Read Biete 1 RÊNGHEI 15 Bible Online

1 RÊNGHEI 15 - Biete bible

1 RÊNGHEI 15

¹Nebata naipa rêng Jeroboama inlal kum sômleiiriatna kumah khan Judahei chungah Abija kha a hong inlal a.

²Jerusalem khuaah kum ithumkah ân lal a. A nu riming kha Maaki, Absaloma nainu a nit.

³A pa thilisual tho murdihei kha a tho ngir a, a pu Davida lungril angkan a lungril kha PUMAPA a Pathian tiangah khan ṭha rikip mak a.

⁴Khannisela, Davida sikin PUMAPA a Pathianin â nunga Jerusalema la hong inlal rang neh Jerusalem khua ding indetna rangin Abija kha naipa a pêk a.

⁵Hit mi Uria chungchâng ti no-ah chu Davida khan PUMAPA mitmuah thil iṭha a tho ngai sik neh a damsung kârkah PUMAPA khan itho ranga thu ai pêk tâk kangân chu a nial tlak ngai no sikin PUMAPA khan amahi ai tho a nit.

⁶Abija kha ân lal sung kârkah kha Jeroboama neh an ridoi mai ngai a.

⁷Abija thurchi danghei neh a thiltho murdihei chu Juda rênghei Thurchi Riziakna Bu-ah ai chuang riai a nit.

⁸Khante, Abija chu a thi a, Davida khopuiah an phûm tâk a, arthûlin a naipa Asaa kha ân lal tâk a.

⁹Israel rêng Jeroboama inlal kum sôminikna kumah khan Asaa kha Judahei chungah a hong inlal a,

¹⁰Jerusalemah khan kum sômilikah neh kumkah ân lal a. A pi riming kha Maaki, Absaloma nainu a nit.

¹¹Khante, Asaa kha a pu Davida angkah ngirin PUMAPA mitmuah thil iṭha a tho ngai a.

¹²Khante, nochizuar ipa neh nupanghei murdi kha a ram ata a ûmisua a, a puhein mirmil an lei isiam murdi kha a pai vang a.

¹³Khante, a pi Maaki khom kha, mirmil porinche tak tak Aseri pathiannu rilimhei a siam ngai sikin a rêngnu nitna ân bâng a. Asaa khan mirmilhei kha a tuk inlîr a, Kidron vadungah a hâl a.

¹⁴Sanonghei bôlkuang kha chu pai vang mak a; nikhomsela, Asaa lungril kha a damsung kârkah PUMAPA tiangah khan ai ṭhat rikip a nit.

¹⁵Khante, a pa thil lei lan sai tâk neh amah ngêiin a lei ilan tâk tangkarua hei, rângkachak hei, bûrbêlhei kha PUMAPA Tempilah a lâk lût a.

¹⁶Juda rêng Asaa neh Israel rêng Baasa kha an inlal sung kârkah an ridoi mai ngai a.

¹⁷Israel rêng Baasa khan Judahei a hong rûn a, Judai rama thil ilût rang neh isuak rang idanna rangin Rama khuaah kulpui a siam a.

¹⁸Asaa khan PUMAPA Tempil neh rêng ina richon la om, tangkarua neh rângkachak murdihei kha a lâk a, a milianhei ân chôi a, hi thu pêlin rêng Asa khan Damaska khuaa om Suria rêng Benhadada ziangah a tir a. Benhadada kha Heziona nai Tabrimona naipa a nit. Benhadada ziangah khan,

¹⁹“Ei pahei ruai kârah rual richanna a lei iom ngai angkan keimah neh nangma kârah rualrichanna om riseh. Hi tangkaruahei neh rângkachakhei hi loman rangin nang ki hong ithon a nit. Israel rêng Baasa hin ki ram sung ata a sipaihei a lâk kîr theina rangin a zianga ni thu thlung kha sût roh,” a ti a.

²⁰Rêng Benhadada khan rêng Asaa thu kha a lei ipom a; khanchu, Israel khuahei kha idoi rangin a sipai ruaituhei a tir a, Izon khua hei, Dan khua hei, Abel-Beth Maaka khua hei, Galili dîl kôl ram hei neh Naftali bial pumpui kha a lâk pêk tâk a.

²¹Israel rêng Baasa khan kha thu khah a lei riatin chu Rama khua kulpui isin kha arngam a, Tirza khuaah a fe tâk a.

²²Khanungchu, Rêng Asaa khan thu â sua a, Israel ram pumpuiah tute â ôl rêng rêng om loiin, Rêng Baasan Rama khua kulpui siamna ranga tinmatua ai bûmhei kha an thiar a, kha tinmatuahei imangah khan Rêng Asaa khan Mizpa khua neh Benjamin rama Geba khua kha kulpuiin arkul tâk a.

²³Rêng Asaa thurchi dang murdihei, a thiltho murdihei, a kho siamhei kha Juda rênghei Thurchi Riziakna Bu-ah khan ai chuang riai a nit. A tar nung tenah khan a keah natna rî ṭhano arvoi a, lôn thei loiin ai om tâk a nit.

²⁴Asaa kha a thi a, Davida khopui rênghei thlânah khan an phûm tâk a. Khante, a naipa Jehosafata kha arthûlin ân lal tâk a.

²⁵Rêng Jeroboama naipa Nadaba kha Juda rêng Asaa inlal kum iniknaah khan Israelhei chungah a hong inlal a, Israelhei chungah kum inikah a înlal a nit.

²⁶PUMAPA mitmun thil ṭhano tak a tho ngai a, a pa lampui zui kha a zui a, Israelhei kha thilsual thona tiang a ṭhui a.

²⁷Isakara nama mi Ahija naipa Baasa khan Nadaba kha a phiarrûk a, Nadaba neh a sipaihei khan Filistia rama Gibethon khua an hual khap lâiah khan Baasa khan Nadaba kha ai that a nit.

²⁸Juda Rêng Asaa inlal kum ithumnaah khan Baasa khan Nadaba ai that a nit. Khanchu, Nadaba rithûlin Baasa kha Israelhei chungah a hong inlal tâk a.

²⁹Rêng a chang kaneh khan Jeroboama insungkuahei murdi kha ai that riai a nit. PUMAPA khan Silo khuaa mi a bôi Ahija manga a lei îsîr tâk angkah khan Jeroboama insungmihei chu khatkah khom zua loiin an ithat riai a nit.

³⁰Jeroboama thilsual tho khan Israelhei kha a ṭhui insual a, PUMAPA, Israelhei Pathian ning kha ân thik pêk sika kha thilhei kha ai tlung a nit.

³¹Nadaba thurchi danghei neh a thiltho murdihei chu Israel rênghei Thurchi Riziakna Bu-ah khan ai chuang riai a nit.

³²Rêng Asaa neh Rêng Baasa kha an inlal sung kârka kha an irdoi mai ngai a nit.

³³Juda Rêng Asaa inlal kum ithumnaah khan Ahija naipa Baasa kha Tirza khuaah Israelhei murdi chungah a hong inlal a, kum sôminikah neh kum ilikah a înlal a nit.

³⁴PUMAPA mitmun thil ṭhano tak a tho ngai a, Jeroboama lampui a zui a, Israelhei kha sualah a ṭhui a.