Read Biete 1 RÊNGHEI 16 Bible Online

1 RÊNGHEI 16 - Biete bible

1 RÊNGHEI 16

¹Baasa chungchâng, Zânthla Jehua, Hanania naipa ziangah PUMAPA thu a zuang tlung a.

²“Mîn îte bea an ibe no kha nang ki chôiinrisâng a, ki mi Israelhei chungah hin ruaitun nang ki siam a, khan atûnah hin Jeroboama angkan thilisual ni tho a, ki mihei sualah ni ṭhui a, an sualnahei khan ki ningthik an ichok thoi a.

³Khasikah khan Jeroboamah ki tho lam angkah takin nangmah neh ni insungmihei hi kî tho rang a nit.

⁴Ni insungmihei lâia mi khopuia thi murdihei chu uihein fâng an ta, rama thi murdihei chu vasatelhein fâng an ti,” a ti a.

⁵Baasa thurchi danghei, a thilthohei, a thiltho theiziahei chu Israel rênghei Thurchi Riziakna Bu-ah khan ai chuang riai a nit.

⁶Baasa kha a thi a, Tirza khuaah khan an phûm tâk a. Khante, a naipa Elaa kha arthûlin a hong inlal tâk a.

⁷Baasa neh a insungmihei khan PUMAPA mitmuah thilisual an tho natinsat sikin Hanania naipa zânthla Jehua ziangah PUMAPA thu a zuang tlung a. Rêng Jeroboama angkan thilisual a tho sik neh Jeroboama insungmihei kha a that riai sikin PUMAPA kha Baasa chungah khan a ning ai thik tak tak a nit.

⁸Juda Rêng Asaa inlal kum sôminika ruknaah khan Baasa naipa Elaa kha Tirza khuaah Israelhei chungah a hong in lal a, kum inikah a înlal a nit.

⁹Khante, a milianhei lâia khatkah, a tâli rizaka chunga ruaitu Zimria khan a phiarrûk a. Sûnkah chu Ela kha Tirza khuaah, Tirza khuaa rêng in enkolna tianga ruaitu Arza inah zu a lei inrui a.

¹⁰Zimria khan insung a va lût a, Ela kha a va that a, arthûlin ân lal tâk a. Hihei hih Juda Rêng Asaa inlal kum sôminikah kum sarika kuma tlung a nit.

¹¹Zimria kha rêng a hong chang kaneh chu Baasa insungmihei murdi kha a that riai a. A suapuihei neh a malhei, ipa rêng rêng chu khatkah khom ai zua no a nit.

¹²Khangkah khan PUMAPA khan Baasa chungchâng thua zânthla Jehua manga a lei isîr lam angkah takah khan Zimria khan Baasa insungmihei murdi kha ai that a nit.

¹³Mirmil pathian an biak a, Israel mihei an ṭhui insual sikin Baasa neh a naipa Ela khan PUMAPA, Israelhei Pathian ning kha an inthik pêk sika a nit.

¹⁴Ela thurchi danghei neh a thiltho murdihei chu Israel rênghei Thurchi Riziakna Bu-ah khan inchuang riai a nit.

¹⁵Juda Rêng Asaa inlal kum sôminikah kum sarinaah khan, Zimria kha Tirza khuaah sûn sarikah ân lal a. Israel sipaihei khan Filistia rama Gibethon khopui kha an hual khap lâi a nit a.

¹⁶Khante, khopui hualtuhei khan Zimrian rêng kha a phiarrûka, rêng a that tak iti an lei riatin chu kha mun zelah khan Israel sipaihei murdi khan sipai ruaitu Omria kha, kha nî zelah khan an riabukah Israelhei chunga rêng rangin an siam tâk a.

¹⁷Khante, Omria kha Israel sipai murdihei neh Gibethon khua kha an mâk a, Tirza khua an hong hual tâk a.

¹⁸Khante, Zimria khan khua kha an lâk tâk iti a riatin chu rêng inah khan a khâtin arhâl that tâk a.

¹⁹PUMAPA mitmuah thil ṭhano tak ithoa a sualna sik neh Jeroboama lampui zui kha a zui a, Israelhei sualah a ṭhui lût sika a nit.

²⁰Zimria Thurchi danghei neh, rêng a phiarrûk dân thuhei kha Israel rênghei Thurchi Riziakna Bu-ah khan ai chuang riai a nit.

²¹Israel mipuihei kha lôm inikan an lei inṭhen tâk a, mipui rizâtkah khan Ginatha naipa Tibnia kha rênga siam itumin an zui a; khante, arzâtkahein Omria an zui a.

²²Nikhomsela, Omria zuituhei khan Tibnia zuituhei kha an inê tâk a. Tibnia kha a thi a, Omria kha a hong inlal tâk a.

²³Juda Rêng Asaa inlal kum sômithumka khatka kumah khan Omria kha Israelhei chungah a hong inlal a, Tirza khuaah khan kum irukkah a înlal a nit.

²⁴- Khanungchu, Semera ziang ata Samari tlâng kha tangka sângirukkan archôk a, kha tlângah khan khua a siam a, a kho siam rimingah khan kha tlâng ineitu Semera riming ipêlin Samaria ai be a nit.

²⁵Omria khan PUMAPA mitmun thil ṭhano tak a tho ngai a, a matona mihei murdi nêkan thil a thonsual natinsat bîk a.

²⁶Jeroboama angkah khan a sualhei sik neh Israel mihei kha mirmil biakna tiang neh sualna tiang a ṭhui sikin PUMAPA, Israelhei Pathian ning kha ân thik pêk a.

²⁷Omria thurchi danghei, a thilthohei neh a thiltho theizia a înlang thuhei kha Israel rênghei Thurchi Riziakna Bu-ah khan ai chuang riai a nit.

²⁸Omria kha a thi a, Samaria khuaah khan an phûm tâk a. Khante, a naipa Ahaba kha arthûlin a hong inlal a.

²⁹Juda Rêng Asaa inlal kum sômithumkah kum iriatka kumah khan Omria naipa Ahaba kha Israelhei chungah a hong inlal a, Samaria khuaah khan kum sôminikah inikah Israelhei chungah a înlal a nit.

³⁰Ahaba khan a matona mihei murdi nêkan PUMAPA mitmun thil ṭhano tak a tho ngai a.

³¹Jeroboama sualna angkan sual kha chu a ta rangin îte ân rupin be mak a; Sidonhei rêng Ethbaala nainu Jezebeli nupuiin a nei a, Baalah chubai a ûn sa tâk a.

³²Samari khuaah khan Baala tempilhei a sin a, Baala rang mâichâm a siam pêk a, Baala biakna inah khan a sia a.

³³Aseri rilimhei khom a siam a; a matona Israel rênghei murdi nêkan Ahaba khan PUMAPA, Israelhei Pathian ningthikna rang thil ai tho natinsat bîk a nit.

³⁴Ân lal lâiah khan Bethel mi Hielan Jeriko khua a siam a, PUMAPA khan Nuna naipa Josua manga a lei îsîr tâk angkah khan Hiela khan a nai lutîr Abirama chânin lungphûm kha a phûm a. Khante, a nai ithlum Seguba chânin a kul kotkhârhei kha a înding a nit.