Read Biete 1 RÊNGHEI 10 Bible Online

1 RÊNGHEI 10 - Biete bible

1 RÊNGHEI 10

¹Solomona riming inthangzia kha Seba rêngnun a lei riatin chu thu khir tak taka fia tumin Jerusalemah a hong a.

²Ṭhuiruai itam takkah a nei a; namhoi hei, lungilu hei, rângkachak hei ipêl saringseihei iṭhuiin a hong a. Solomona ziang a tlungin chu a lungrila ṭong ridon ai sia murdi phor riaiin ridonna a siam a.

³Solomona khan a thu ridon murdi kha a sâm a, ai rilfia thei ino rêng rêng om viat mak a.

⁴Seba rêngnu khan Solomona vârzia murdihei, a in sin hei,

⁵a dochama ifarua an hong ido hei, a milianhei iṭhung dân hei, a sinthotuhei tho dân hei, an rivo dân hei, a kilât lantu hei, PUMAPA ina ai lan thillanhei a hang mun chu ringai rikhêlin lungril mumal ilua khom nei thei khâi mak a.

⁶Khanchu, Rêng Solomona ziangah khan, “Ni thilthohei neh ni vârziahei keima rama ki lei iriat khah thuthang idik tak a nit ngêt hite.

⁷Khannisela, keiman ki mit ngêia ki hong mu mâkah chu an îsîr ringot kha chu lei iam mang a, khan arzâtkah khom ki lei iriat ni mak, an îsîr nêkan ni vârzia neh ni ṭhatzia hi a lei înril ok a nit.

⁸Ni nupuihei chu an vânnei vang na! Ne somhei, ni kôla om mai a, ni vârna thu ringai maihei hi an vân nei vang na!

⁹PUMAPA ni Pathian chu inpâkin om riseh. Ani chu ni chungah a lôm tak tak a, Israelhei rêngṭhungmunah nang a înṭhung a nit hih. PUMAPA ni Pathian khan Israelhei hi kumkhuakan lung a thlung a; khasikin, ifel takka roiirêl rangin rêngin nang ai siam a nit hih,” a ti a.

¹⁰Khante, Rêng Solomona kha rângkachak her sângilikah neh namhoi itam takkah neh lungiluhei a pêk a. Seba rêngnun Rêng Solomona namhoi ai pêk angkah dôrka tam hi la dong ngai mak e.

¹¹Hirama rikuang lômpa, Ofir rama rithoka rângkachak va pêlhei khom khan Ofir rama rithokin junipar thing itam takkah neh lungiluhei an hong pêl sa a.

¹²Solomona khan junipar thinghei kha PUMAPA in neh rêng in rikul nan neh lâ saktuhei rang serandahei neh perkhuanghei siamnan a mang a. Atûn tenan khangkana junipar thing iṭha rêng rêng kha Israel ramah ilah lût la ni ngai mak a, imuh khom imuh nôk ni khâi mak e.

¹³Rêng Solomona khan a ditsak sika ai pêkhei banah khom Seba rêngnu khan ai nuam murdi a nî a, ai nî kangân chu riphal takkan a pêk a. Khanungchu, rêngnu neh a ṭhuiruaihei kha an omna Seba ramah an kîr nôk tâk a.

¹⁴Rêng Solomona khan kum tin rângkachak her sînginikah neh sângithumkah dôr ai dong ngai a nit.

¹⁵Rivai mihei neh dukân thotuhein sia an ipêk banah Arabia rênghei neh Israel rambial optuhein rângkachak neh tangka an ipêk ngai a nit.

¹⁶Rêng Solomona khan rângkachak suk inphêkin phopui rizanikah a siam a, ipho khatkah khan rângkachak her sarikah an imang a nit.

¹⁷Khante, rângkachak suk inphêk iphote rizathumkah a siam a, ipho khatkah khan rângkachak her inikah an imang a nit. Kha phohei kha rêng khan, “Lebanon Rampui In,” an iti chotanah khan a sia a.

¹⁸Rêngṭhungmun roinpui tak saihan a siam a, amakha rângkachak rithiang takin a tuam a.

¹⁹Rêngṭhungmun hang luina kha kalbi irukkah a om a, kalbi sîrtiang ikipah khan sakeibaknei rilim a om a, an rêngkan sômleiinikah a nit. Kha rêngṭhungmun nungtiangah khan serâtchal lu rilim a om a, a ṭhungmun ibân sîrtiang seng sengah khan sakeibaknei rilim a om a. Khangkana rêngṭhungmun roinpui kha tak ram khomah la om ngai mak e.

²¹Rêng Solomona kilât murdi kha rângkachaka siam korong a nit a, “Lebanon Rampui In,” an iti chontanpui sunga bûrbêl murdihei khom kha rângkachak inthâr laka siam korong a nit. Solomona damlâia khan tangkarua rêng rêng chu thil ilu angkana be a nit no sikin tangkarua rêng rêng imang ni mak e.

²²Rêng khan tuikhanglianah khan Hirama rikuang lômpa neh inzin ngai Tarsis rikuang lômpa a nei a, Tarsis rikuang lômpa khan kum ithumka dan ikipah rângkachak hei, tangkarua hei, saiha hei, zôngilian chihei, varho hei a hong ipêl pêk ngai a nit.

²³Rêng Solomona khan rammuala rêng murdihei chu richongna neh vârnaah khan a khûm riai a.

²⁴Pathianin a lungrila vârna thu ai sia pêk kha ringai rangin rammuala ram tina rithokin mi murdihei khan Solomona kha hong ipan an inuam ngai a nit.

²⁵Tukhom â hong kangânin chu thilpêk tangkarua bûrbêl hei, rângkachak bûrbêl hei, puan hei, râlthluk hei, namhoi hei, sakor hei, sakuartung hei an hong ipêk ngai a nit. Hingka hin kum tin an hong ipêk mai ngai a nit.

²⁶Khante, Solomona khan sakor tâli sânglei rizalikah neh sakor chungchuang mi sînglei sânginikah a nei a. Khahei kha ṭhenkah Jerusalemah a sia a, ṭhenkah khopui dang dangah ai sia a nit.

²⁷Rêng Solomona inlal sungah khan tangkarua kha lungte angkah dôrkan Jerusalem khuaah khan a tam a, sidar thing khom itlâng bula phâia theipui thing angkah dôrkan ai tam a nit.

²⁸Solomona inei sakorhei kha Musri neh Kilikia[3] ram ata ai lak lût a nit a, rêng rivai mihei khan Kilikia rithokin a lôm lômin aman ipen an lei ilâk ngai a nit.

²⁹Aigupta rama mi sakor tâli kha tangkarua sekel rizarukkah chitin neh sakor kha tangkarua sekel rizalei sômringakah chitin an ithleng ngai a nit. Khangkan rêng rivai mihei imangah khan Hithei rêng murdihei neh Suria rênghei khom an ithon suak pêk nôk ngai a nit.