Read Biete 1 RÊNGHEI 1 Bible Online

1 RÊNGHEI 1 - Biete bible

1 RÊNGHEI 1

¹Khante, Davida kha a hong ûnlianin a hong tar ok tâk a; â somhein puan an insil ngut khoma lum thei ual khâi mak a.

²Khanchu, a milianhei khan a ziangah, “Epu Rêngpa, nang ienkol rang neh ni zianga om rang nungâk lei zong rong ung. Ani khan nang zâlpui a ta, nang op inlum thei a ti,” an ti a.

³Khanchu, Israel ram pumpuiah khan nungâk mêliṭha an zong a, Sonam mi Abisagi an va mu a, rêng ziangah khan an hong ṭhui tâk a.

⁴Kha nungâk kha mêliṭha tak a nit a, rêng kha a enkol a, a sin a tho pêk ngai a; nikhomsela, rêng khan pôl mak e.

⁵Khante, Absaloma kha a thi tâk a, a unaipa Adonija, Hagithi naipa kha nai uliantak a nit tâk a. Ani kha mêl iṭha tak a nit a. A pa Davida khan tiklâi khomin, “Îtho sik im hingka hin nî tho,” itin ngo ngai mak a. Adonija khan rêng ichang a tum ngit a, “Keimah ki la înlal ngêt rang a nit,” a ti a. Khanchu, ama ta rang tâli neh sakorhei neh sakor chungchuang mi sômringakah a matona tlân ranghei kha ân rifûk a.

⁶

⁷Ani khan Zeruii naipa Joaba neh thiampu Abiathara kha arsônpui a, anni khan Adonija kha an thlop tâk a.

⁸Khannisela, thiampu Zadoka hei, Jehoiada naipa Benaia hei, zânthla Nathana hei, Simeia hei, Reia hei neh Davida mihâihei kha chu Adonija tiang ṭang mak a.

⁹Sûnkah chu Adonija khan ribôlnan berahei, serâtchal hei, ran vâi inthâihei kha Enrogel kôla Zebeletah[1] khan a that a. Ani khan ân zirpui, rêng naipahei murdi neh Judai rama rêng milianhei murdi kha ribôlna ruaiṭheah khan a fial a.

¹⁰Khannisela, ân zirpuipa Solomona neh zânthla Nathana neh Benaia neh rêng mihâihei kha chu fial sa mak a.

¹¹Khanungchu, Nathana kha Solomona nu Bathsebi ziangah a fe a, a ziangah, “Hagithi naipa Adonija hi kin pu Davida riat loiin rêngin arphun tâk iti nî riat ino mani?

¹²Khasikin, nangma zôkna rang neh ni naipa Solomona zôkna rang nang lei iril rong,

¹³Rêng Davida ziangah khan fen la, a ziangah, ‘O Rêngpa Epu, ne somnu ziangah hin ni naipa Solomona hi, ke nungah la hong inlal ngêt ngêt a ta, ani hih ki rêngṭhungmunah hin a hong îṭhung rang a nit, itin ṭong ni irkhâm ni mak im a? Îtho sik im Adonija teh rêngin a om tâk tlia?’ va ti roh,” a ti a.

¹⁴Khante, Nathana ngir khan, “Khanungchu, rêng Davida ne sôn lâi takin kei khom hong lût sâng ki ta, ni thusîr kha nang hong nam indetpui ki ti,” a ti a.

¹⁵Khanchu, Bathsebi kha rêng chontanah khan a va lût a. Rêng kha a ûnlian ok tâk a, Sonam mi Abisagi khan rêng kha a enkol a.

¹⁶Khante, Bathsebi khan rêng kha ikhûnin chibai a bûk a. Khante, rêng khan, “Im nî nuam?” a lei ti a.

¹⁷Khante, Bathsebi khan, “Epu, PUMAPA ni Pathian riming ichingin ne somnu ziangah hin, ‘Ni naipa Solomona hi ke nungah la hong inlal ngêt ngêt a ta, ani hih ki rêngṭhungmunah hin a la îṭhung rang a nit,’ itin ṭong ner khâm tâk a.

¹⁸Khannisela, Adonija teh ân lal pial tâk a; nangmah lakin îte reh mak che a.

¹⁹Ribôlnan serâtchal hei, ran vâi inthâi hei, bera hei, itam takkah a that a, thiampu Abiathara neh sipai ruaitu Joaba kha a ruaiṭheah a fial a; khannisela, ni naipa Solomona chu ai fial ino a nit.

²⁰Khasikin, Epu, Israel mipui murdîn ne nunga ni rêngṭhungmuna ṭhung rang hih tûm ai nit iti anmani iril rangin nang an ithlîr ṭian a nit.

²¹Khanonchu, Epu, ni thi kaneh chu keimah neh ni naipa Solomona hi thil thonsualtuah an ne ibe ngêt rang a nit,” a ti a.

²²Khante, khangkana rêng a la sôn mai lâi takah khan zânthla Nathana kha rêng in a hong tlung sa tâk a.

²³Khante, zânthla Nathana a hong iti rêng kha an iril a, Nathana khan rêng ziang a va tlungin chu rêng makungah khan lingisikin â bok a.

²⁴Khanungchu, a ziangah, “O Rêngpa, Epu, ke nungah Adonija hih la hong inlal a ti, nî ti mani?

²⁵Vuanah hin a fe a, ribôlnan serâtchal hei, ran vâi inthâi hei, bera hei, itam takkah a that a, rêng naipahei murdi banah sipai ruaitu Joaba neh thiampu Abiathara hei a fial a, atûnah hin râiifân takkan an fâkin an in a, ‘Rêng Adonija hih dam sôt riseh,’ itin an îpâi a nit.

²⁶Khannisela, Epu, keimah ni bôi hi thiampu Zadoka neh Jehoiada naipa Benaia neh ni naipa Solomona hi chu a ne ifial sa no a nit.

²⁷Hihei hih rêngpa ki pu thua tho a nitin chu, rêngpa ki pu hin â nunga rêngṭhungmuna ṭhung rang tutak im ai nit iti ni bôihei hi ni la îril ino pial ai nit nîng a ti na?” a ti a.

²⁸Khanungchu, rêng Davida khan, “Bathsebi hi ne hong koi pêk ta u,” a ti a. Khante, Bathsebi kha a hong lût nôk a, rêng makungah khan â ding a.

²⁹Khanungchu, rêng khan Bathsebi ziangah, “Ki lungzîngna murdia ki ringna inzôktu PUMAPA ringna chingin,

³⁰ni zianga PUMAPA Israelhei Pathian riming ichinga, ‘Ni naipa Solomona hi ke nungah chu la hong inlal ngêt ngêt a ti, ker thûlin ki rêngṭhungmunah hin la ṭhung ngêt a ti,’ itia ṭong ki irkhâm angkah ngêiah khan, vuani zel khomah hin ki lai tho rang a nit,” a ti a.

³¹Khanchu, Bathsebi kha a mâia lingisikin â bok a, rêng kha chibai a bûk a, “Ki pu, rêng Davida hi kumkhuakan dam mai riseh,” a ti a.

³²Khanungchu, Rêng Davida khan, “Thiampu Zadoka neh zânthla Nathana neh Jehoiada naipa Benaia ne va koi pêk rei,” a ti a. Anni kha rêng makungah an hong a.

³³Rêng khan an ziangah, “Ki milianhei ṭhui unla, ki naipa Solomona hi keima sakuartung chung ngêiah khan inchuang unla, Gihon munah zu fepui unla,

³⁴amakhan thiampu Zadoka neh zânthla Nathana hin Solomona chu Israelhei rêng rangin riak inrithu riseh. Khanungchu, bekul tum unla, ‘Rêng Solomona chu dam sôt riseh,’ itin ipâi rei.

³⁵Khanchu, ani kha hong zui nôk nin ta, ki rêngṭhungmunah hin a hong iṭhung rang a nit. Ani hih Israel ram neh Judai ram chunga roirêltu ranga ki irthlang a nit sikin ani hi ne thûla rêng rang chu a nit,” a ti a.

³⁶Jehoiada naipa Benaia khan rêng kha a sâm a, “Amen, PUMAPA, ki pu rêngpa Pathian khomin ṭha ti riseh.

³⁷PUMAPA chu ki pu rêngpa ziangah ai om ngai angkan Solomona ziangah khom om mai sela, ki pu Davida rêngṭhungmun nêkan a rêngṭhungmun chu roinpui ual riseh,” a ti a.

³⁸Khanchu, thiampu Zadoka, zânthla Nathana, Jehoiada naipa Benaia, Kereth mihei neh Pelet mihei khan Solomona kha Davida sakuartung chungah an inchuang a, Gihon munah khan an fepui a.

³⁹Khante, thiampu Zadoka khan Ritongna Puan-In ata riak siana riki ai chôi khah a lâk a, Solomona kha ân rithu tâk a. Khanchu, bekul an tum a, mipui murdi khan, “Rêng Solomona chu dam sôt riseh,” itin an ipâi a.

⁴⁰Khanungchu, mipui murdi khan ani khah an hong zui a, râiifânin an ipâi a, belemhei an tum a, an irî khan rinêng â tlor dît tâk a.

⁴¹Khante, Adonija neh a mi fial, a zianga om murdihei khan an ruaiṭhe rizoiin chu irî kha an hang riat a, Khante, Joaban bekul tum irî a hang riatin chu, “Khopui sunga irî om dur dur tâk soh îtho sikâm ai nit tâk?” a ti a.

⁴²Khangkana a ti lâi takah khan thiampu Abiathara naipa Jonathana kha a hong tlung a, Adonija khan, “Hin hong ta, nang chu mi fel ni nit a, thurchi ṭha ni hong îthlun ni ngêt a ti na?” a ti a.

⁴³Khante, Jonathana khan a sâm a, Adonija ziangah khan, “Hong ithlun mang e; epu, Rêng Davida khan Solomona rêngin ai siam tâk a nit.

⁴⁴Solomona rualin thiampu Zadoka, zânthla Nathana, Jehoiada naipa Benaia, Kereth neh Pelet mihei a tir a. Anni khan rêng sakuartung chung ngêiah an inchuang a,

⁴⁵Thiampu Zadoka neh zânthla Nathana khan Gihon munah rêng rangin riak an inrithu a. Khanungchu, khopuiah khan an hong zui a, râiifân takkan an ipâi a, mipuihei irî kha a irkhông dur dur a nit. Amakha a nit nin irî riat khah.

⁴⁶Solomona chu hi ram rêngṭhungmunah hin a iṭhung tâk a nit.

⁴⁷Khabanah, rêng milianhei kha ei Rêng Davida lômpui rangin an fe zun zun a, a ziangah, ‘Ni Pathianin ner ming nêkan Solomona riming chu inthang ualin siam sela, ni rêng ṭhungmun nêkan Solomona rêngṭhungmun chu roinpui ualin siam riseh,’ an ti a. Khanungchu, Rêng Davida khom a zâlmuna bokin, hingka hin a ṭongṭai a,

⁴⁸‘PUMAPA, Israelhei Pathian, vuaninta ki rêngṭhungmuna ṭhung rang ki ṭhâlbea râ ngêi hong inkungtu chu inpâkin om riseh, ki mit ngêiin a ne înmu tâk a nit hi,’ a ti,” a ti a.

⁴⁹Khanungchu, Adonija mi fialhei murdi khan an ṭi tâk a, an thoia mahni lampui chitah an rot riai tâk a.

⁵⁰Adonija khan Solomona a ṭi sikin a fe a; mâichâm riki a va tûk tâk a.

⁵¹Khante, Solomona ziangah khan, “Adonija khan Rêng Solomona a ṭi a, mâichâm riki â tûk khap a; ‘Rêng Solomonan a bôi hi khandaia that loi rangin ṭongrikhâm riseh,’ a ti,” itin Solomona chu an iril a.

⁵²Solomona khan, “Mi iamom tak a nit iti ân langin chu a samzâi khatkah khom rinêngah thla no nih; khannisela, pualoina a nei iti riatna a omin chu thîng a ti,” a ti a.

⁵³Khanchu, Rêng Solomona khan mi a tir a, mâichâm ata Adonija chu an va ṭhui a. Adonija kha Rêng Solomona ziangah a fe a, a makungah ibokin chibai a bûk a. Khante, Solomona khan a ziangah, “Ni inah fe ta roh,” a lei ti a.