Read Biete 2 SAMUELA 6 Bible Online

2 SAMUELA 6 - Biete bible

2 SAMUELA 6

¹Davida khan Israel mihei lâia sipai rithlang suak ngat mi sîngithumkah a bûm nôk a,

²Judai rama Baala khuaa rithokin Cherubhei chunga chuang Tinrêngthothei PUMAPA riming riput Thuthlung Bôm kha zu lah rangin Davida khan a fepui tâk a.

³Pathian Thuthlung Bôm khah itlânga Abinadaba in ata kha an lâk suak a, tâli tharah an sia a. Abinadaba naipahei Uza neh Ahioa hei khan tâli thar khah an ṭhui inlôn a.

⁴Ahioa kha Pathian Thuthlung Bôm ma tiangah khan a fe a.

⁵Davida neh Israel mi murdihei khan an râtna murdia la sakin neh ilâmin PUMAPA an inpâk a, irîhoi chi tinrêng ṭingṭang hei, perkhuang hei, khuanghei, rosemhei, dâr ribuhei an suk a.

⁶Nakona rîzôl an tlungin chu serât kha a pêm vit a, Uza khan a hang iban a, Thuthlung Bôm khah a hang itûk a.

⁷PUMAPA ning kha Uza chungah khan a thik tâk a, Thuthlung Bôm a hang tôn sikah khan Pathianin kha munah khan a that a, Pathian Thuthlung Bôm kôlah khan a thi tâk a.

⁸PUMAPA ningthikna kha Uza chungah a ṭum sikin Davida kha a ning a thik a, kha mun rimingah khan Perez Uza[2] ai be a nit.

⁹Khanungchu, Davida khan PUMAPA chu a ṭi a, “Ingkan im Pumapa Thuthlung Bôm kha ki ziangah ki chôi thei khâi rang a?” a ti a.

¹⁰Khanchu, Davida khan PUMAPA Thuthlung Bôm kha Jerusalemah chôi khâi loi rangin a ngaitua a; Git mi Obed Edoma in tiang a sia tâk a.

¹¹PUMAPA Thuthlung Bôm kha Git mi Obed Edoma inah khan thla thumkah a om a, PUMAPA khan Obed Edoma neh a insungkuahei murdi kha ṭhat a vur tâk a.

¹²Rêng Davida khan Pathian Thuthlung Bôm sikin Obed Edoma insungkua neh a in neh loi murdi PUMAPA khan ṭhat a vur iti a riat tâk a. Khanchu, Davida khan Pathian Thuthlung Bôm kha Obed Edoma in ata Jerusalema chôi rangin an zu lâk tâk a.

¹³Thuthlung Bôm rizôntuhei kha kal irukah an phêt tenan chu Davida khan ân ringam a, serâtchal neh serâtte vâi intak kha ribôlnan PUMAPA ziangah a lan a.

¹⁴Davida khan puanzâi rimi thiampu zakua risîngte bang ihâkin thei dôrkan Pumapa maah a lâm a.

¹⁵Khangkan Davida neh Israel mi murdihei khan râifâna ipâi dur dur pumin neh bekul tum inrî dur dur pumin PUMAPA Thuthlung Bôm khah Jerusalemah an hong ichôi a nit.

¹⁶Khante, PUMAPA Thuthlung Bôm kha Davida khopuiah hong chôi inlût a nit lâiah khan, Saula nainu Mikali khan tukvera rithokin a lei thlîr a, PUMAPA maa Davida ritôp neh ilâm kha a mun chu a musit lungril tâk a.

¹⁷Thuthlung Bôm kha an hong chôi a, a siana ranga Davida îndang, puan in sunga a mun rangah khan an sia tâk a. Khanungchu, Davida khan hâlrivâm thillanhei neh ringeina thillanhei PUMAPA ziangah a lan tâk a.

¹⁸Davida khan hâlrivâm thillan neh ringeina thillanhei kha a lan zoiin chu Tinrêngthothei PUMAPA rimingin mipuihei kha ṭhat a vur a.

¹⁹Mipui murdi, Israel pumpuihei kha a nupang a pan mi tin ibai thliam khatkah neh sa tlinkah neh grep irâ châr khûkah a sem pêk chit a. Khanchu, mahni in sengah an fe tâk a.

²⁰Kha rizoiin chu Davida kha a insungmihei ṭhat ivur rangin a fe tâk a. Saula nainu Mikali kha Davida don rangin a hong suak a, “Vuaninta Israel rêng chu a roinpui vang na! Mi chanlamboi izakna châng ria no korongboia om angkah dôran vuanah hin â som nungâkhei mitmuah korongboin ai om kha na!” a lei ti a.

²¹Davida khan Mikali khah a sâm a, a ziangah, “Ni pa neh a insungkuahei murdi nêkan Israelhei chunga rênga ner thlangtu PUMAPA maah kêng kî lâm. PUMAPA maah khan kî lâm mai rang a nit.

²²Hi nêk manin izakpui la om ki ti, keimah neh keimah khom larsit mai ki ti; khannisela, kha isom nungâk nî tihei chôiinrisângin om ki ti,” a ti a.

²³Khanchu, Saula nainu Mikali kha a thi dênin nai nei khâi mak a.