Read Biete 2 SAMUELA 7 Bible Online

2 SAMUELA 7 - Biete bible

2 SAMUELA 7

¹Rêng Davida kha a inah a om a, PUMAPA khan â râlhei murdi ata râlringam takkan ân om tâk a.

²Khanungchu, rêng khan zânthla Nathana ziangah, “Hin kei chu sidar thinga siam inah ki om a; nikhomsela, Pathian Thuthlung Bôm kha puan in paiah a om a,” a ti a.

³Nathana khan, “Ni lungrila om angkah taka khan tho roh, PUMAPA ni ziangah a om khate,” a ti a.

⁴Nikhomsela, kha zân ngirah khan PUMAPA khan Nathana ziangah,

⁵“Fen la ki bôi Davida kha va ril roh, PUMAPA khan ki omna rang Tempil khah nangmah â sintu rang ni mak che.

⁶Israela richihei Aigupta ram ata ki ṭhui suaka rithokin atûn tenan Tempilah la om ngai mang, puan inah kêng kî om ngai.

⁷Israela richihei murdi lâia ki fena murdiah khom ki mi Israelhei ienkol ranga thu kî pêk nam ruaituhei ziangah, ‘Ithôm sidar thingin in nin ne sin pêk no?’ ti ngai mang e.

⁸“Khasikin, ki bôi Davida ziangah, Tinrêngthothei PUMAPA khan hingkan ai ti a nit, ‘Bera lêngna mun ata bera enkola nî om kha ki mi Israelhei chunga ruaitu rangin nang ki lâk suak a.

⁹Ni fena kipah ni ziangah ki om mai a, ni matonah khan ne râlhei nang ken rimang pêk thiai ngai a. Atûnah hin rinêng chunga miriam riming inthang takhei angkan riming inthang takin nang siam ki ti.

¹⁰Ki mi Israelhei rang mun ken kung a, amakhan anni chu mi sirdea om khâi iloi rangin ki în-om tâk a nit. Hi ram an hong lût ata mi tôksolhein deng an inthei ngai a; khannisela, khangkah kha ni tlak khâi no nih.

¹¹Ne râlhei murdi ata izôkriam kan nang in-om ki ta, khabanah richi suanpâr nang pêng ki ti.

¹²Ni sûn a heka ni chibulhei ziangah ni zâl tikah khan, ner chi, ne rila râ naiipa khatkah rêngin siam ki ta, a ram kha inding indet ki ti.

¹³Ani kha ki Tempil isintu rang chu a nit, a ram rêngṭhungmun chu kumkhuaka rangin indet ki ti.

¹⁴A pa nîng ki ta, ani chu ki naipa nîng a ti. Ani khan thil a thonsualin chu miriamin a naipa ai hêm ngai angkan hêm ki ti.

¹⁵Nikhomsela, rêng ni chang theina ranga kî khâi inrimang Saula ziang ata ki lungkhamna kî lâk pai angkah khan ki lungkhamna khan ani chu marak no nih.

¹⁶Ni insungkua neh ni ram kha kumkhuakan indet nîng a ta, ni rêngṭhungmun kha kumkhuakan indet nîng a ti,’ a ti,” itin PUMAPA thu a zuang tlung a.

¹⁷Pathianin a zianga thu a înrilang murdi kha Nathana khan Davida ziangah â sîr tâk a.

¹⁸Khanungchu, Davida kha Ritongna Puan-Inah a lût a, PUMAPA maah â ṭhung a, a ṭongṭai a, “O Rêngpa PATHIAN, tûm ki nit a, ki insungkua khom im kin nit a, hi ten ten ni ne îruai?

¹⁹O PUMAPA Pathian hi khom hih nangma mitmuah khan thil ichînte nîng a ti; khannisela, kum itam takka la hong itlung ranga ni bôi richi suanpârhei la hong om rang dân lei iril thlâmin, O PUMAPA Pathian rual ithar la hong iom rang kha ni nen mu tâk a.

²⁰Davida hin ni ziangah hin im a la ril inchuang ual rang? O PUMAPA Pathian, ni bôi hi ni ne riat riai a.

²¹Ni boi hi, nen risei rangin nangma lungdo neh thiltum angkah takin hi thil roinpui tak hih ni tho tâk a.

²²Khasikah khan O PUMAPA Pathian, nang chu nî roinpui a nit; nangma angkana tute zel omak e; Nangma banah chu Pathian rêng rêng omak iti kin iriat mai ngai a nit.

²³Nangma miheia siam ranga bôi ata ni irtlan isua, ni mi Israelhei angkana rêng rêng rammualah hin omak e. An ta ranga thil roinpui neh thil rikhêl nî thohei khan rammual pumpuiah ner ming chu inthangin ai om a nit. Aigupta ram ata ni dongtum ranga ni înzôk mihei, nangma mihei ngêi kha matiang an fe mai lâiah khan nam danghei neh an pathianhei kha ni ûmisua pêk a.

²⁴Khangkan Israelhei chu kumkhuaka ni mihein ni siam tâk a; nangmah, PUMAPA chu an Pathian ni nit tâk a.

²⁵“Khante, atûnah hin O PUMAPA Pathian, ni bôi chungchâng thu neh archi suanpârhei chungchâng thu ni îsîr khah kumkhuaka rangin indet inla, nî ril tâk angkah khan tho roh.

²⁶Tinrêngthothei PUMAPA chu Israelhei Pathian a nit, itin ner ming chu kumkhuakan chôiinrisângin om riseh; khanchu, ni bôi Davida insungkuahei chu ni maah indetin om mai riseh.

²⁷O, Tinrêngthothei PUMAPA, Israel Pathian, ni bôi ziangah, ‘Ner chihei chu rêngin siam ki ti,’ itin nen puang tâk a; khasikin, ni bôi hin hi ṭongṭaina hih ni ziangah a îthlun ngam a nit.

²⁸“O Rêngpa PATHIAN, nang chu Pathian ni nit a, ni thu chu thutak a nit a, hi thil iṭha hih ni bôi ziangah ni înkung tâk a nit.

²⁹Khasikin, ni bôi insungkuahei chu ni makungah kumkhuaka an om mai theina rangin ṭhatvur roh. O Rêngpa PATHIAN, nangman ni lei înkung tâk a, ni bôi richihei chungah kumkhuaka ni ṭhatvurna kha om riseh,” a ti a.