Read Biete 1 RÊNGHEI 11 Bible Online

1 RÊNGHEI 11 - Biete bible

1 RÊNGHEI 11

¹Solomona khan Faroa nainu bang khom ni loiin nam dang nupui itam takkah Moab hei, Amon hei, Edom hei, Sidon hei, Hit nupanghei a nei a.

²Kha namhei chungchâng thu khah PUMAPA khan Israela richihei ziangah, “Anmanihei kha rineipui risak no rei, an pathianhei tiang nin lungril an iṭhui inkôi rang a nit,” itin a lei isîr pial tâk a; khannisela, annihei kha Solomonan nupuiin a nei a.

³Solomona khan rêng nainuhei rizasarikah nupuiin a nei a, thâikêm rizathumkah ai nei a nit. A nupuihei khan a lungril Pathian ata an ṭhui inkôi pêk tâk a.

⁴A hong tar tenan chu a nupuihei khan pathian danghei chubai ûnna tiang an ṭhui inkôi tâk a. A pa Davida iamom angkan Solomona chu PUMAPA a Pathian tiangah khan a lungril chu hong ṭha rikip khâi mak a.

⁵Sidonhei pathiannu Astarothi neh Amon hei pathian porinche tak Milkoma kha chubai a ûn tâk a.

⁶PUMAPA mitmun thilsual a tho tâk a, a pa Davida dik lam angkan ani khan chu PUMAPA kha zui ngit khâi mak a.

⁷Khangkan Solomona khan Jerusalem sua tiang panga tlângah khan Moabhei pathian porinche tak Khemosa neh Amona richihei pathian porinche tak Milkoma[4] chubai ûnna rang munhei a siam pêk a.

⁸Khangkah ngirin nam dang a nupui murdi khan an pathianhei ziang chitah namhoihei an hâl a, ribôlna an lan theina rang khom bôlkuang a siam pêk a.

⁹PUMAPA, Israelhei Pathian kha, a ziangah voi nikah zel inlâr a, pathian danghei izui rang ni mak a ti nung khomin, Solomona khan PUMAPA thu zôm mak a, Pathian nung a song tâk a. Khanchu, PUMAPA kha Solomona chungah a ning a thik tâk a.

¹¹Khasikin, PUMAPA khan Solomona ziangah khan, “Hingka hin ni hong om tâk a, ki thuthlung ikhiakin, ki thupêkhei izôm ranga nang kî pêk hi zôm khâi mak che a. Khasikin, ram hi nang sutpai ki ta, ne somhei lâia mi khatkah kî pêk rang a nit.

¹²Khannisela, ni pa Davida sikin ni damsung kârkah chu la tho hi no ning e; nikhomsela, ni naipa zoro tenan chu kî sutpai rang a nit.

¹³Ram pumpui chu sutpai riai no ning e, ki bôi Davida sik neh ki dongtuma kî siam khopui Jerusalem sikah hin nam khatkah chu ni naipa pêng ki ti,” a ti a.

¹⁴PUMAPA khan Edom mi rêng richi Hadada kha Solomona râl a hong inchang tâk a.

¹⁵Kum itam takka matona, Davidan Edom ram a lâk tâk nungah khan, a sipai ruaitu Joaba khan mithihei iphûm rangin a hang fe a. Edom ramah khan amah neh a mihei kha thla rukkah an om a.

¹⁷Kha an om sungah khan Hadada neh a pa som Edom mi ṭhenkahei, Aigupta rama lâizâm ithohei ti no chu Edom mi ipa murdi kha an ithat riai a nit. Kha lâiah khan Hadada chu naipangte a la nit a.

¹⁸Midian ram ata an suak a, Parana an fe a, Parana khan mi ṭhenkan an lei zom sa a. Khanungchu, Aigupta rêng Faroa ziang an zu tlung a. Ani khan inhei a lei pêk a, ifah ranghei a lei ngaitua pêk a, ramhei a lei ipêk a nit.

¹⁹Hadada khan Faroa mit a tlung ok a; khanchu, a nupui Rêngnu Tapenesi inzirpuinu kha nupuiin ân nei a.

²⁰Tapenesi inzirpuinu khan naipa Genubatha a nei pêk a, Rêngnu Tapenesi khan rêng inah khan a enkol pêk a, Genubatha kha Faroa inah Faroa naihei lâiah khan a om tâk a.

²¹Khante, Hadada khan Aigupta rama rithokin Davida kha a thi tâk, sipai ruaitu Joaba khom a thi tâk iti a lei riatin chu Faroa ziangah, “Keima ram ngêiah lei kîr nôk ta rong,” a ti a.

²²Faroa khan, “Ithôm, ki ziangah nî omah hin risam îm nî nei? Khasika ni ram tianga fe ni tum lôi mani?” a ti a. Hadada khan, “Îte ual chu ni mak e; nikhomsela, nen fe rêng rêng roh,” a ti a. Khanchu, a ram tiang a kîr tâk a. Edom rêng ai nit angkan Hadada kha â sual tak tak a, Israelhei irâl isia tak a nit a.

²³Khante, Pathianin Eliada naipa Rezona kha Solomona râl a hong inchang nôk a. Rezona kha a pu Hadadezera, Zoba rêng ziang ata lâizâm itho a,

²⁴rihel pôlhei ruaitu ai chang tâk a nit. Amahih Davidan Hadadezera â nê a, an rithloppui Suriahei a that riai nunga thil itlung a nit. Rezona neh a mihei kha an fe a, Damaska khuaah khan an om a, amakhan ama nungzuituhei khan Suria ram rêng rangin an iphun a nit.

²⁵Solomona damsung kârkah Israelhei irâl an init mai ngai a nit.

²⁶Nebata naipa Jeroboama, Zereda khuaa Efraim mi, Solomona milianhei lâia khatkah khom khan rêng chungah a kut â lek sa tâk a. Jeroboama nu riming kha Zeruii a nit a, numei a nit.

²⁷Rêng chungah a kut a hong ilekna bi chu hingka hin a nit. Solomona khan Jerusalem sua tiang pang a nêl insip a, a pa Davida khua kulpui kha a siatna mun munhei a siam inṭhat a.

²⁸Jeroboama kha mi rât ihâi a nit a; khanchu, Solomona khan mi takritâi tak a nit iti a riat sikin Manasea neh Efraim namhei rama tharum sin itho ranga dândehei murdi chungah ruaitun a siam a.

²⁹Sûnkah chu Jeroboama kha Jerusalem ata ân zin suak lâiin Silo mi Zânthla Ahijan lam lâiah a lei ritongpui a, Ahija khan puan ithar a sil a, an ruaikah bangin phûlah an om a.

³⁰Khante, Ahija khan a puan ithar sillâi khah a lâk a, lek sômlei lek inikan a sân a.

³¹Jeroboama ziangah khan, “Lek sômkah hi lah roh; PUMAPA Israelhei Pathianin hingka hin ai ti a nit: ‘Ringai roh ram hi Solomona sut ki ta, nam sômkah chu nang kî pêk rang a nit.

³²Khannisela, ki bôi Davida sikin neh Israel ram pumpui lâia ki irthlang khopui Jerusalem sikah hin nam khatkah chu aman nei a ti.

³³Ani khan nung ne songin pathian danghei, Sidon pathiannu Astarothi hei, Moab pathian Khemosa hei, Amona richihei pathian Milkoma hei a biak sik neh ki mitmua thil iṭha tho rang neh ki thupêkhei neh ki dânhei izôm ranga a pa Davida angkan ki lampuihei a zui khâi no sikin khahei kha kî tho rang a nit.

³⁴Khannisela, ram pumpui hi Solomona chu la sutpai hi no ning e, ki thupêkhei neh ki dânhei izômtu, ki irthlang Davida sikin a damsung kârkah chu rêngin lan ṭhung mai ki ti.

³⁵Khannisela, ram hi Solomona naipa chu sutpai ki ta, nangmah hi nam sômkah chu nang kî pêk rang a nit.

³⁶Nikhomsela, keimah chubai an ne ûnna ranga ki irthlang khopui Jerusalemah hin ki bôi Davida richia mi ân lal ki nei mai theina rangin nam khatkah chu Solomona naipa pêng ki ti.

³⁷Jeroboam, Israelhei rêngin nang phun ki ti, ni lungdo angkah takin ram pumpui chungah roirêl ni ti.

³⁸Khante, thu nang kî pêk murdi ni zôm a, ki lampuihei ni zui a, ki bôi Davida angkan ki dânhei neh ki thupêkhei izôm ranga ki mitmuah thil iṭha ni thon chu ni ziangah om mai ki ti. Israelhei rêngin nang siam ki ta, Davida zianga ki înkung angkan ner chihein ne nungah khom la hong inlal mai an ti.

³⁹Solomona sual sikin Davida richihei kha deng ki înthei rang a nit; khannisela, kumkhuakan chu ni no nih,’ a ti,” a ti a.

⁴⁰Khasikah khan Solomona khan Jeroboama kha ithat a tum tâk a; nikhomsela, Jeroboama chu a thoi a, Aigupta ramah, Aigupta rêng Sisaka ziangah lâizâm a tho a, Solomona thi mâkah chu Aigupta ramah khan ai om mai tâk a nit.

⁴¹Solomona thurchi danghei, a thil tho murdihei neh a vârna thuhei chu Solomona thurchi riziakna Bu-ah ai chuang a nit.

⁴²Solomona khan Israel pumpui chungah Jerusalem khuaa roi a rêl sung kha kum sômilikah a nit.

⁴³Khanchu, Solomona kha a thi a, a pa Davida khopuiah khan an phûm tâk a. Khante, a naipa Rehoboama kha arthûlin ân lal tâk a.