Read Biete 2 SAMUELA 4 Bible Online

2 SAMUELA 4 - Biete bible

2 SAMUELA 4

¹Saula naipa Isbosetha khan Abnera kha Hebronah an that iti a lei riatin chu a ṭi tâk a, Israel mihei murdi khom an indôp tâk a.

²Isbosetha khan sipai pôl ruaitu inikah Baana neh Rekaba a nei a. Anni kha Benjamina richi Beerot mi Rimona naipahei an nit. Beerot chu Benjamina ram sunga ringai a nit a.

³Beerot khuaa lei om masa a ram mihei kha Gitaimah lâizâm an tho a, atûn tenan amakhan an iom mai tâk a nit.

⁴Saula richia mi dang la om chu Jonathana naipa Mefibosetha a nit a, Saula neh Jonathana an thatah khan kum ringaka mi bang a la nit a. Jezreela rithokin Saula neh Jonathana thi thu an lei riatin chu â enkoltunu khan a pom a, lâizâm a thopui a; khannisela, lâizâm ithopui ranga armot rainaah â ṭhul a, a ke a hong îbâi tâk a nit.

⁵Rekaba neh Baana kha Isbosetha in ipanin an fe a, sûnlâi tak, Isbosetha sûn ringam lâi takin an va tlung a.

⁶Kotbâi ngâktu nupang kha inrimu â bûk a, a in thlar a; khanchu, Rekaba neh a unaipa Baana kha insungah an irel zâi a.

⁷Insung an va lûtin chu, Isbosetha zâlna chontanah an fe a, Isbosetha lei iin thlar kha an sun a, an that a; khanungchu, a lu an tan a, an chôi a, Jordan phâi ipâl thlengin zân thluanin an lôn a.

⁸Isbosetha lu khah Hebronah Davida ziangah an hong chôi a, rêng ziangah khan, “En ta, hih, nang ithat itum ne râl, Saula naipa Isbosetha lu; PUMAPA khan ki rêngpa phuba kha vuanah hin Saula neh archihei chungah ai lâk pêk tâk a nit,” an ti a.

⁹Davida khan Rekaba neh Baana kha a sâm a, an ziangah, “PUMAPA, ki lungzîngna murdi ata ne saninzôktu ringna chingin kî ti a nit.

¹⁰Thurchi ṭha zuang ithluna ringaiin, ‘Saula kha a thi tâk,’ itin mi khatkan a ne zuang iril a, ani khah ki man a, Ziglag khuaah khan ki that a; amakhah a thurchi ṭha zuang ithlun mana ki lei ipêk chu a nit.

¹¹Mi fel ama insung ilum a, a khumlâizôl ngêia mi, mi sualin an ithat thisen man kha nin chungah kî phût nôk ualin, atûnah hin leilung ata hi nangni ki înrimang ngêt rang a nit” a ti a.

¹²Khanungchu, Davida khan a tlangvâlhei khah thu a pêk a, anni khan Rekaba neh Baana kha an that a, an kut neh an ke an tan pêk a, Hebrona dîl rikamah khan an ikhâi a. Isbosetha lu kha chu an lâk a, Hebron khuaah, Abnera thlânah an phûm tâk a.