Read Biete 2 SAMUELA 9 Bible Online

2 SAMUELA 9 - Biete bible

2 SAMUELA 9

¹Sûnkah chu Davida khan, “Jonathana sika lungkhamna ken lang theina rangin Saula insung mihei lâia mi a la dam an la om im o?” a ti a.

²Khante, Saula insungkuahei isom khatkah arming Ziba a om a, Davida zianga fe rangin an koi a; rêng khan a ziangah, “Ziba ni nit im?” a ti a. Ani khan, “O ki nit, Epu ne som hih,” a ti a.

³Rêng khan, “Pathian lungkhamna a chungah ken lang theina rangin Saula insungmihei lâia mi a la dam an la om im hi?” a ti a. Ziba khan rêng ziangah, “Jonathana naipahei lâia khatkah a la om a, ani kha a kebâi a nit,” a ti a.

⁴Rêng khan a ziangah, “Taktiang im ai om?” a ti a Ziba khan rêng ziangah, “Lodebar khuaa Amiela naipa Makira inah a om,” a ti a.

⁵Khanchu, Rêng Davida khan mi a tir a, Lodebar khuaa Amiela naipa Makira in ata kha a va ṭhui a.

⁶Saula naipa Jonathana naipa Mefibosetha kha Davida ziangah khan a hongin chu, a mâia rinêng isikin Davida kha chibai a bûk a. Davida khan, “Mefiboseth” a ti a, ani khan, “En ta, ne som hi,” a ti a.

⁷Davida khan a ziangah, “Ṭi no roh, ni pa Jonathana sikin lung nang inkham ngêt ngêt ki ti. Ni pu Saula ram murdi nang peh nôk ki ta, ki dochamah khalai rikhîl sa mai tâng ni ti,” a ti a.

⁸Mefibosetha khan chibai a bûk a, a ziangah, “Keimah ui ithi angkah pai, ne som chungah hin îtho rang im hingka dôr ni ne iṭhat hi?” a ti a.

⁹Khanungchu, rêng khan Saula som Ziba khah a koi a, a ziangah, “Saula thil murdihei neh a insungkuahei murdi thilhei khah ni pu tupa hi kî pêk riai a nit.

¹⁰Nangmah neh ni naipahei neh ne somhei khan a ta rangin ram kha chimu tho pêk nin ta; ni pu tupa insungkuahei khan ifah ranghei a nei theina rangin ni chimu invânghei kha ni hong chôi ngai rang a nit. Mefibosetha hi chu ki dochamah khalai a irkhîl mai rang a nit.” a ti a. Ziba khan naipa sômleiringakah neh isom sôminikah ai nei a nit.

¹¹Ziba khan rêng ziangah, “Rêng, ki pun thu ni ne pêk lam angkah takin thông ki ti,” a ti a. Khanchu, Mefibosetha kha rêng naipa khatka angkan rêng dochamah khan khalai arkhîl mai tâk a.

¹²Mefibosetha khan naipa la naiinpangte a nei a, arming kha Mika a nit. Ziba ina om murdi kha Mefibosetha som an hong nit tâk a.

¹³Khanchu, Mefibosetha chu Jerusalemah an om tâk a, rêng dochamah khan khalai arkhîl mai ngai a, a ke kha kiangruaika bâi a nit a, rêng dochamah khalai arkhîl mai tak a.