Read Biete 2 SAMUELA 8 Bible Online

2 SAMUELA 8 - Biete bible

2 SAMUELA 8

¹Zoro sôt ianka nungah chu Rêng Davida khan Filistia mihei kha a doi a, â nê a; khanchu, Davida khan Filistia mihei thuneina bulpui Metheg Ama[3] kha a sut tâk a.

²Khanungchu, Moab mihei a doi inê nôk a, ringmana ai manhei kha rinêngah ân zâl a, ithumka lâiah khan inikah chit kha a that a. Khanchu, Moab mihei kha a thunuaiah an hong om tâk a, siahei an hong pêk ngai a.

³Khanungchu, Davida khan Eufratis vadunga a ram ilah nôk ranga a fe malamin Zoba rêng Rehoba naipa Hadadezera khom a hei doi inê a.

⁴Khanchu, Davida khan a sakor chungchuang mi sânglei rizasarikah neh sipai sînginikah a man pêk a. Khante, Davida khan tâli rizaka kâi rang sakor inrup bang a lâk a, a bankah chu an zapui ritharui â satpêk vang a.

⁵Damaska khuaa rithoka Zoba rêng Hadadezera san ranga Suria mi fehei khah Davida khan a lei doi a, mi sînginikah neh sânginikah a that a.

⁶Khanungchu, Davida khan Suria rama Damaska khuaah khan sipai a sia a; khanchu, Suria mihei kha Davida thunuaiah an om tâk a, siahei an hong pêk ngai a. PUMAPA khan Davida chu a fena kipah nêna a pêk mai a.

⁷Davida khan Hadadezera milianhei rângkachak iphohei kha a lâk pêk a, Jerusalemah a chôi a.

⁸Hadadezera khua Betaa rithokhei, Berothaia rithokhein Davida khan dâr itam takkah a lâk a.

⁹Hamath rêng Toia khan Hadadezera sipai murdi Davidan â nê iti a lei riat a.

¹⁰Toia khan voi itam takkah a lei irdoipui mai ngai Hadadezera kha Davidan â nê sikin chibai ibûk rang neh ilômpui rangin Toia khan a naipa Jorama kha Davida ziangah a tir a. Khante, Jorama khan tangkaruahei, rângkachakhei, sumsenheia siam thilhei a hong chôi pêk a.

¹¹Rêng Davida khan kha thilhei khah Pumapa ina mang rangin a lan a, khabanah ram dang a înê tâkhei ata tangkarua neh rângkachak ai lâkhei khom kha a lan sa a.

¹²Khahei khah Suriahei ta, Moabhei ta, Amona richihei ta, Filistiahei ta, Amalekhei ta, Zoba rêng Rehoba naipa Hadadezera rithoka a râllâkhei a nit.

¹³Davida khan Ichi phâiah Edom mi sînglei sângiriatkah a that nunga a hong kîr nôk tenan vâng chu arming kha ân thang ual ok tâk a.

¹⁴Edom ram mun tinah sipai a sia a; khanchu, Edom mi murdi kha Davida thunuaiah an om tâk a, siahei an hong pêk tâk a. PUMAPA khan Davida chu a fena kipah nêna a pêk mai a.

¹⁵Davida khan Israel mi murdi chungah roi a rêl a, mi murdihei chungah khan ifel takkan roi ai rêl a nit.

¹⁶Zeruii naipa Joaba kha sipai ruaitu tak a nit a; Ahiluda naipa Jehosafata kha thurchi riziaktu a nit a;

¹⁷Ahituba naipa Zadoka neh Abiathara naipa Ahimeleka kha thiampu an nit a; Seraia kha ziaktu a nit a;

¹⁸Jehoiada naipa Benaia kha Davida vêngtuhei ruaitu a nit a; Davida naipahei kha roisakpuitu an nit.