Read Biete 2 SAMUELA 5 Bible Online

2 SAMUELA 5 - Biete bible

2 SAMUELA 5

¹Khanungchu, Israel namhei murdi kha Hebronah khan Davida ziangah an hong a, “Kin thisen rizompui ni nit a,

²zoro thleng tâka Saula ei chungah ân lal lâi khomah khan ridoina bualah Israelhei ma ni îruai ngai a nit; PUMAPA khan ni ziangah, ‘Ki mi Israelhei ma iruai ni ta, an chungah ruaitun om ni ti,’ ai ti a nit,” an ti a.

³Khanchu, Israel ruaituhei murdi Hebronah khan Rêng Davida ziangah an hong a. Rêng Davida khan Hebronah khan PUMAPA maah an ziangah thu a thlung a, anni khan Davida kha Israelhei chunga rêng rangin riak an inrithu tâk a.

⁴Davida kha ân lal phutah khan kum sômithumka mi a nit a, kum sômilikah a înlal a nit.

⁵Hebronah khan Judahei chungah kum sarikah neh thla rukkah ân lal a, Jerusalemah Israelhei neh Judahei murdi chungah khan kum sômithumkah neh kum ithumkah a înlal a nit.

⁶Davida neh a mihei kha, kha rama om Jebus mihei irûn rangin Jerusalemah an fe a; khahei khan Davida khah hong lût thei no nih an iam a, Davida ziangah, “Hin hong lût thei tlak no tin e; mitdel neh kebâihei iluan nang lei idan thei an ti,” an ti a.

⁷Khannisela, Davida khan an Zion kulpui khah a lâk a, amakhah Davida khopui a hong ichang tâk a nit.

⁸Kha nî-ah khan Davida khan a mihei ziangah, “Jebus mihei ki nel lam dôrka nel a, anmani that inrimang nuam khopa nel nin om im? Mitdel neh kebâihei idoi nuamkah chu tuiluangna zuiin lût riseh,” a ti a. Khasikah khan kêng, “Mitdel neh kebâihei kha PUMAPA inah lût sa thei no nih,” iti ai nit tâk a nit.

⁹Kulpui kha a lâk zoiin chu Davida kha amakhan a om tâk a, “Davida khopui,” iti a nit tâk. Davida khan a vêlkan kulpui a siam a, Miloa rithoka rêng in idênin a siam inṭhat a.

¹⁰PUMAPA, Tinrêngthothei Pathian kha a ziangah a om mai sikin Davida chu a hong roinpui ual ual tâk a.

¹¹Khante, Tura rêng Hirama khan Davida ziangah mi a tir a, Sidar thinghei a thon a, kutithiamhei neh lungsuktuhei a tir sa a, Davida rêng in ân sin pêk a.

¹²Davida kha PUMAPA khan Israel mihei chunga rêngin amah chu ân det a; a mi Israelhei sikin ram kha vângisakin ai siam a nit iti a riat tâk a.

¹³Davida khan Hebrona rithoka Jerusalemah arthon nungah khan nupui neh thâikêm a nei nôk sa a, naipahei neh nainuhei khom a nei tam ual tâk a.

¹⁴Jerusalema ai nei a naihei kha Samua, Sobaba, Nathana, Solomona,

¹⁵Ibara, Elisua, Nefega, Jafia,

¹⁶Elisama, Eliada neh Elifeleta hei an nit.

¹⁷Filistia mihein Davida kha Israel mihei rêng rangin riak an inrithu iti an riatin chu an sipaihei murdi kha Davida doi rangin an rithok tâk a. Davida khan a lei riat a, kulpui sungah a zu fe a.

¹⁸Filistia mihei kha Refaim phâi an hong tlung a, amakhan an rizar a.

¹⁹Davida khan, “Filistia mihei idoi rangin kî fe rang im? Ki kutah anni khah ni ne ipêk rang im?” itin PUMAPA â sôn a. PUMAPA khan Davida ziangah, “Doi roh, Filistia mihei chu ni kutah nang kî pêk ngêt ngêt rang a nit,” a ti a.

²⁰Khanchu, Davida kha Baal Perazimah a fe a, amakhan Davida khan Filistia mihei kha â ne tâk a. “Tuitial iṭhe angkah dôrkan ke râlhei chu PUMAPA khan ki maah a ne chekindar pêk tâk,” a ti a. Khasikah khan kha mun rimingah khan Baal Perazim ai be tâk a nit.

²¹Filistia mihei khan lâizâm an thoah khan an pathian rilimhei an mâk rak a; Davida neh a mihei khan an lâk a.

²²Khanungchu, Filistia mihei kha an fe nôk a, Refaim phâiah an rizar nôk a.

²³Davida khan PUMAPA a hang isôn nôkin chu, ani khan, “Hin taka rithokin chu doi no roh; an inung tiang hual inla, lingsaru kung ridîna khin hang doi roh.

²⁴Lingsaru kunglêra lôn irî suat suat angkana rî ni riat tenan châng roh; Filistia sipaihei idoi rangin ni matonah keimah PUMAPA ki suak tâk tina nîng a ti,” a ti a.

²⁵Khante, PUMAPA thupêk angkan Davida khan a tho a, Filistia mihei kha Gebaa rithokin Gezer idênin an ûmrizûl tâk a.