Read Biete 1 RÊNGHEI 12 Bible Online

1 RÊNGHEI 12 - Biete bible

1 RÊNGHEI 12

¹Rehoboama kha Sekem khuaah a fe a, Israel mâr tiang rama omhei murdi kha Sekem khuaah khan ani khah rênga siam rangin an ribûm tâk a.

²Nebata naipa Jeroboama, Rêng Solomona ṭi a Aigupta rama lâizâm itho khan kha thu khah a lei riatin chu Aigupta rama rithokin a hong kîr nôk tâk a.

³Mâr tiang namhei khan ani kha an zuk ircha a nit a; khanungchu, Jeroboama neh Israel ribûm murdihei kha Rehoboama ziangah an fe a, a ziangah,

⁴“Ni pa Solomona khan kin ringkol ân rik tak tak ngai a; khasikin, ni pa ne sepna neh a ringkol irik tak kin chunga ai bâng hi nen zâng pêk inla; khanchu, ni sin thông kin ti,” an hong ti a.

⁵Khante, ani khan an ziangah, “Sûn thumka nungah hong unla, ki sâmna chu nangni pêng ki ti,” a ti a. Khanchu, mipuihei kha an ṭîn tâk a.

⁶Rêng Rehoboama khan a pa Solomona roisaktua lei iom ngai ulianhei kha â sôn a, “Hi mipuihei hih ki sâm dân rang roi, im nin ne sakpui?” itin ardon a.

⁷Anni khan a ziangah, “Atûnah hin hi mipuihei hih an sin iṭha takka tho nî nuam a nitin chu an ngênna hi thu ṭha takin sâm roh. Khanchu, kumkhuakan iamom takkan ni sin thông an ti,” itin an sâm a.

⁸Khannisela, ulianhei roisakpui kha ipom mak a, ama rualpui vânglâihei, ama roisakpuitua om ngaihei tiang â thlêk a, an ziangah,

⁹“Hi mipuihei, ‘Ni pan kin chunga ringkol ai bang hi nen zâng pêk roh,’ itituhei hi ingkan im ki sâm rang? Nangmanin teh im roi nin ne sakpui?” a ti a.

¹⁰A rualpui vânglâihei khan a ziangah, “Hi mipuihei, ‘Ni pa khan kin ringkol ân rik tak tak ngai a, nangman chu nen zâng pêk roh,’ ni zianga tituhei ziangah khan hingka hin ti roh, ‘Ki pa kong nêkah khan ki kutte hi ai lian ual a nit.

¹¹Ki pa khan ringkol irik tak nangni a lei bâng a, keiman chu nin ringkol kha ki înrik ual rang a nit. Ki pan ṭâizêlin nangni a lei izui ngai a, keiman chu sakor lâidângin nangni ki îzui rang a nit,’ ti roh,” an ti a.

¹²Jeroboama neh mipuihei murdi kha rêngin â ril lam angkah khan sûn thumka nungah khan Rehoboama ziangah an hong a.

¹³Rêng khan ulianhei roisakpui kha ipom loiin, vânglâihei roisakpui lam angkah khan mipuihei kha inrum takkan a lei sâm a.

¹⁴An ziangah, “Ki pa khan nin ringkol a lei inrik a, keiman chu nin ringkol kha ki înrik ual rang a nit. Ki pan ṭâizêlin nangni a lei izui ngai a, keiman chu sakor lâidângin nangni ki îzui rang a nit,” a ti a.

¹⁵PUMAPA khan Silo mi Ahija mang a, Nebada naipa Jeroboama zianga a thu lei ril tâk indet kha PUMAPA lungdo a nit a. Khasikin, rêng khan mipuihei thusîr kha ai uksak ino a nit.

¹⁶Khante, Israelhei murdi khan rêngin an thu sîr ipom mak iti an riatin, mipuihei khan, “Davida ramah hin im dongtum ei nei a? Jesaia naipaah khan richon lua tum nei mang meh. O Israel mihei, nin puan in tiang kîr ta rei. Rehoboama chu a khâtin ringaitua ta riseh,” itin an ipâi a. Khanchu, Israel mipuihei kha an rihel tâk a,

¹⁷Rehoboama kha Judai rama omhei chunga rêng rang bangin an mâk rak tâk a.

¹⁸Khanungchu, Rêng Rehoboama khan tharum sin itho ranga dândehei enkoltu Adonirama kha Israel mihei zianga fe rangin a tir a; khannisela, anni khan lungin an lei dêng that a. Khante, Rêng Rehoboama chu a tâliah a chuang a, Jerusalem khuaah lâizâm a tho zel tâk a.

¹⁹Kha lâi ata kha Israelhei chu Davida insungkuahei chungah an hong irhel mai tâk a nit.

²⁰Israelhei murdîn Jeroboama kha Aigupta rama rithokin a hong kîr nôk tâk iti an riatin chu, mipui ribûmna muna hong rangin an fial a, ani kha Israelhei rêngin an siam tâk a. Juda nam bang kha Davida richihei tianga ṭang chu an nit tâk a.

²¹Rehoboama khan Jerusalem khua a hong tlungin chu, Israela namhei kha idoi a, ama thunuaia in-om nôk rangin Juda namhei neh Benjamina namhei lâia sipai ihâi inzen rithlang suak mi nuaikah neh sîngiriatkah a koibûm a.

²²Khannisela, Pathian mi Simeia ziangah Pathian thu a zuang tlung a.

²³“Judai ram rêng Solomona naipa Rehoboama ziangah neh Juda neh Benjamina namhei murdi ziangah neh mipui danghei ziangah khan,

²⁴PUMAPA khan hingka hin ai ti a nit, ‘Hang fe no unla, Israel mihei, nin suapuihei kha hang doi tlak no rei. Mahni in tiang chit kîr nôk riai rei; hihei hih keima itho a nit,’ itin iril roh,” a ti pêk a. Khaangkan PUMAPA thu kha an zôm a, mahni in chitah an kîr nôk riai tâk a.

²⁵Israel rêng Jeroboama khan tlângrama Sekem khua kha kulpui idetin arkul a, amakhan itôitekah a om a. Khanungchu, khantak ata kha a suak a, Penuel khua kha kulpui idetin arkul nôk a.

²⁶Jeroboama khan a lungrilin, “Atûna thil om dânah hin, ki mihei hih Jerusalemah an fe a, Tempilah khan PUMAPA ziangah ribôlna an hang lanin chu Judai ram rêng Rehoboama tiang ṭang nôk an ta, keimah hi an ne ithat rang a nit,” a ti a.

²⁸Khangkan a ngaitua ok zoiin chu, serâtchal lem inikah rângkachakin a siam a, mipuihei ziangah khan, “Nin ta rangin Jerusalem khuaah Pathian chubai iûn ranga hang ife nangni ân tak pêk a; O Israel mihei, en ta u Aigupta ram ata nangni ṭhui suaktu nin pathianhei hih,” a ti a.

²⁹Rângkachak serâtchal khatkah kha Bethelah a sia a, khatkah kha Danah a sia a.

³⁰Khangkah khan mipuihei kha rângkachak serâtchal chubai iûn rangin Bethelah neh Danah ifen thil isual an hang tho tâk a.

³¹Jeroboama khan tlângsîpheiah bôlkuanghei a siam sa a, Levia richihei ni no, vântlâng lâia mi, thiampuhein a siam a.

³²Jeroboama khan Judai rama kût an inei ngai angkah ngirin thla riatna, a sûn sômlei ringanî kha kût nikhuan ân kung a, Bethela mâichâmah khan a serâtchal rilim siam ziangah khan ribôlna a lan a, tlângsîp bôlkuang thiampua ai siahei angkah khan Bethela khan thiampuhei kha a sia a.

³³Khante, aman a nuam lam angkana a înkung thla ngêi, thla riatna, a sûn sômleiringaka nî, Israel mipuihei ta ranga kût nî-a a înkung pêkah khan Bethelah a fe a, a mâichâm siamah khan ribôlna a lan tâk a.