Read Biete 1 RÊNGHEI 19 Bible Online

1 RÊNGHEI 19 - Biete bible

1 RÊNGHEI 19

¹Ahaba khan a nupui Jezebeli ziangah Elija thiltho murdi, Baala zânthlahei murdi a that tliahei kha â ril a.

²Khanchu, Jezebeli khan Elija ziangah, “Zânthlahei ni tho lam angkah taka naktûk hingka tik tena ni chungah ki tho non chu pathianhein ne that zel riseh,” itin mi a tir a.

³Khanchu, Elija khan a ṭi a, a thoi a, lâizâm a tho tâk a; â som kha a ṭhui a, Judai rama Beerseba khuaah a fe tâk a. Amakhan â som khah a mâk a.

⁴Ani chu ramchârah a sûn itlungin a lôn a; khanchu, arngam a junipar thing nuaiah hin â ṭhung a, ithi a ngên tâk a, “Ân rup tâk; O PUMAPA, atûnah hin ki ringna hi lah zel ta roh, ki ta rangin ithi hi ai ṭhat ual tâk a nit,” a ti a.

⁵Khanchu, junipar thing nuaiah khan a zâl a, a in tâk a. Voikazelin Vântirtôn hin a zuang tôn a, a ziangah, “Thoi inla, fah roh,” a ti a.

⁶A hang en vêl a, a luthlunah khan ibai thliam ri-em inmin diam neh tui ûm hi a mu a. Khanchu, ibai kha a fâk a, tui kha a in a, a zâl nôk tâk a.

⁷PUMAPA Vântirtôn kha a zuang kîr nôk a, a zuang tôn a, “Thoi inla, fah roh, ni fena rang kha ai lat a nit,” a ti a.

⁸Elija kha a thoi a, a fâkin a in a; khanchu, kha bu khan Pathian tlâng Horeb idêna sûn sômilikah neh zân sômilika sung lônna rang ritha ân nei tâk a.

⁹Amakhan ipûk khatkah a va tlung a, a om tâk a. Voikazelin PUMAPA thu a ziangah a zuang tlung a, a ziangah, “Hi munah hin im nî tho, Elija?” a ti a.

¹⁰Ani khan, “PUMAPA Tinrêngthothei Pathian, nangma sin, a nit nangma sin bang hi ṭhatnemringai takkan kî tho ngai a nit. Khannisela, Israela richihei lak khan ni thuthlung nung an song a, ni mâichâmhei an isim a, ni zânthlahei khandaiin an that a; a la om isun chu keimah bang hi ki nit a, ki ringna ne lah pêk an itum a nit,” a ti a.

¹¹PUMAPA khan a ziangah, “Va suak inla, itlângah hong inla, ki makungah hong iding roh,” a ti a. Khanungchu, PUMAPA kha a zuang a, phâivosimpui a zuang inrâng a, itlânghei a zuang sêm inkak a, lungpuihei a zuang ikhoi rem rum a. Khannisela, phâivosimpuiah khan PUMAPA chu omak a. Phâivosimpui kha arngam a, nînupui a hong inîng a; khannisela, nînupuiah khan PUMAPA chu omak a.

¹²Nînupui â nîng zoiin chu mei a hong suak a; khannisela, meiah khan PUMAPA chu omak a. Mei a hong suak zoiah khan, rôl rivuai te hi a zuang suak a.

¹³Elija khan amakhah a riatin chu a puanin a mâi a hup a, a va suak a, ipûk kotbâiah a va ding a. Rôl khan a ziangah, “Hin im nî tho, Elija?” a ti a.

¹⁴Ani khan, “PUMAPA Tinrêngthothei Pathian, nangma sin, a nit nangma sin bang hi ṭhatnemringai takkan ki tho ngai a. Khannisela, Israela richihei lak khan ni thuthlung nung an song a, ni mâichâmhei an isim a, ni zânthlahei khandaiin an that a, a la om isun chu keimah bang hi ki nit a, ki ringna ne lah pêk an itum a nit,” a ti a.

¹⁵PUMAPA khan a ziangah, “Ramchâr lampuiah kîr nôk tan la, Damaska khua lût inla, Hazaela kha Suria rêng rangin riak inrithun la,

¹⁶Israel rêng rangin Nimsia naipa Jehua riak inrithun la, nangma rithûla zânthla rangin Abel Mehola khua a mi Safata naipa Elisa kha riak inrithu roh.

¹⁷Hingka hin nîng a ta, Hazaela khandai izôk kangân chu Jehua khan that a ta, Jehua khandai izôk kangân chu Elisa khan that a ti

¹⁸Nikhomsela, Israel ramah hin Baala makunga rikhûk la dil ngai ino neh la fôp ngai ino mi sângsarikah ki ta rangin kî zua rang a nit,” a ti a.

¹⁹Khantak ata kha Elija khah a suak a, Safata naipa Elisa kha a zong suak a, Elisa khan âl a lei inkâi a, a matonah khan serâtchal bop sômleikhatkah a om a, a bop sômleiinikna kha aman a lei inkâi a, Elija khan a va pan a, a puan a lîp a, Elisa kha a vân sil a.

²⁰Khanungchu, Elisa khan a serâtchalhei kha a mâk rak a, Elija khah arzûl thal a, “Ki nu neh ki pa va chibai vak ki ta; khanchu, nang hong zui ki ti,” a ti a. Elija khan a ziangah, “A ṭhat va fe roh, nang khap no ning e,” a ti a.

²¹Khanungchu, Elisa kha a kîr nôk a, serâtchal bopkah âl a înkâihei kha a va that a, âlkâina mangruahei kha thinga tuan a sa khah a suang a, mihei a sem a, an fâk a. Khanungchu, a thoi a, Elija kha a zui a, a sin a tho pêk tâk a.