Read Biete 1 RÊNGHEI 14 Bible Online

1 RÊNGHEI 14 - Biete bible

1 RÊNGHEI 14

¹Kha lâiah khan Jeroboama naipa Abija kha dam mak a.

²Jeroboama khan a nupui ziangah, “Ki nupui ni nit iti tutên nang an ithlei nona rangin risiam danglam inla, Israel rêng ki nit rang thu ne riltu zânthla Ahija, Silo khuaa om ziangah va fe roh.

³Ibai thliam sômkah neh ibailûm tete neh khuaitui ûmkah chôi inla, a ziangah va fe roh. Ei naipa omdân rang ridon inla, ani khan nang lei iril a ti,” a ti a.

⁴Khanchu, Jeroboama nupui khan khangkah khan a tho a, a thoi a, Siloah khan a fe a, Ahija inah khan a va fe tâk a. Ahija kha a tar tâk sikin a mit kha a zîng tâk a.

⁵PUMAPA khan Ahija ziangah, “Ringai roh, Jeroboama nupui, a naipa damno chungchânga nang isôn rangin ai hong rang a nit a. Hingka hin a ziangah ni lei ti rang a nit. Jeroboama nupui kha mi narân angkan rivo danglamin a hong irvo a nit,” a ti a.

⁶Ahija khan kotbâia a hong lût lâia a ke rî a hei riat kaneh chu, “Nangmah, Jeroboama nupui hong lût roh; îtho sika mi narân angkana risiam im nî nit? Thurchi ṭhano tak nang iril rang kî nei kêng dua.

⁷Fe nôk tan la, Jeroboama ziangah, PUMAPA Israelhei Pathianin hingka hin a ti, ‘Mipuihei lâi ata hi nang ker thlang suak a, ki mi Israelhei chungah ruaitun nang ki siam a.

⁸Davida richiheia rithokin ram ki sutpai a, nangmah nang ki pêk a. Khannisela, nang chu ki bôi Davida angkan omak che a, ani khan chu ki thupêkhei â pom a, ki mitmuah thil iṭha bang itho tumin a lungril murdin a ne zui ngai a.

⁹Nangman chu ni matona roirêltuhei murdi nêkan thil ni thonsual natinsat bîk a, ki ning nen thik pêknan pathian danghei neh mirmil inluanhei ni siam a, nung ni ne isong tâk a nit.

¹⁰Khasikin, ni insungkua chungah hin thil ṭhano zuang ithlun ki ta, ner chihei ipa murdi chu naipang neh ulian khom inrimang riai ki ti. Mîn nimnok an iphît infâi liai ngai angkah hin ni insungkuahei hi an rimang vang mâkah chu kî phît infâi riai rang a nit.

¹¹Ni insungkuaa mi tukhom khopuia thi murdihei chu uihein fâng an ta, rama thi murdihei chu vasatelhein fâng an ti. Amakha PUMAPA khan ai ti a nit,’ ti roh,” a ti a.

¹²Ahija khan Jeroboama nupui ziangah khan a ti nôk a, “Atûnah hin thoi inla ni in tiang kîr nôk ta roh, khopui sung ni lût kaneh ni naipa chu ai thi rang a nit.

¹³Khanchu, Israelhei murdîn sûn an ta, phûm an ti. Jeroboama insungkuahei lâiah hin ama bang kha balama thlâna phûm nîng a ti, Jeroboama insungkuahei lâiah hin ama chung bangah hin PUMAPA Israelhei Pathian chu ai lôm a nit.

¹⁴PUMAPA khan atûn zelah hin Jeroboama inlalna inmong rangin Israelhei chungah rêng ai phun rang a nit.

¹⁵PUMAPA khan Israelhei chu kuttum thông a ta, vadung pharâm inîng angkan Israelhei chu hong innîng a ti. Aseri pathiannu rilimhei isiam a, PUMAPA ning an inthik sikin an chibulhei a lei ipêk tâk, hi ram iṭha tak ata hi Israelhei chu la phâi infâi vang a ta, Eufratis vadung pen tiang lâ thekindar a ti.

¹⁶Israelhei chu Jeroboama khan â ruai insualnahei sikin PUMAPA khan Israelhei chu nung ai song rang tâk a nit,” a ti a.

¹⁷Jeroboama nupui kha a thoi a, Tirza khua tiang a fe tâk a. Khante, a in kotbâi a va tlung kaneh khan naipang kha a thi tâk a.

¹⁸PUMAPA khan a bôi Ahija manga thu a lei îsîr tâk angkah ngêiah khan Israelhei murdi khan an sûn a, an phûm tâk a.

¹⁹Jeroboama thurchi dang, â râl doi dân thuhei, a roirêl dân thuhei kha Israel rênghei Thurchi Riziakna Bu-ah khan ai chuang riai a nit.

²⁰Jeroboama roirêl sung chu kum sôminikah kum inikah a nit. Khante, a thi a, an phûm tâk a, a naipa Nadaba kha arthûlin ân lal tâk a.

²¹Solomona naipa Rehoboama kha Judai ramah ân lal a. Ân lal phut lâiah khan Rehoboama kha kum sômilika neh kumka mi a nit a, PUMAPA khan amah chubai ûnna ranga Israel ram pumpui lâia a irthlang khopui Jerusalemah khan kum sômlei kum sarikah ân lal a. Rehoboama nu kha Naami, Amon mi a nit.

²²Judahei khan PUMAPA mitmun thilisual an tho a, an puhei thiltho murdi khûmin an sualnahei khan PUMAPA ningthik kha an chok ithoi pêk a.

²³Mirmil pathian chubai ûnna bôlkuanghei an siam a, tlângsîp tinah neh thingkung nuaiheiah hin chubai ûnna rangin lungphunhei iphunin, Aseri pathiannu rilimhei an sia a.

²⁴Khahei nêka porinche ual chu sanonghei ribôlna munah khan nupang neh ipahei nochizuarin an om a. Israela richihei Kanan ram an hong lût a, an matonah PUMAPA khan ai ûmisua tâk namhei thiltho porinche tinrêng kha Juda mihei khan an hong itho tâk a nit.

²⁵Rêng Rehoboama inlal kum ringana kumah khan Aigupta rêng Sisaka khan Jerusalem khua kha a hong doi a.

²⁶Tempila richonhei neh rêng ina richonhei kha a lâk riai a, Solomona rângkachak ipho siam murdihei khom kha a lâk sa riai a.

²⁷Rêng Rehoboama khan kha phohei rithûlah khan dâr iphohei a siam a, rêng in kotbâi vêngtu ruaituhei ân kol a.

²⁸Rêng kha PUMAPA Tempilah a lût ikipah vêngtuhei khan kha iphohei kha an chôi a, kha rizoin chu vêngtuhei chontanah an isia nôk ngai a nit.

²⁹Rehoboama thurchi danghei neh a thiltho murdihei chu Juda rêng hei Thurchi Riziakna Bu-ah khan ai chuang a nit.

³⁰Ân lal sung kârkah kha Rehoboama neh Jeroboama kha an irdoi mai ngai a nit.

³¹Rehoboama chu a thi a, Davida khopui rêng thlânah khan an phûm tâk a. Khante, a naipa Abija kha arthûlin ân lal tâk a.