela, thil khatkah nang kî phût nuam a nit, ne mu ranga ni hong tikin Saula nainu Mikali hong ṭhui inla; khanchu, ki mêl mu thei ni ti,” a ti a.

¹⁴Davida khan Saula naipa Isbosetha ziangah khan, “Filistia mihei servun rizaka ki irchôk ki nupui Mikali kha ne hong peh roh,” itin mi a tir a.

¹⁵Khanchu, Isbosetha khan a pasal Laisa naipa Paltiela ziang ata khah va ṭhui rangin mi a tir a.

¹⁶A pasal khan iṭap pumin Behurim khua dênin a hong zui a. Khannisela, Abnera khan a ziangah, “Kîr nôk ta roh,” a ti a, khanchu, a kîr nôk tâk a.

¹⁷Abnera kha Israel ruaituhei ziangah a fe a, an ziangah, “Matonah khan chu Davida kha nin rêng rangin nin nuam ngai a;

¹⁸atûnah hin nin ta ranga zoron ṭum a nit. PUMAPA khan Davida chungchâng thu-ah khan, ‘Ke som Davida kutin ki mi Israelhei kha Filistia mihei kut ata neh an irâlhei murdi kut ata kha san isuang ki ti,’ ai ti khah remai rei,” a ti a.

¹⁹Abnera khan Benjamina namhei khom kha arsônpui a; khanungchu, Abnera kha Israel mihei neh Benjamina nam murdihein ṭha an iti murdi Hebrona Davida kuar riata sîr rangin a fe tâk a.

²⁰Abnera kha mi sôminika ṭhuiin Hebronah Davida ziangah a fe tâk a. Davida khan Abnera neh a ziangah mi sôminikahei rang ruai â ṭhe a.

²¹Abnera khan Davida ziangah, “Fêng ki ta, ni ziangah thu an thlung theina rang neh ni lungdo angkah taka roi ni rêl theina rangin Israel mihei murdi ki rêngpa ziangah koibûm ki ti,” a ti a. Davida khan Abnera kha ân fe a; khanchu, thlangam takkan a fe tâk a.

²²Nung ual viatah chu Joaba neh Davida mihei ram iriak khah an hong kîr a, râllâk sum itam takkah an hong chôi a. Khannisela, Abnera kha Hebronah Davida ziangah khan lei om khâi mak a; Davidan a lei infe tâk a, ani khom thlangam takkan ai fe tâk a nit.

²³Joaba neh a zianga mipuihei kha an hong tlungin chu, “Nera naipa Abnera kha rêng ziangah a hong a, ani khan a lei infe nôk tâk a, thlangam takkan a fe tâk,” itin Joaba kha an iril a.

²⁴Khanchu, Joaba kha rêng ziangah a thleng thal a, “Ni thil lei tho hih ingka tliam ai nit? Abnera kha ni ziangah a hong a, ithôm khangkana ni lei înfe nôk?

²⁵Ani khah nang ilêm rangin neh ni fena, ni hongna neh ni thil tho murdi ireh rangin ai hong a nit,” a ti a.

²⁶Davida ziang ata a hong suakin chu Joaba khan Abnera rizûl rangin mi a tir a, Sira tuisunsuaa rithokin an hong ṭhui kîr nôk a; nikhomsela, Davida khan kha thu khah îte reh mak a.

²⁷Abnera kha Hebron a hong tlungin chu Joaba khan kul kotbâia risônpui zâi rang angkan a ṭhui infiar a; khanchu, Joaba khan a unaipa Asahela thisen suak thungnan Abnera khah a phûngah a sun that tâk a.

²⁸Nakanah Davidan a riat tenan chu, Davida khan, “Nera naipa Abnera thisen suak thu-ah hin keimah neh ki ram chu PUMAPA mitmuah rithiang kumkhua kin ta.

²⁹Kuttum kha Joaba neh a insungkuahei murdi chungah thla riseh. Archot ikipah Joaba insungkuahei lâiah khan ipân ṭhano manih, iphâr manih, nupang sin bang itho thei manih, khandaia thi manih, fâk risam manih om mai riseh,” a ti a.

³⁰Khangkah khan Joaba neh a unaipa Abisaia khan an unaipa Asahela kha Gibeona ridoinaah a that sikin Abnera kha an ithat tâk a nit.

³¹Khanungchu, Davida khan Joaba neh a zianga mipui iom murdihei ziangah khan, “Nin puanhei khah potthlêr unla, borapuan sil unla, Abnera khah sûn rei,” itin thu a pêk a. Rêng Davida khom khan rilâng khah a zui a.

³²Abnera kha Hebronah khan an phûm a, rêng kha Abnera thlânah khan a ṭap ngûi ngûi a; mipui murdi khom an ṭap a.

³³Davida khan Abnera kha a ṭâ a, “Ithôm Abnera kha mi intlo thi inteh a thi tâk tlia o?

³⁴Ni kut khah ikhuap ni mak a, Ni ke khah kol inbun ni ual mak a, Mi siahei makunga mi an îlîr angkan ne lîr tâk tlia na?” a ti a. Khante, mi murdi khan an ṭâ nôk a.

³⁵Sûn thluanin mi murdi khan Davida kha fâk inzong rangin an tum a; khannisela, Davida khan, “Inî tlâk mâkah bu manih, thil dang manih khom ker tem viatin chu Pathianin ai lo lo ne lo riseh, kha nêka natinsat khomin ki chungah tho riseh,” itin ṭong arkhâm a.

³⁶Amakhah mi murdîn an riatin an lôm a, rêng thil tho murdi khan mipui murdihei khah ân lôm mai a.

³⁷Davida mihei murdi neh Israel mi murdi khan Nera naipa Abnera ithata om kha rêng thu ni mak iti an hong riat tâk a.

³⁸Rêng khan a milianhei ziangah khan, “Vuanah hin Israel mi lian, mi roinpui tak ai thi a nit iti nin iriat ino mani?

³⁹Rêng ranga Pathian riak inrithu ni man inlang; vuanah hin ki irzal neng a nit. Hi mi Zeruii naipahei hih ki ta rangin an itôkinsol rai a nit. PUMAPA khan thil ṭhano thotuhei kha an sualzia angkah takin thung riseh,” a ti a.