Read Biete 1 RÊNGHEI 18 Bible Online

1 RÊNGHEI 18 - Biete bible

1 RÊNGHEI 18

¹Zoro isôt zanka nung, khokang kum ithumna kumah khan PUMAPA khan Elija ziangah, “Fen la, Rêng Ahaba ziangah var lang roh; rinêng chungah hin rua ki zuang însûr rang tâk a nit,” a ti a.

²Khanchu, Elija kha Ahaba zianga rilang rangah khan a fe tâk a. Samari ramah khan iṭâm kha a natinsat ok a.

³Khasikin, Ahaba khan rêng in enkoltu Obadia kha a koi a; Obadia kha PUMAPA ṭi mi tak a nit a.

⁴Jezebelin PUMAPA zânthlahei a that lâiah khan Obadia khan zânthla rizakah a ṭhui a, pôl inika siamin sômringa ngakan ipûkah a thup a, ibai neh tui ai pêk ngai a nit.

⁵Ahaba khan Obadia ziangah, “Tho ta, tuinâr omna murdi neh varuam omna murdi la var fang rei; sakorhei neh sakuartunghei hi ei inzôk theina rangin loisûlhei ei va mu pêk thei duai lôi im; khanonchu, ranhei hi ei îchân riai rang kêng,” a ti a.

⁶Khanungchu, ram an rifang suak rang an risem a, Ahaba kha ama khâtin lam dangah a fe a, Obadia khom kha ama khâtin lam dangah a fe a.

⁷Khangkana Obadia a fe lâiah khan Elija neh an ritong thut a. Obadia khan a la riat a; khanchu, â bok a, “Nangmah ni nit na, Epu Elija,” a ti a.

⁸Ani khan a sâm a, “O ki nit, fen la ni pu kha hin ki om iti va ril roh,” a ti a.

⁹Obadia khan, “Thil im ki thonsual a, ni bôi hi ithat ranga Ahaba kutah ipe nî nuam hi?

¹⁰PUMAPA ni Pathian ringna chingin kî ti a nit, ki pu Ahaba khan nangmah nang a zong nona nam neh ram rêng rêng ai nei khâi ino a nit. An ramah omak cheh iti roirêltuhein an hong iril ikipah, Ahaba khan nang an muno thu-ah vâni a înrisâm ngai a nit.

¹¹Atûnah hin nangman chu ki pu ziangah ife a, hin ni om iti va ril rangin ni neh inuam a nit na!

¹²Nang ki mâk kaneh hin PUMAPA rithla khan ki riat nona munah nang ṭhui pat ngân ta sela ingkam ai nit rang? Khanungchu, hin ni om iti Ahaba ki va ril tenan nang hong mu khâi no sela chu a ne ithat rang a nit. Keimah, ni bôi hi ki thuarbap phut ata PUMAPA chubai iûntu ki nit.

¹³Ki pu hin Jezebelin PUMAPA zânthlahei a that lâia ki thiltho, PUMAPA zânthlahei mi rizaka sar ipûkah ki thup a, ibai neh tuia ke fa ziahei kha nî riat riai ni mak im a?

¹⁴Khasikin, ingkam atûnah hin nangman, ‘Fen la, Elija kha son a om, iti ni pu va ril roh,’ ni ne ti tlia? A ne lei ithat ngêt ngêt rang a nit,” a ti a.

¹⁵Khante, Elija khan, “A sin kî tho ngai Tinrêngthothei PUMAPA riming ichingin kî ti a nit, vuanah hin rêng ziangah ki irlang ngêt ngêt rang a nit,” a ti a.

¹⁶Khanchu, Obadia kha rêng Ahaba ziangah a fe a, a va ril tâk a. Ahaba chu Elija mu tumin a fe tâk a.

¹⁷Ahaba khan Elija a va mun chu a ziangah, “Nangmah hi na, Israelhei lungzîng isaktu?” a ti a.

¹⁸Elija khan a sâm a, “Keimah Israelhei lungzîng isaktu ni mang; nangmah neh ni pa kha nin nit lungzîng isaktu chu; PUMAPA thupêkhei nung isongin, Baalhei chubai nin iûn a nit.

¹⁹Atûnah hin Israelhei murdi kha ki ziangah Karmel tlânga hong rangin thu peh roh. Baala zânthla rizalikah sômringakahei neh Aseri zânthla rêngnu Jezebeli dochama khalai rikhîl sa ngai rizalikahei khom kha hong ṭhui sa rei,” a ti a.

²⁰Khanchu, Ahaba khan Israelhei murdi neh Baala zânthlahei kha Karmel tlânga ribûm rangin a koibûm a.

²¹Elija khan mipuihei kha a va nâi a, an ziangah, “Lung ôkrikâiin itena sôt im nin iom rang? PUMAPA kha Pathian a nitin chu ani khah zui unla, Baala kha pathian a nitin chu ani khah zui rei,” a ti a. Khannisela, mipuihei khan bâikah khomin sâm mak a.

²²Khanungchu, Elija khan, “PUMAPA zânthla la om chu keimah bang hi ki nit a; khannisela, Baala zânthlahei chu mi rizalikah sômringakah sar an nit a.

²³Serâtchal inikah ne hong kâi pêk unla, Baala zânthlahein serâtchal khatkah kha an dongtumin lah sela, that sela, richan nôi sela, thing chungah khan seh sela; khannisela, a nuaiah mei sêm no riseh. Kei khomin serâtchal dang khatkah kha khangkah ngirin thông ki ti.

²⁴Khanungchu, Baala zânthlahei khan an pathian ziangah ṭongṭai sela, kei khom PUMAPA ziangah ṭongṭai ki ta; khanchu, mei zuang itira zuang inkângtu tak kha Pathian dik a nit,” a ti a. Mi murdi kha an ipâi a, “A dik a nit,” an ti a.

²⁵Khanungchu, Elija khan Baala zânthlahei ziangah khan, “Nangmani chu nin tam ual a, serâtchal khatkah hi lah unla, inrifûk masa rei. Nin pathian ziangah ṭongṭai unla; khannisela, a nuaiah mei chu sêm no rei,” a ti a.

²⁶Khante, serâtchal an zianga an hong ikâi pêk kha an lâk a, an inrifûk tâk a, “O Baal ne sâm roh,” itin zînga rithokin sûnlâi idênin Baala riming kha an rilam a. An mâichâm siam ivêlah khan an lâm an lâm a; khannisela, sâmna rêng rêng omak a.

²⁷Sûnlâi tenan chu Elija khan anmani phengsanin, “Isam inring ual rei; pathian a nit a, a la irngaitua manih, tual ai suak vak manih, a înzin manih khom a nit thei; a nit nole ai in thlar manih nîng a ti, nin inṭhang rang ai nang kêng nîng a ti,” a ti a.

²⁸Khanchu, iring ualkan an isam a, an tho ngai balamin chemte neh tangsihein thi suak ngûi ngûi rakkan an ri-ât a.

²⁹Inî a hong ikâi a, kholoi ribôl zoro dênin an ṭong buan buan a; khannisela, sâmna rêng rêng omak a, rôl irî îte ireh rang ai om ino a nit.

³⁰Khanungchu, Elija khan mipuihei murdi ziangah khan, “Ne hong nâi ta u,” a ti a; mipuihei murdi khan an va nâi a. PUMAPA mâichâm ichim tâk kha a siaminṭhat a.

³¹Khante, “Ner ming chu Israela nîng a ti,” itia PUMAPA thu lei idongtu Jakoba naihei nam zâkah lung sômleiinikah Elija khan a lâk a.

³²Kha lunghei imangah khan PUMAPA rimingin mâichâm a siam a, mâichâm ivêlkan rinêng kha a choih inthûk a, amakhah tui litar sômleiilikah keng theina dôrka lianin ai choih inthûk a nit.

³³Khanchu, mâichâm chungah khan thing a hang inritua a, serâtchal kha archan nôi a, thing chungah khan a sia a. Khante, “Bêl ilikah tui insip unla, hâlrivâm thillan neh thing hi hong buak riai rei,” a ti a.

³⁴An hong buak riai a, “Buak nôk rei,” a ti a; an hong buak nôk a. Â tharin “Voikah hong buak nôk rei,” a ti a; an hong buak nôk a.

³⁵Tui kha mâichâm vêlka rinêng choih inthûk isip riai dôrkan mâichâm kha an buak indui chît a.

³⁶Kholoi tiang ribôl zoroah khan zânthla Elija khan mâichâm kha a va nâi a, a ṭongṭai a, “O PUMAPA, Abrahama hei, Isaka hei, Jakoba hei Pathian, nangmah hi Israelhei Pathian ni nit iti neh keimah hi ni bôi ki nit a, hihei murdi hi nangma thupêka tho ki nit iti vuanah hin zuang inlang roh.

³⁷O PUMAPA ki ṭongṭai hi ringai inla, ne zuk sâm roh. Khanchu, hi mipuihei hin nangmah PUMAPA hi Pathian ni nit iti riang an ta, an lungrilhei ni tiang a hong inngat nôk rang a nit,” a ti a.

³⁸PUMAPA khan mei a zuang iṭhum a, hâlrivâm thillanhei, thing hei, lunghei, ipilhei kha a kâng riai a, rinêng choih inthûka tui khom kha a kang riai tâk a.

³⁹Khante, mipuihei khan amakhah an mun chu an ibok a, “PUMAPA hi Pathian a nit, PUMAPA bang hi Pathian a nit,” an ti a.

⁴⁰Khanchu, Elija khan an ziangah, “Baala thiampuhei hi man unla, khatkah khom inzôk no rei,” a ti a. Mipuihei khan an man a, Elija khan Kison vadungah a ṭhui a, amakhan a that riai a.

⁴¹Khanungchu, Elija khan Rêng Ahaba ziangah, “Atûn chu fen la, fan la in ta roh; rua sângsari sûr rang rihu kî riat a nit,” a ti a.

⁴²Khanchu, Ahaba kha ifa neh iin rangin a fe tâk a. Elija kha Karmel tlângsîpah a lui a, amakhan arkhûk kâra a mâi irôla lingisikin rinêngah â bok a.

⁴³Â som ziangah khan, “Fen la, tuikhanglian tiang hang thlîr ta,” a ti a. Â som kha a fe a, a hang thlîr a, a hong kîr nôk a, “Îte mu mang e,” a ti a. Khangkan, Elija khan voisarikah sar ife a, hang ithlîr rangin a tir a.

⁴⁴A voisarina a hang thlîr nôkin chu, “Tuikhangliana rithokin miriam kutpha tiaka sûm hong ivuang diai diai ki mu,” a ti a. Elija khan â som ziangah, “Rêng Ahaba ziangah hang fen la, ni tâli inrifûk inla, fe zel ta roh, ruan nang idan duai a ti, hang ti roh,” a ti a.

⁴⁵Sôt inoteah rivân kha sûmin a hong duk ngûk ngûk a, phâivua a hong râng a, rua sângsari a zuang sûr tâk a. Ahaba kha tâlia chuangin Jezreel khuaah a fe tâk a.

⁴⁶PUMAPA sinthotheina ritha kha Elija chungah a zuang tlung a; a silbomhei a kongah a khuap indet a, Ahaba matonah khan Jezreel khua dênin â tlân tâk a.