Read Biete 1 RÊNGHEI 13 Bible Online

1 RÊNGHEI 13 - Biete bible

1 RÊNGHEI 13

¹Judai rama rithokin zânthla khatkah PUMAPA thupêkin Bethelah a hong a, Jeroboama kha ribôlna lan ranga mâichâm kôlah a lei iding lâi takin a hong tlung a.

²PUMAPA thupêk izômin mâichâm kha a rângkhum a, “O mâichâm, PUMAPA khan hingka hin a ti, ‘Ringai roh, Davida insungkuahei lâia naipa arming Josia zuang suak a ta, ni chunga ribôlna lan ngaitu, sanong thiampuhei hi la hong that riai a ta, ni chungah hin miriam ruhei la hong hâl a ti,’ a ti,” a ti a.

³Khante, kha nî ngirah khan risinsiana a pêk a, “Hi mâichâm hih koi indar a ta, meirivâmhei rithek indar chit a ti. Khanungchu, PUMAPA khan keima mangin ai ṭong a nit iti riang nin ti,” a ti a.

⁴Rêng Jeroboama khan Bethela a mâichâm siam kha Pathian mi khan a rângkhum iti a riatin chu thu a pêk a, “Kha miriam khah man rei,” itin mâichâma rithokah khan a kutin a hang iban a. Voikazelin iman ituma â banna kut kha a hong zeng tâk a; khanchu, a kut kha kâi nôk thei khâi mak a.

⁵Zânthlan PUMAPA thua risinsiana ranga a îsîr angkah khan mâichâm khom kha a koi indar a, mâichâma meirivâmhei kha arthek indar chit tâk a.

⁶Rêng Jeroboama khan Zânthla ziangah khan, “Ki kut hi a hong dam nôk theina rangin ringaiihoi takkan PUMAPA ni Pathian ziangah ne ṭongṭai pêk roh,” a ti a. Khante, Zânthla khan PUMAPA ziangah a ṭongṭai pêk a, rêng kut kha a hong dam nôk tâk a.

⁷Khanungchu, rêng khan Zânthla ziangah, “Ki inah ki ziangah hong inla, hong ringam hi roh ba, loman khom nang pêng ki ti,” a ti a.

⁸Zânthla khan, “Ni neinun rizâtkah khom ne peh man inla, ni ziangah chu hong ual no ning e, hi munah hin ibai khom fah no ning a, tui khom in viat no ning e.

⁹‘Ibai va fah non la, tui rêng rêng khom va in no roh, ni va fena lampui ngirah khom hong kîr nôk khâi no roh,’ itia PUMAPA thua tir kêng kî nit,” a ti a.

¹⁰Khanchu, lam dangah a fe a, Bethela a hongna lampuiah khan kîr nôk khâi mak a.

¹¹Bethel khuaah khan zânthla tarpa khatkah hi a om a, a naipahei khan kha nî-a Bethela Judai rama zânthla thiltho murdi neh rêng zianga a thu sîrhei khom kha an pa an iril a.

¹²Khante, an pa khan an ziangah, “Taktiang lampui âm ai fe tâk?” a ti a. A naipahei khan Judai rama rithoka hong zânthla kîr nôkna lampui kha an inmu a.

¹³Khanchu, a naipahei ziangah, “Sakuartung ne hang inrifûk pêk rei,” a ti a. Sakuartung kha an inrifûk pêk a; khanchu, a chuang a,

¹⁴Judai rama zânthla kha arzûl thal a, Saso thing nuaia â ṭhung lâi kha a va mu a, a ziangah, “Judai rama rithoka zânthla kha ni nit im?” a ti a. Ani khan, “O ki nit,” a ti a.

¹⁵Khanchu, ani khan, “Ki in tiang ki ziangah hong inla, bu hong ne hi roh,” a ti a.

¹⁶Khannisela, Judai rama rithoka zânthla khan, “Ni ziangah kîr nôk thei ni mang e, ni ne ditsakna pom thei khom ni mang e. Hi munah hin ni ziangah ibai khom fah no ning a, tui rêng rêng khom in no ning e.

¹⁷‘Ibai va fah non la, tui khom va in no roh, ni va fena lampuiah khom hong kîr nôk khâi no roh,’ itin PUMAPA khan thu a ne ipêk a nit,” a ti a.

¹⁸Khanchu, Bethela rithoka zânthla tarpa khan a ziangah, “Kei khom nangma angkah ngira zânthla kêng kî nit, PUMAPA thupêkin vântirtônin, ‘Ibaihei ifaa tuihei iin rangin ni in tiang ṭhui kîr roh,’ itin a ne îsôn a nit,” a ti a. Khannisela, zânthla tarpa khan ai lêm a nit.

¹⁹Khanchu, Judai rama rithoka zânthla kha zânthla tarpa ziangah khan a kîr nôk tâk a, a inah khan ibaihei ifan tuihei a in tâk a.

²⁰Khante, khalai an rikhîl lâiah khan zânthla tarpa ziangah khan PUMAPA thu a zuang tlung a.

²¹Judai rama rithoka hong zânthla ziangah khan, “PUMAPA khan hingka hin a ti, ‘PUMAPA thu ôi loiin, PUMAPA ni Pathianin thu nang ai pêk ne pom no sikin neh,

²²ni hong kîr nôk a, ibai va fah non la, tui khom va in no roh, a tina mun ngêiah khan ibai ni fâk a, tuihei ni in sikin ni ruak hi ni puhei thlânah inzâl sa ni no nih,’ a ti,” itin â sîr suak tâk a.

²³Khante, ibaihei an fâk a, tuihei an in zoiin chu, zânthla tarpa khan Judai rama rithoka zânthla ta rangah khan sakuartung ân rifûk pêk a,

²⁴a chuanga a fe tâk a. Khante, lam lâiah khan sakeibaknei neh an ritong a, a lei sê that tâk a. A ruak kha lam lâiah â tâl ṭian a, sakuartung neh sakeibaknei kha ruak kôlah khan an iding ṭian seng seng a.

²⁵Thleng rilôi mi ṭhenkan lam lâia ruak itâl ṭiana om neh ruak kôla sakeibaknei iding ṭian kha an mu a. Bethel khuaah khan an fe a, an thil mu kha an va sîr a.

²⁶Zânthla tarpa khan kha thu a lei riatin chu, “Zânthla, PUMAPA thupêk zôm nuam ino pa kha a nit khah. PUMAPA khan a ti lam angkah takin sakeibaknei ziangah a pêk a, a lei ibô a, ai sê that tâk a nit khah,” a ti a.

²⁷Khanungchu, a naipahei ziangah khan, “Ki sakuartung nen rifûk pêk rei,” a ti a. Khante, an inrifûk pêk a.

²⁸Khanchu, a chuang a, a fe a, zânthla ruak lam lâia tâl ṭian neh ruak kôla sakeibaknei neh sakuartung lei iding ṭian kha a va mu a. Sakeibaknei khan ruak kha lei fah mak a, sakuartung khom kha a lei isê no a nit.

²⁹Zânthla tarpa khan ruak kha a lâk a, sakuartung chungah a bang a, Bethel khuaah khan isûn rang neh iphûm rangin a chôi kîr tâk a.

³⁰Ruak kha ama insungkua thlânah a phûm a, amah neh a naipahei khan an sûn a, “O ki suapuipa, ki suapuipa,” a ti a.

³¹A phûm zoi nungah khan zânthla khan a naipahei ziangah, “Ki thi tenan chu hi zânthla phûmna thlânah hin ne hong phûm sa unla, ki ruak kha a kôlah hin inzâl rei.

³²PUMAPA thupêka Bethela mâichâm neh Samari ram khopuiheia bôlkuang murdi a rângkhumna thu kha a hong itlung idik ngêt rang a nit,” a ti a.

³³Kha thil nung khomah khan Jeroboama khan a omdân dik ino kha la bâng ual mak a, vântlâng lâia mi a mâichâm siama thiampu rangin a la phun mai a. Bôlkuanga thiampuhei an om theina rangin â nuam kangân chu thiampu rangin ân ran ngai a.

³⁴Kha sualna kha Jeroboama insungkua inrimangtu neh ân lalna inrimang diptu chu a hong nit tâk a.