Read Biete 1 RÊNGHEI 17 Bible Online

1 RÊNGHEI 17 - Biete bible

1 RÊNGHEI 17

¹Gilead rama Tisbe khuaa mi zânthla Elija khan Ahaba ziangah khan, “PUMAPA a sin kî tho ngai Israelhei Pathian ringna chingin kî ti a nit. Kum itena sung manih chu ki thu ni non chu rido neh rua rêng rêng sûr no nih,” a ti a.

²Khanungchu, PUMAPA khan Elija ziangah,

³“Hin tak ata hi suak inla, khosak tiang ipanin fen la, Jordan râla om Kerit vadung rikamah hang ribih roh.

⁴Vadung tui kha fîm ni ta, kha munah khan nang ifâ rangin vaâkhei thu kî pêk tâk a nit,” a ti a.

⁵Elija khan PUMAPA thupêk kha a zôm a, a fe a, Kerit vadung rikamah khan a hang om tâk a.

⁶Vadung tui kha a fîm a, vaâkhein zîng tiang neh kholoi tiang ibai neh sa an hong riput pêk ngai a.

⁷Khante, itôiteka nungah chu kha ramah khan rua rêng rêng a sûr khâi no sikin vadung kha a hong kang vang tâk a.

⁸Khanungchu, PUMAPA khan Elija ziangah,

⁹“Atûn chu thoi inla, Sidon rama Zarefat khuaah fen la, amakhan om roh. Nang ifâ rangin numei khatkah thu kî pêk tâk a nit,” a ti a.

¹⁰Khanchu, Elija kha Zarefat khuaah khan a fe tâk a; khante, kha khua kul kotbâi khah a va tlungin chu numei khatkah thing ila fe hi a lei om a, Elija khan a hang mun chu a ziangah, “Bêlin tui ichîntekah ne hong chôi pêk ta, lei in rong,” a ti a.

¹¹Khante, tui ilah ranga â fe khah a hang isam a, “Ibai ichîntekah ne hong chôi pêk sa roh dua,” a ti a.

¹²Numeinu khan, “PUMAPA ni Pathian ringna chingin kî ti a nit, ibai chu nei mang a, bêlah ibaidi kutkah neh bûrah siriak ichîntekah bang kî nei a nit. Ki naipa neh kin fâk rang siamna rangin thing iṭang khatkah inikah ki hong irkit a nit. Amakhah fâng kin ta; khanungchu, bu ngêiin la thi ta rong ung,” a ti a.

¹³Elija khan a ziangah, “Ṭi no roh, fen la, nin fâk rang kha va siam roh. Khannisela, kha ni nei sunte ata kha ibai ichîntekah ne siam pêk masan la, amakhah ne hong chôi pêk roh; kha rizoiah khan nangma rang neh ni naipa rang chu la siam roh.

¹⁴PUMAPA Israelhei Pathianin hingka hin ai ti a nit: ‘Keimah PUMAPA hin rinêng chungah rua ki zuang insûr mâkah chu ibaidi bêl kha rong no nia, siriak bûr khom kha kang ual no nih,’ a ti,” a ti a.

¹⁵Numeinu kha a fe a, Elija ti lam angkah khan a va tho a; khanchu, an rêngka sûn itam takka an fâk rang kha an nei tâk a.

¹⁶Elija manga ai ti PUMAPA thu angkah khan ibaidi bêl kha rong ual mak a, siriak bûr khom kang ual mak a.

¹⁷Khante, kha thil nungah khan hingka hin a nit a, numeinu naipa kha dam loiin a hong om tâk a, a nat ân rik ual ual a, a nungkhônah chu a thi tâk a.

¹⁸Numeinu khan Elija ziangah, “O nangmah, Pathian mi, ithôm hingka hin ki chungah nî tho? Ki sualnahei Pathian maah târ inlang suak a, ki naipa ne that pêk ranga hong im nî nit hi?” a ti a.

¹⁹Khante, Elija khan a ziangah, “Ni naipa kha ne hong peh ta,” a ti a. Khanchu, â pomlâi kha a lâk pêk a, a omna chuanchung chontanah khan â poma a fepui a, ama zâlmunah ân zâl a.

²⁰Khanungchu, iring takkan a ṭongṭai a, “O PUMAPA ki Pathian, îtho sik im hi numeinu chungah hin hi thil ṭhano hih ni zuang îthlun? Ki chunga lungkhamna neiin a ne enkol inṭhat a, îtho sik im atûnah hin a naipa nî that pêk tâk?” a ti a.

²¹Khanungchu, Elija khan naipang chungah khan voi thumkah â bok a, PUMAPA kha â sam a, “O PUMAPA ki Pathian, hi naipang ringna hi zuang peh nôk roh,” a ti a.

²²PUMAPA khan Elija ṭongṭaina kha a sâm a; khanchu, naipang kha rithuak hong ilah nôkin a hong ring nôk tâk a.

²³Elija khan naipang kha a nu ziangah chuannuai chontanah a zuk ipom a, a nu ziangah, “En ta, ni naipa hi a ring nôk tâk,” a ti a.

²⁴Numeinu khan Elija ziangah, “Atûn chu Pathian mi ni nit a, nangma mangin PUMAPA ai ṭong titak a nit iti ki riat tâk,” a ti a.